ဂြုဝ်း နီ တး ဒီ အာမုဝ် အီ မုး ဒါ အီ ဟျီင် မာဘူ၊ အီ ကွယ် ခဲင် မိူင် ဒေကော ခဲင် အိူင် ယူဒါ။ အန် ယိုဝ် အာရူင် ပီ ဘျ ဇဝ်ဖြာ ဒီ အန် ဒေါ မုး စုဝ် ဘာန် ခုန်ဒီခမ် အာအူဇီယာ အီ မုး ခုန်ဒီခမ် ခဲင် မိူင် ယူဒါ ဘော ဒေါ မုး စုဝ် ဘာန် အာယေရုဝ်ဘုဝ် အီ မုး ဂွန် အာယေဟုဝ်အာတ် အီ မုး ခုန်ဒီခမ် ခဲင် မိူင် အီဆာရေလ။ ဒေါ အန် တီ န့ မုး အာ ဆီနမ် အာတ့် မာအိမ် ယေန့်။
ဇဝ်ဖြာ ဟဲ့ ကာလာင် ဒီ အာမုဝ် ပါယ် နီ။ “ဇဝ်ဖြာ ဟဲ့ ကွယ် ဒီ နွန် ဇီအူန် ဘော ရျီင် ပီ မာခြင်ဆီ။ အန် ဟဲ့ ကွယ် ခဲင် မိူင် ယေရူဆာလဲမ် ဘော ဒတ် တာင်။ ဒေါ အန် တီ ဒူင် ဟျီင် ဂေ မာဘူ၊ ပေတ့် ဂေ ပြဲ ဘော ဟျီ့ ကာဟဝ်း အူ ဇေန့်။ ပေတ့် ဒဲင် နွန် ဂါမေလ တွိုန် ဟဲ့ ဟွတ့် ဟျီ့ ကာဟဝ်း တူတ့်။”