Popular Bible Verses from ဖဖ 2

Share

ခဲ့ ပီ ဘူင် ဘေ၊ ကွဲ့ တဲး ဘေ ကာဖာ မီ အာဒါ ဒုဝ် ဘြိမ် ဘေ။ ကွဲ့ တဲး ဘေ ဘူင်၊ တဲး အီ ဟဝ် အိူပ် ဘေ။ တဲး ဘေ မိုဝ်း မီ နဝ်း ဂူမ် နဝ်း တျီမ်၊ တဲး ဘေ ဒွန် အီ မာတ် အီ ဟဝ် ဟဲ့ မွှိုမ် လွှိုမ် ဘေ။ ဒဲင် တီ၊ ကွဲ့ ဘူင် တဲး န့ ဘဲန် အာဂျိုဝ် မီ ဒီ ဒုဝ် ဘြိမ် ဘေ။ တဲး ဘေ ဘူင် တဲး န့ ဘဲန် အာဂျိုဝ် ဘော အာဒါ အီ ဟဝ်။

တဲး နဝ်း ဘေ ပီ နဝ်း ဇဝ် ယေဆူ။

ဇဝ် ယေဆူ ပီ ဘော ဟဲ့ မုး ဇဝ်ဖြာ မိူဝ်၊ အန် ယီ တူ တဝ်း၊ “ကူပ် မုး အုဝ် ဇဝ်ဖြာ၊ အုဝ် တူ ခမ် ဒီ ဘဲန် ဒူအီ။” အန် ဘော ခမ် ဒီ ဝဲန် အာဖုင် ဒင်ခုဝ် အန် ဘောကာဂ့လျီတ်။ အန် ဘော ခမ် ဒီ ဘဲန် ပီ မှာယ် အီ ဟဝ်၊ ဘော ခမ် ဒီ ဂွိုတ် ဘဲန် ဒူအီ။ အန် ဟဲ့ ဟွတ့် ခမ် ဒီ ဂွိုတ် ဘဲန် ဒူအီ၊ အန် ပီတျီမ် ဒုဝ် အန် ဘော ထူမ် ဘော ဘူင် တူတ့် ပဲ့ ဟဲ့ စ်ု ဇဝ်ဖြာ အန် ဘူင်၊ တဲး အန် ကော ခမ် ဒီ ယမ် ဒဲင် ရွင့် ကာဝဲ့ ပီ ဒူအီ ဟာယ်။

ခုဝ်၊ န့ မုး ဇဝ်ဖြာ အီ တဲး ဘေ မိုဝ်း နဝ်း ဆီ ဘူင် နာ မွှိုမ်။ အန် တဲး ဘေ ဘော ပွိုန် ဒီ ဘူင် ဒူပ် ပီ အိုင် အန်။

ကူပ် ပီ ဘူင် အန် တီ၊ ဇဝ်ဖြာ ဘော အိူပ် မျုက် အန် လွှိုမ် မျုဝ် ဟဝ်၊ ပီ ဝီ တဲး အန် မိုဝ်း ပွုန် တာင် လွှိုမ် တူတ့် ဒွန် မျုဝ်။ ခဲ့ ကွယ် မျုဝ် အီ နပ် ဒီ ကြိုပ်၊ ဂေ ဒီ ဘော ခြိုပ်ခြဝ် ကြိုပ် ဇဝ် ယေဆူ။ ဂေ အီ ကွယ် ခဲင် ဂါင်ဟြာဝ်၊ ဘော ဂေ အီ ကွယ် ဒဲင် ကာဒါယ်၊ ဘော ဂေ အီ ကွယ် ခြိုမ် ကာဒါယ်၊ ဂေ ဘောကာဂ့လျီတ် ဒီ လုဝ် ဂူမ် ကြိုပ် ဇဝ် ယေဆူ။ ဒွန် အီ ဒီ ဘော တဝ်း၊ ဇဝ် ယေဆူ မုး ဒါ ကာညာ အီ အိုပ် တူတ့် ဒွန် မျုဝ်။ ပါယ် တီ၊ အာဖုင် ဒင်ခုဝ် ဇဝ်ဖြာ အီ မုး ဂုန့် ဇဝ် ယေဆူ ဒီ ဘော လိုဝ်း ဆီချာ။

ခဲ့ ပီ ဘူင် ဘေ ဒွန် မျုဝ်၊ ကွဲ့ ပိုန့်၊ ကွဲ့ ကာအေး ကာထဲန့်။ ဆေ ဘေ ဘူင် ပါယ် တီ၊ အီ ဟဝ် မိူဝ် တူ ပွိုန် ကာလာင် နာ တူ မွှိုမ် လွင် ဘေ။ န့ ဒီ တဲး ဘေ မိုဝ်း နဝ်း လုယ် ဆီငါ။ ဘေ ဟဲ့ ဘဲန် ဂွန် ဇဝ်ဖြာ အီ တူ မိုဝ်း မှာပ် မာဆေ။ ဘေ မိူဝ် ကွယ် ကာတဲ ဂေ ဒူအီ အီ တူ မိုဝ်း နဝ်း ဆိူဝ် နဝ်း မှာန်၊ အီ ဘူင် အီ မွှိုမ် ကာအိး။ ဘေ ယီ ပီ ဘ့လာင် ဒီ ဒူအီ ဇိုဝ် တီ။ ဘ့လာင် တီ ပီ ဘ့လာင် ဆီမန့် အီ ကွယ် ခဲင် ဘ့လေန့်။

ခုဝ် အန် တီ ဘေ ဘီနွင် ပီ ရွက့် အုဝ်၊ ဘေ ဟဲ့ ဒွိုမ် ထူမ် ဂြုဝ်း အုဝ် ဒေါ ကွယ် အုဝ် ဒူပ် ဘေ။ ဒေါ တူ ကွယ် အုဝ် မိူဝ်၊ ဘေ ဟဲ့ ဝဲ လုဝ် ထူမ်။ တဲး ဘေ မိုဝ်း နဝ်း ယုဝ် ဒီယေန့် ဘော ဂျုဝ်ဂျာ ဒီ ဘူင်၊ တဲး န့ ကာဒါန် ဒီ ပီ ချွတ် ဇဝ်ဖြာ ဒီ ဘေ။