Popular Bible Verses from Rṳ̂̌me̤ 6

Share

Ma̤titèhî̌dě, ta̤sǔ akhû̌akǎ mî̌ ta̤si. Bǎbǎkǎlè ta̤bwǐta̤sîrî asû dǒ Cǒmara ǐlò̤ kwe pa numî̌ yôla htûpwa̤ tûjû̌pwa̤ dǒ pa Běcǎ Yeshǔ Khrǐ akû nuhǒ.

Sî ô̌htûpwa̤ dǒ ta̤sû̌ta̤tòwò alǎ̤ mè̤̌petô̤̌, sî ô̌htûpwa̤ dǒ Cǒmara abwǐsîrî alǎ̤ hǒ. Pô̤̌nudě ta̤sǔnu a htû pe bǎ sîběcǎ tô̤̌.

Pô̤̌nu akhû̌akhî bǎ pa jushi akhanu, a sô̌sô̌ kû̌ pa si kû̌ Khrǐ hǒ, dě kòyò lǔǐ lò̤ pa kû̌ Khrǐ dǒ lṳ̌kû hǒ. Dǒ papha Cǒmara a ta̤bwǐdû̌sîrîhtû pô̤phǎ akhû̌akhî, pô̤̌ a ma̤htûpwa̤ getîkhî sô̌ Khrǐ dǒ ta̤si akûnu, a gǔ dǐ ô̌htûpwa̤ pa nutokhlǒ kû̌ ta̤htûpwa̤ asa pě.

Ǐ tǎ̤ sî nǎ̤glǒ ayô̤agî̌ dǒ ta̤phû̌mò̤̌shǐhtô gǔ noǎ lû̌û kû̌ a ta̤wè̤̌ta̤htò dǒ lǎ̤ma̤ ta̤sǔ tokhlǒ ayanu tǎ̤mǎ̤ nî̌꤮. Cǒmara ǐhto na ta̤ô̌htûpwa̤ asa akhû̌akhî, ǐ lô̌khô sî nǎ̤glǒnu dǒ a ô̌nu. Ǐ bò sî nǎ̤glǒ ayô̤agî̌ nutokhlǒ lǒ̤bò dǒ Cǒmara a ô̌nu, dě pô̤̌ sî noǎ ta̤wè̤̌ta̤htònu, noǎ lô̌khô sî nǎ̤glǒ tě̤ta̤nu dǒ sî lǎ̤ma̤ ta̤tě̤ta̤mè̤̌ aya nî̌꤮.

Ma̤titèhî̌dě, pô̤̌khô ta̤sǔ a ta̤pô̤ta̤phǎ ashû̌ashonu gǔ pǒǐ pe pa tô̤̌nu, htokhôtô̤̌ pô̤̌khô pa gǔ htû pe ta̤sǔ a jû̌ tô̤̌nu, sî sî̌yahto kû̌ pa ta̤ô̌htûpwa̤ ali̤nu, Cǒmara ma̤sihtò̌ hto kû̌ Khrǐ hǒ.

Sô̌sô̌kû̌ nuhǒ, sî tô hî̌lò̤ǐ lô̌khô sînǎ̤ kû̌, ta̤sǔ ata tokhlǒnu, pa bǎbè̌kè a pô̤̌ kòyòsi dǒ a ma̤jòpe ta̤sǔ tô̤̌nu. Bǎbǎkǎlè sî kû̌ Yeshǔ Khrǐ mî̌ sî htûhtò̌kè lû̌û ta̤ tôcǒ nô̤̌ hǒ akhû̌akhî, sî tôbǎ ô̌htûpwa̤ ma̤lî ma̤kakhahtò̌ lô̌khô Cǒmara.

Kè̌ ma̤pô̤̌nu hî̌dě, pa gǔ hî̌ hî̌tè? Pô̤̌khô Cǒmara abwǐsîrî gǔ dû̌htò̌ ayanudě, pa tôbǎ ma̤ sělě hèpô̤̌ ta̤sǔ ya? Pô̤̌nu mè̤̌tô̤̌. Pa mî̌ asô̌sô̌kû̌ kòyò dǒ a si dě a ma̤ sělě jòpe ta̤sǔ tô̤̌ nutôpwa̤ hǒ. Pô̤̌nudě pa cû̌ ô̌htûpwa̤ ma̤ sělě jòpe ta̤sǔ hî̌tè?

Sî sî̌ya bǎnô̌tô̤̌ ya? Bǎ sî ǐlò̤ sînǎ̤ dǒ kòyò tôpwa̤pwa̤ a cǔdekû dě sî gǔ htû a jû̌ akhanu, sî ganǎ̤de kòyò ayô̤̌ mî̌ a nǐ̤pe bǎtô̤̌. Sî bǎ ganǎ̤de pwǎtǒ̤ ayô̤̌ pwǎ, mè̤̌bǎtô̤̌ya? Pô̤̌nudě bǎ sî htû ta̤sǔ ajû̌ akhanu, a sûcû̌kè sî dǒ ta̤si pě. Bǎbǎkǎlè sî kè̌ ganǎ̤de Cǒmara ayô̤̌ hî̌dě a gǔ nohtûpwa̤ sî dǒ sî ma̤tô a sǎphlǒ nupě.

He hî̌bwǐhî̌sîrî Cǒmara, ma̤titèhî̌dě, dǒ awǐkha sî htûbǎ hto ta̤sǔ ajû̌ tôplǎ, bǎbǎkǎlè khònò̤̌ sî ganǎ̤de lǒ̤sû̌lǒ̤sò̌ Cǒmara a ta̤sû̌ǐ asa dǒ sî nǐ̤bǎ nu tokhlǒ hǒ. Cǒmara bôphlǔ plûhǎhtò̌cû̌kè sî kû̌ ta̤sǔta̤plě a jû̌nu hǒ. Khònò̤̌ sî htûkè ta̤tě̤ta̤mè̤̌ ajû̌ hǒ.