Popular Bible Verses from Matè̌ 24

Share

Ta̤phû̌mò̤̌shǐhtô ô̌htò̌dû̌wî̤ akhû̌akhî, ta̤mô̤ǐ klaǐ lû̌û tôpwa̤ kû̌ tôpwa̤ sǔ sǔ agǔ hǎmǎ hè pě. Bǎbǎkǎlè kòyò dǒ a ihtǒ ô̌měô̌gle dǒ a ta̤yṳ̌ta̤nǎ̤ akû tǒ̤dǒ agutṳ̌ tokhlǒnu Cǒmara gǔ ma̤hǎplǎge asî pě.

Htodě mǒkhû̌ ashigǎ a ta̤sǎlě̤we̤kènu, kòyò gǔ shôbǐǐlṳ̌ ganǎ̤de bǎ bò kòyò ô̌ dǒ hǎkhû̌ tôbě bò pě, shigǎ pṳ̂̌tagǎ gǔ ganǎ̤de htobò ta̤phǔkhò̌nu mî̌ hǎkhû̌ gǔ gutṳ̌ nô̌ pwǎ.”

Sî gǔ ganǎ̤de ta̤shěta̤pě̤ dǒ a htûhtò̌ khònò̤̌ nutokhlǒ pě, htokhôtô̤̌ sî gǔ ganǎ̤dehtô ganǎ̤delò̤ kû̌ kòyò gǔshěgǔpě̤ lû̌û pě bǎbǎkǎlè ǐsha bǎgû̌bǎgè̌ tǎ̤ lô̌khô tǎ̤mǎ̤ nî̌꤮. Pô̤̌o tokhlǒ numî̌ a bǎ htûhtò̌ nò pě, bǎbǎkǎlè hǒo numî̌ hǎkhû̌ glè̌ pî̌ gutṳ̌ nò̌khôtô̤̌.

Ma̤titèhî̌dě kòyò khlilèphû̌ tocǒ kû̌ tocǒ, shigǎ tôgǎ kû̌ tôgǎ gǔshěpě̤ lû̌û pě. Ta̤sǎwǐ̤ sǎô ta̤sha siwǐ̤ kû̌ tanahtû̌de tokhlǒ gǔ dǎlô̤̌dǎkhô bò dǒ hǎkhû̌ nutûkû hto tûkû pě. Ta̤htûhtò̌ lǒ̤꤮ bò hǒtokhlǒ numî̌ amè̤̌mô̤̌ pepwǎ ta̤jî̌ta̤jû̌ a kòshî̌ dǒ asô̌sô̌kû̌ pwa̤mǒ̤ glè̌ phû̌ô̌ hǐphushanu mô̤̌pepwǎ.

Mǒkhû̌ kû̌ hǎkhû̌ gǔ hǎmǎkè pě bǎbǎkǎlè helě̤heyô̤̌ tokhlǒnu a hǎmǎkè nô̌ tôkhò̌꤮ tô̤̌.

Ma̤titèhî̌dě kòyò gǔ hè lô̌lò̤ ǐtûû̌ lô̌khô anǎ̤ kû̌ hemi̤ pě tokhlǒnu a ô̌ dû̌wî̤ pě, dě asî gǔ dǒkôǐ lòhôlò̤ ǐtûû̌ lô̌khô anǎ̤ kû̌, ‘he mî̌ Khrǐ’ dě asî gǔ lô̌ǐplò̤ǐ dû̌wî kòyò pě.

“Htodě kòyò gǔpṳ̂̌gǔpo̤ bò sî pě, kòyò gǔpo̤guplè bò sî pě htokhôtô̤̌ kòyò gǔ ma̤si sî pě. Dǒ sî kû̌ he mi̤ akhû̌akhîdě kòyò pṳ̂̌꤮ tôpwa̤ gǔ tôkhôsò̌ bò sî pě. Bǎnukha pě kòyò gǔ wîkè dû̌ a ta̤yṳ̌ta̤nǎ̤ pě. A gǔ shaǎ lû̌mi̤ tôpwa̤ kû̌ tôpwa̤ pě. A gǔ tôkhôsò̌ bò lû̌û tôpwa̤ kû̌ tôpwa̤ pě. Htokhôtô̤̌ piwi̤pèshè jî̌lòhô anǎ̤ tokhlǒ gǔ ô̌lṳ̌htò̌ dû̌wî̤ pě dě a gǔ lô̌ǐplò̤ǐ dû̌wî̤ kòyò pě.

