Popular Bible Verses from Gurim 13

Share

Konto nam tei se n ta‑n jege swa mo. Nmo yi ná poore, n wó wane n boŋe n lɔre juru kom namba kam kuri. Namba kam bere nabiinu yere mo. Ka nam ye bia yaredo de fuseredo-baredo (666) mo.

Nɔɔna balo maama na jege kugu jei logo baŋa ne to wó taa zuli juru kom. Banto mo ye nɔɔna balo yera na maŋe ya wo popone ya tiŋi Wɛ ŋwe-doŋa tɔnɔ kom wone maŋa kam logo baŋa ta na tera to. Ko nam ye Pipeila kam ba na go to mo tei tɔnɔ kom konto.

Ko ma fe nɔɔna maama se ba taa jege gwona ba jazena ne naa ba tira ne. Ko ná ye nabwona de nɔn-kamuna de, naa ko ná ye naduna de yiniga tiina, ko woli de kabɛ de balo na tei ba tete to de, ba maama wó la gwona yam konto mo. Nɔɔno ná wo lage gwona yam konto, kotu bá wane o yeigi woŋo naa o kwei woŋo o yeigi. Gwona yam konto nam mo bere juru kom yere, naa namba kalo na bere ko yere dem to.

Wolo maama na yɔɔre o ba se o dona ja‑o ba pe to, ba wó ja konto tu mo ye o bá lu. Wolo maama de na yɔɔre o ba se ba ma se-zɔɔ ba go‑o to, ba wó ma-ko mo ba go‑o ye o bá wane o lu. Konto mo tei Wɛ nɔɔna bam jege se ba taa vɔ pu-dɛa, se ba daare ba ke ba wo-dedoa de Wɛ.

Amo daa ma na juru kodwoŋi ko na nwoŋi naneo kom wone. Ko maa jege nyea fuga de yuni terepɛ. Ko nyea yam baŋa maama maa jege paare yipwi. Ko yuni tem yera ne ma popone yere delo na twe Wɛ to.

Juru kom ma kwori ko na dam se ko kwaare jara de Wɛ nɔɔna bam, se ko wane-ba ko di. Ko ma jwoŋi dam se ko taa tei logo baŋa dwi maama, de teene maama tiina, de taana dwi maama tiina, de paare dim jei sem maama tiina.

Ko na nɛ chwoŋa se ko ke wo-kenkagela yanto dwoŋi da-yiga juru kom ŋwaane tei to ma pa ko wane ko gane nɔɔna balo na zoore logo baŋa ne to. Ko ma ta-ba se ba mɔ kamɔgɔ se ko taa nye de juru kolo ba na mɛ se-zɔɔ ba zage ye ko ta ŋwe to. Ko ma daare ko na chwoŋa se ko kwei siu ko ke da-yiga juru kom kamɔgɔ kom wone, se ko taa ŋwe. Ko na ke konto to, kamɔgɔ kom maa wae ko ŋɔɔna, ye ko jege dam se ko pa balo maama na ve se ba zuli-ko to te.

Amo na nɛ juru kom konto to, ko nye de gweeru mo. Ko nɛ maa nye de faao nɛ, ye ko ni nye de nywoŋo ni. Kayanchɔrɔ kom laam ma kwei ko paare dem de ko dam-fɔrɔ kom ko ke juru kom jeŋa ne.

Ba ma pa juru kom chwoŋa se ko ŋɔɔne kamunni ko pa ko tete, ye ko daare ko ŋɔɔne ko twe Wɛ yere. Ko ma jwoŋi dam se ko vo ko yi chane finna-selei (42).

Juru kom yuu dedoa maa jege fufwolo, nenɛɛne ba zage-ko mo tei. Fufwolo kom konto laam ma ba ko jei. Ko ma so nabiina maama logo baŋa ne, ye ba sɛ ba pa juru kom.

Amo laam ma na juru kodwoŋi ko na nwoŋi tega ne. Ko maa jege nyea yalei, ne pi-bala nyea na ye tei to. Ko ŋɔŋa maa nye de kayanchɔrɔ ŋɔŋa kam na ye tei to. Da-yiga juru kom ma pa‑ko chwoŋa se ko ma ko dam-fɔrɔ kom ko toŋe ko pa-ko. Ko ma ma dam dem konto ko fe balo maama na zoore logo baŋa ne to pa ba zuli da-yiga juru kolo yuu ba na zage ye ko fufwolo kom laam jei to.