Popular Bible Verses from ၂ကောရိန္သု 1

Share

ထာဝရဘုရား၏ ဘုန်းကြီးပါစီ! သူစာ ငါရို့မာ အသျှင်ယေရှုခရစ်တော်၏ အဖထာဝရဘုရား ဖြစ်တေ။ သူစာ ကရုဏာနပြည့်စုံစာ အဖလည်း ဖြစ်တေ အရာ ဟိသမျ ငြိမ်းသက်ခြင်း၏ ထာဝရဘုရားလည်း ဖြစ်တေ။ ငါရို့ ဟိသမျ ဒုက္ခ-ဝေဒနာကို ခံရကတ်တေခါ ထာဝရဘုရားစာ ငါရို့ကို ငြိမ်းသက်ခြင်း ပီးရေ၊ အကြောင်းကား သူ့က ရလိုက်စာ ငြိမ်းသက်ခြင်းကို အခြားလူရို့ ဒုက္ခ-ဝေဒနာကို ခံရကတ်တေခါလည်း ငါရို့ သူရို့ကို ငြိမ်းသက်ခြင်း ပီးဖို့ ရလတ်အောင် ဖြစ်တေ။

ငါရို့စာ ခရစ်တော်ပိုင် ဒုက္ခ-ဝေဒနာ အများကြီး ခံရနီကတ်တေ။ ယင်းပိုင်တထန် ငါရို့စာ ခရစ်တော်ကနီရို့ အများကြီး ငြိမ်းသက်ခြင်းကိုလည်း ရနီကတ်တေ။

ဒေ ချိန်းခေါက် ငါရို့ အမှန် သီရကတ်ဖို့ဗျာ ဟို့ မှတ်ကတ်လီရေ။ ယေကေလည်း ငါရို့စာ ကိုယ်ရို့ကို အားမကိုးဘိုင်းန သီသူရို့ကို ပြန်ရှင်ထမြောင့်စီနိုင်စာ ထာဝရဘုရားကို အားကိုးပတ်စီအတွက် ငါရို့ ထိုဖီးဒုက္ခမာ ကျလီကတ်စာ ဖြစ်တေ။

ထာဝရဘုရားရာ ငါရို့န နင်ရို့ကို ခရစ်တော်န တစ်ကိုယ်တည်း ဖြစ်စီရို့ တည်မြဲအောင် လုပ်နီရေ။ သူစာ ငါရို့ကို သန့်ရှင်းသူအဖြစ် ရွီးကောက်ရို့ အခြားခွဲထားဗျာ၊ ယင်းအဓိပ္ပါယ်ကား သူစာ ကိုယ့်လူအဖြစ် ငါရို့ကို တံဆိပ်ရိုက်ရို့ ထားဗျာ။ အရာ သူစာ ငါရို့ဘားမာ ခံထားစာ ဟိသမျ ဂတိတော်၏ အာမခံအဖြစ် သန့်ရှင်းသောဝိညာဉ်တော်ကို ငါရို့ စိတ်နှလုံးမာ သွင်းထားဗျာ။

ငါရို့ ဒုက္ခ-ဝေဒနာကို ခံရကတ်တေဆိုကေ နင်ရို့ ငြိမ်းသက်ခြင်းန ကယ်တင်ခြင်းအတွက် ခံရကတ်စာ ဖြစ်တေ။ အရာ ငါရို့စာ ငြိမ်းသက်ခြင်းကို ရကတ်တေဆိုကေ နင်ရို့လည်း ငြိမ်းသက်ခြင်းကို ရကတ်လိမည်။ နင်ရို့ ငါရို့ပိုင်တထန် ဒုက္ခ-ဝေဒနာကို ခံရကတ်တေခါ စိတ်ရှည်သည်းခံခြင်းန နီဖို့အတွက် ထိုငြိမ်းသက်ခြင်းစာ နင်ရို့ကို အကူညီ ပီးလိမည်။