Běcǎ hî̌shěshu asî kû̌, “Ô̌sè̌rè̌ lô̌khô sînǎ̤ nî̌꤮, nolô̌ǐ cû̌nṳ̌ tǎ̤ kòyò kû̌ sînǎ̤ tǎ̤mǎ̤ nî̌꤮.

Pô̤̌nu akhû̌akhî, sî hǒtokhlǒnu bǎbǎ, ô̌tîwî̌tòwò nǎ lô̌khô sînǎ̤ nî̌, ma̤titè̌hî̌dě shěkhǎ bǎ sî gènè̤tǒ̤ tô̤̌ pěnu, Kòyòphû̌khû mî̌ he gǔ hè pě.

“Ma̤pô̤̌nudě ô̌sòklò lô̌khô, ma̤titè̌hî̌dě sîběcǎ gǔ hè bǎtè tôni̤ pěnu sî sî̌ganǎ̤ tô̤̌.

“Bǎbǎkǎlè ta̤hǒo tokhlǒ gǔ htûhtò̌ lṳmṳ̌ni̤ lṳmṳ̌sa, ashěakhǎ bǎkhò̌tè pěnu kòyò sî̌ganǎ̤ tôpwǎ̤꤮ tô̤̌. Mǒkhû̌tanaphû̌ ô̌ dǒ mǒkhû̌ nutokhlǒ bǎbǎ a sî̌ganǎ̤ tô̤̌. Aphû̌khû kû̌ anǎ̤ nutôpwa̤ bǎbǎ, a sî̌ganǎ̤ tô̤̌tô̤̌. A sî̌ganǎ̤ pwǎtǒ̤ hepha tôpwa̤꤮ nô̤̌pwǎ.

Ma̤titèhî̌dě pwa̤jî̌ lòhô pô̤̌ khrǐnu kû̌ pwa̤jî̌ lòhô pô̤̌ piwi̤pèshè sî tokhlǒnu a gǔ ô̌htò̌ dû̌wî̤ pě. Asî gǔ ma̤lṳ̌ jò bǎ kòyò ta̤ dǒ a ǒò̌ kiti̤kaa kòyò nutokhlǒ kû̌ ta̤cô̌klǐcô̌sè tokhlǒ pě. A kè̌ ma̤jò hǒnumî̌ a sǎyṳ lô̌ǐplò̤ǐ kòyò dǒ Cǒmara kaǎ rû̌htò̌ nutokhlǒ hǒ.

Pô̤̌ a htûhtò̌ dǒ Phanṳ̂̌a htukhanu, Kòyòphû̌khû mî̌ he gǔ hèlò̤pě akhanu, a gǔ htûhtò̌ sô̌sô̌kû̌ pô̤̌nu pě. Ma̤titèhî̌dě bǎ shidû̌bǐ hètǒ̤ khôtô̤̌ akhanu, kòǎkòô, khòmò̤̌ lû̌û tǒ̤dǒ bǎ Phanṳ̂̌a nṳ̌ dǒ sǒkhlidû̌kû nutôni̤. Ta̤ glè̌ htûhtò̌ pô̤̌o pěnu, tǒ̤dǒ bǎ shihè dû̌bǐ sikè bò hto asî akhanu, a sî̌ganǎ̤ lô̌khô tocǒ꤮ tô̤̌. Htû̌ Kòyòphû̌khû mî̌ he glè̌ hè pě akhanu, a gǔ htûhtò̌ sô̌sô̌kû̌ pô̤̌nu pě.