Popular Bible Verses from Si-phian 103

Share

Góa ê sim-sîn ah, tio̍h chheng-chàn Siōng Chú! M̄-thang bōe-kì-tit I it-chhè ê un-hūi.

I sià-bián lí lóng-chóng ê chōe, i-hó lí it-chhè ê pīⁿ. I kiù lí thoat-lī sí-bông ê hām-khiⁿ, ēng chû-pi kap jîn-ài chòe hoa-koan sù hō͘ lí. I ēng ta̍k-khoán hó-mi̍h hō͘ lí chi̍t-sì-lâng boán-chiok, hō͘ lí hôe-ho̍k siàu-liân chhin-chhiūⁿ eng-chiáu hiah-ni̍h ióng-chòng.

Góa ê sim-sîn ah, tio̍h chheng-chàn Siōng Chú! Tio̍h ēng choân-pō͘ ê sim-sîn o-ló I ê sèng-miâ!

Lāu-pē án-chóaⁿ thiàⁿ-sioh ka-kī ê kiáⁿ-jî, Siōng Chú mā ōe án-ni thiàⁿ-sioh kèng-ùi I ê lâng.

Tang lī-khui sai ū jōa hn̄g, I hō͘ lán ê chōe-kò lī-khui lán mā hiah-ni̍h hn̄g.

Siōng Chú ū chû-pi, ū jîn-ài, bōe khoài siū-khì, ū hong-sēng ê chû-ài.

I bōe chiàu lán ê chōe-kò chek-hoa̍t lán, mā bōe chiàu lán ê chōe-gia̍t pò-èng lán. Thiⁿ lī-khui tōe ū jōa koân, I ê chû-ài tùi kèng-ùi I ê lâng mā hiah-ni̍h tōa.

Siōng Chú tī thiⁿ-téng siat-li̍p pó-chō; I ê chú-koân phó͘-ki̍p bān-iú.