Popular Bible Verses from 1 Timoti 1

Share

Arrirraro uimape parrissa torrani. Narraro uimaza madirra bazima parrissa quenazapa bica tani. Narraro uimape arrima narraro: Zeso Cristopa arrirraro namiza ccaronarrari, madirra uimasiri tonanemanarrarideni inassiuauabaqquiuiuarrine. Madirra bazimapa uimasiri inanarizemanaraha ouana denima orrine uaidira tani onanarrarode.

Naraha Deo ouaza uati uana taza oua narrizo-rrararrari. Ouape uimasiri sserride orrireraha Zeso Cristopa occa uimasiri mouaraza inauanarronarraro. Occa uimasiri peperri inanarrarope madirra bazimaza pocca touati uanehe auato inanaporraro. Nazapa zotodedenicca: —Rrehe, Cristopa icca uimasiri peperri inananiuarrine nacassa taui −quenauiuarrine. Narrarideni Zeso Cristoza rrehe quenazapa camittehe rriquerreranicca carrimanauitoui.

Rrehe Timoti, tiaza dozo onarrarope Deoza toquerrenarrarideni bazima uatideni cauanerara canarizauiuarrine. Narraro touati uanehepe ibodi bicaqquiri naza, ibodi uima bicani touira ineza Deoza parrissehera rrehe inanissa tezape eti cauanerara canarizaniuarrine, onarraro.

Abi Deopa icca tamine deni torraui. Pouapa rricaquera taui, zoqqueqquera taui, auatoratarraraui. Pouana Deo orrari narrari. Uarrirriraza ettipe Pouaza: —Peperri, Tiape bica tinani! Ticca deni torrehe nema zanapona! −ihizanapo nana, onarraro. Parrissa nema nana.

Naraha Deo pocca zossenirri da inarrarope arra madimanauissa tarraridenicca uimarrine rrerani. Arra uaidiraqquiri narraridenicca uimarrinena pocca zossenirri da inarraro, poccadeni uaidirehe auato inananiuarrine. Arra uaidiraqquiri narraridenipa pina: Deocca zossenirriza iboqquiri narrarideni, uaribodeni didiqquiri narrarideni, Deoza nacasseraqquiri narrarideni, uimasiri inanemanarrarodeni, Deo noppine cappinemana-rrararrarideni, Deo oniza rrarrarridede rarrarideni. Narraro uaidirehe auato taniuarrine Deo pocca zossenirri da inarraro. Madirra ouahadeni naco pina poccadeni abi inanazoqque-manarrarideni, poccadeni ami inanazoqque-manarrarodeni, madirra ouahadeni inanazoqque-manarrarideni. Arra uananehe inanemanarrarodeni, pina pocca amonerre rrereraha touini damera tarrari, ponicca maqqui rrararaha toui damera tarraro. Maqquiderreraha poua tesse zoto arrade damera tarrari, amonerre naqui poni tassani bequede damera tarraro. Narraro uaidirehe bazima auato taniuarrine Deo pocca zossenirri da inarraro. Madirra ouahadeni naco pina madirra ibotibaqquimanaza madirra ouahacca zozosse toquerrenauiuarrine manaconitoui da iqquimabaqqui-manarrarideni, mamaizadedeni, uima cacattemade baccouarri domo uaza uima maizehera uati toquenarrarideni. Rrehe, madirra namarridede rarraricca uimarrine Deo pocca zossenirri da inarraro. Narraridenipa imadinissa taniuarrinecca marinarra bicaniza iboqquiri nazapa uima oppina taniccara ihinanemana narraro.