Popular Bible Verses from Apocalipsis 12

Share

Haire jepyhe Avisha Ray huvy rupii hareka ñee mbeujyreva rupii. Tẽvã ñandyryhevare haihuãmba reta hykove, koñeĩ ĩñonoĩ timeĩ jukaha verã.

Haivi ahendu pente ñee hỹnatu araivi heiva: Ã'ẽ vãhẽma pyrỹmondoajepe verã, pyrãtãkue hareka Tũpa huvisha vasurã'ẽ verãpe, hareka ñy ñymbai katukue, shara ãña mohẽama vate araivi, ñandyryvyre arakuepe hareka pyharekue porãmba ijeta'ihea Tũpa hỹnonde.

Haivi mboi vasu momboha yvykyty, mboi aryka'eiteva, Ãña hareka Satanás he'iashuva, opa kuaretare mbytavyva, hai jokuevare hãndi momboha yvy'ĩãrẽ.

Hãme rãnga pyvy'aĩpo ara vate'õva hareka pikopyva! Tengapo yvy'ĩãre'iare hareka yy vasupy iare! Shara poshyite ryheve Ãña vejymape, kuama jy'ara pukuveama potarã.

Haivi iko ñyrãrõ vasu vate arapy, Miguel hareka vate arapy jokuevare, ñymbyvaishohe mboi vasu. Hãrã mboi vasu jokuevare hãndi ñyrãrõ jyve.

Hãma mboi vasu poshyitevejyshu taupe, hãrã japo ñyrãrõ vasu ñymoña hãndiare, japovare ñee japoa verã Tũpa ña'ãpova hareka jyrojaheva Jesús ĩñee.

Haivi ijyhesha arare pente tivishava mbai heshahava: Pente taupe kuarasype ñymondeva, hareka jasy ipy ipere, hareka ñakare'ẽ pente tankare ñonoava 12 jasytata ĩmerea. Taupe puruava sapuke hasyitemashu memby verãrã.

Haivi taupe memby kuimbai, hareka memby opaite tenta vasure ẽẽposhu huvisharã hiero pukuva ryheve. Haivi sapy'aĩ mbaretepe hekyashi memby rahaha Tũpape hareka vapypya hỹnonde. Haivi taupe ñyvãhẽ yvy ikoambaipi, Tũpa myhẽvashu hendarã ñyngarekohe verã, haipe myngarupo 3 ãño hareka 6 jasykavi.

Haivi jykuaajy ynga heshahava vate arare: Pente mboi vasukue pyntava, 7 ñakavare hareka 10 ijuureva, ñakare pepenteĩre tankare ñonoava. Huvepy mbytyryry mbahapy henda'õ jasytatare hareka mombo yvy'ĩãrẽ, haivi mboivasu oho taupe memby'ẽ verã hỹnonde, membymarã opa houshi verã.

Hãrã taupe me'ẽãshu mokue vyrachevasu hypepo, veveshi verã mbyry mboi yvy ikoambaipi ñyngarekoahe verãpe 3 ãño hareka 6 jasykavi. Mboi mohẽ juruipi taupe haykue yysyry rãĩmiva, raha verã yy syryva. Tẽvã yvy maĩ'ĩãrẽ taupe, peashu pente yvykua hareka opa mokue yy syry'ova mboi vasu mohẽva juruipi.