Popular Bible Verses from ၂ကောရိန္သု 4

Share

ငါရို့စာ မြင်ရစာဖက်တို့ ကြည့်ကတ်စာ မဟုတ်၊ ယေကေလည်း မမြင်ရစာဖက်တို့ ကြည့်ကတ်စာ ဖြစ်တေ။ မြင်ရစာတိစာ တစ်နားသျှေရာ တည်မြဲရေ၊ ယေကေလည်း မမြင်ရစာတိစာ ထာဝရပတ်လုံး တည်မြဲရေ။

ယင်းအတွက်န ငါရို့စာ စိတ်မပျက်ကတ်၊ အကြောင်းကား ငါရို့မာ ကိုယ်ခန္ဓာစာ တစ်ဖွဲဖွဲ ကြုံကေလည်းသောက် ငါရို့အထဲမာ ဝိညာဉ်စာ တစ်ရက်ထက်တစ်ရက် အသစ် ဖြစ်နီရေ။ ဒေဂု ငါရို့ တစ်နားသျှေအတွက် တစ်ဖဲ့သျှေ ဒုက္ခ-ဝေဒနာကို ခံရနီကတ်တေ။ ယေကေလည်း ငါရို့ ခံရနီကတ်စာ ဒုက္ခ-ဝေဒနာအတွက် တိုင်းထွာရို့ မနိုင်စာ ဘုန်းတန်ခိုးကို ငါရို့ ထာဝရပတ်လုံး ရကတ်ဖို့။

ငါရို့ ဟိသမျဖက်က ဒုက္ခကို ခံရကတ်ကေလည်း စိတ်မပျက်ကတ်။ အရာ ဇာလုပ်ရဖို့လည်း ဆိုပြီးကေ အကြံမရ ဖြစ်ကတ်ကေလည်း ငါရို့ အားမသျှော့ကတ်။ ငါရို့ ညှဉ်းဆဲခြင်းကို ခံရကတ်ကေလည်း ထာဝရဘုရားစာ ငါရို့ကို မစွန့်။ အရာ မြေပြင်မာ လဲကျအောင် အထိုး ခံကတ်ကေလည်း ငါရို့စာ မသီကတ်။

ယေကေလည်း ထာဝရဘုရားစာ ထိုဥစ္စာဆိုစာ သတင်းကောင်း၏ အလင်းကို မြေအိုးထဲမာ ထည့်ထားလီရေ အရာ ငါရို့ ကိုယ်တိုင် ထိုမြေအိုး ဖြစ်ကတ်တေ။ ဒေ မဟာတန်ခိုးစာ ထာဝရဘုရားက လာလီရေ၊ ယေကေလည်း ငါရို့က လာလီစာ မဟုတ်ဆိုစာကို လူရို့ သိကတ်ပတ်စီအတွက် ထာဝရဘုရားစာ ထိုသတင်းကောင်း၏ အလင်းကို မြေအိုးထဲမာ ထည့်ထားလီရေ။

ဒေ လောကကို အုပ်ချုပ်သူ မာရ်နတ်စာ မကျုံသူရို့ စိတ်ကို မှောင်မိုက်အောင် လုပ်ဘိုက်လိုက်ပျာ။ ယင်းအတွက်န သူရို့စာ သတင်းကောင်း၏ အလင်းကို မမြင်ရကတ်။ ဒေ သတင်းကောင်းစာ ခရစ်တော်၏ ဘုန်းတန်ခိုး အကြောင်း ဖြစ်တေ အရာ ခရစ်တော်စာ ထာဝရဘုရား၏ ပုံသဏ္ဍာန်နတတူတည်း ဖြစ်တေ။

အကြောင်းကား ထာဝရဘုရားစာ၊ “အမိုက်မှောင်ထဲမာ အလင်း ဖြစ်စီ” ဟို့ ပြောလီရေ။ ထာဝရဘုရားစာ ငါရို့ စိတ်နှလုံးမာ ထိုအလင်းကို ထွန်းတောက်စီလီရေ၊ အကြောင်းကား ယေရှုခရစ်တော်၏ မျက်နှာမာ ထွန်းတောက်နီစာ ကိုယ့်ဘုန်းရောင်ခြေတော်ကို ငါရို့ကို သိစီချင်လီရေ။