Popular Bible Verses from ဂါလာတိ 4

Share

နင်ရို့ ထာဝရဘုရား၏ သားသမီး ဖြစ်ကတ်တေအတွက်န ထာဝရဘုရားစာ ကိုယ့်သားတော်၏ ဝိညာဉ်ကို နင်ရို့ စိတ်နှလုံးမာ သွင်းပီးလီရေ။ ထိုဝိညာဉ်စာ ထာဝရဘုရားကို အာဗ္ဗာ ဟို့ ခေါ်ရေ၊ ယင်းအဓိပ္ပါယ်ကား အဖ ဟို့ ခေါ်ရေ။ ယင်းအတွက်န နင်ရို့ ကျွန် မဟုတ်ပျာ၊ ယင်းထက်ပင် နင်ရို့စာ ထာဝရဘုရား၏ သားသမီး ဖြစ်ကတ်ပျာ။ နင်ရို့ အမှန် ထာဝရဘုရား၏ သားသမီး ဖြစ်ကတ်တေဆိုကေ ထာဝရဘုရား၏ ဂတိတော်အမွီကို နင်ရို့ ရကတ်လိမည်။

ယေကေလည်း အချိန်စိရေခါ ထာဝရဘုရားစာ ကိုယ့်သားတော်ကို လောကတို့ ရွှတ်လိုက်လီရေ။ သူစာ မိန်းမတစ်ယောက်အဝမ်းမာ ကိုယ်ဝန်တည်ရို့ မွီးဖွားခြင်းကို ခံယူလီရေ အရာ ယုဒလူမျိုးရို့ ပညှတ်တရားအောက်မာ နီထိုင်လီရေ။ ပညှတ်တရားအောက်မာ နီထိုင်သူရို့ကို ချွတ်ဖို့အတွက် အရာ ငါရို့ကို ထာဝရဘုရား၏ သားသမီးအဖြစ် လက်ခံဖို့အတွက် ထာဝရဘုရားစာ ကိုယ့်သားတော်ကို လောကတို့ ရွှတ်လိုက်လီရေ။

ယေကေလည်း နင်ရို့ ဒေဂု ထာဝရဘုရားကို သိကတ်ပျာ။ ယင်းထက်ပင် ထာဝရဘုရား နင်ရို့ကို သိဗျာ ဟို့ ပြောကေပင် ကောင်းဖို့သိ။ ယင်းပိုင်ဆိုကေ လောကမာ အားနည်းစာန အကျိုးမပီးစာ အမျိုးမျိုး ဒလည့်ထုံးစဉ်တိတို့ နင်ရို့ အရာတစ်ပြန် လှည့်ရို့ ဇာဖို့ ကျွန် ဖြစ်ချင်ကတ်စာလည်း?