Popular Bible Verses from 1 Timoti 6

Share

Ia Zozossede Zeso Cristo tauimari deni torraniuarrine daco tirrirarri. Pina madirra ittomeza taide bacco tapouiuarrine damera tarrarissa tarri. Camittehe rriquerreranicca ticarriniuarrine Deo titoui uaua narraride. Narraro camittehe bacco tinaniuarrine daco tirrirarri. Narraroa uima bicani tecomerarizapoza bazima mittemanarraroparride.

Ziniro uemani touini inacomezape uaidirehe onihi onihi inanariza tani. Madirra motapa ziniro touini, tozepetarri touini quenaza Deoza touarrimanazapa poccadeni rrehenirri inebomanarraro. Pouadeniza ocasserehe bacco nezape pina boba imeza rraro canarrarissa narraro. Uaidirehe pouadeni bodiza rraro tozimezape orri orri zanapomanarrari.

Deoza iquerrenezape manaconi bicani icarrini. Naraha narraro manaconipe pina ziniro imenissa, tozepetarrissa nerrerani. Narraroa arri Deotouira damera inezape pocca danirri uemerre uemerrererre naraha narraroza etizeza: —Rrehe, peperri, bica tani −inarraro.

Arrirraro zamaza issonezape izepetarri rrirehe issonarraro. Izoqqueza naqui izepetarri iaccarrarauitoui.

Nazama Zesoza toquerrenarrari zepedeni sseqquiri narrarideni naco arrirraro zamacca tozepetarri carrimana, ziniro carrimana nazapa: —Iape bicaqquiri inani, deni iquerrenani −quena-rrarauiuarrine uati ticanabaqquirro. Pouadenipa uemani carrimanazapa: —Narrarozana imadi-zanaponiuarrine iparrireni −quena-rrarauiuarrine naco uati ticanabaqquirro. Arrana pouadeni zepetarri amazati amossi nani carri tani. Naraha: —Deona ia touacauabaqqui-zanapouiuarrine parrireui −quenauiuarrinena bica tani. Ia bazimape Deocca danirriza imadirraro. Icappira-rreraniuarrine iaza accora tarrari. Nema nezape madirra zepedeni sseqquiri narrarideni Deo Pouazana uatizemanaui orrari nana, onarraro.

Naraha madirra motadenipa zepedeni sseqquiri nauiuarrine touira madimanazapa uaidirehe inanemana tani. Nama quenazapa uimasiri inanemanezape Tocorime-Taminecca maizeheza tozepe toquerrenarrarissa quenarrari. Ssamoqquiri nazapa bica terreranicca touini, oppina tanicca touini, ponimacca touini quenarrari. Nama quenazapa pouadenirrine uaidirehe pouadeniza ssonarirraro. Poccadeni uima naqui tossamorizarraro. Narraridenipa Deocca narrizoueza toquerrenauitoui.

Nazapa pouadeni mari ticanabaqquiza naqui arrima tarri: Madirra zepedeni sseqquiri narraridenipa uima bicanira inanemananiuarrine dameraqquiri nana. Accoraqquiri nauiuarrinepa bodideni narroremanaha madimanana. Nazapa pouadeni carrimanauicca accoraqquiri naza cappiremanarrarideni acco icanabaqqui-manauiuarrine da da iquenauiuarrine, onarraro. Nema inanemanezape pina manaconi imeni memeuarri inauapimanarrarossa narraro. Narrarope nizaranibote pouadeniza torrezape amossi nerreranitoui. Camittehe rriquerreranicca naqui pouadeniza torranitoui.