Popular Bible Verses from ၿျႃၻိက︀်ႉ 12

Share

ၵ︀ုꩫ︀်ꩬ︀ူင︀်ဢ︀ꩫ︀်ႈ ၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ တ︀ၢင︀်ဢ︀ပ︀ႅတ︀်ႉမ︀ႆ︀ႛ ဢ︀ဝ်ႈꩫ︀ိူတ︀်ႉပ︀ူႇဢ︀ွꩫ︀်ꩫ︀ၵ︀ႃ ဢ︀ဝ်ႈၵ︀ၢဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈၵ︀ဝ်တ︀ႅဝ်ꩫ︀ႆ︀ႇ ပ︀ေႇဢ︀ွင︀်ယ︀ဝ်ႇ။ ၵ︀ဝ်ယ︀ႃႇ ꩬ︀င︀်ဝႃႈထုက︀်ꩫ︀ီႈတ︀ႆ︀ၢႈက︀ီး ၵ︀ၢမ︀်တ︀ႆ︀ၢႈက︀ွတ︀်ꩫ︀ꩬ︀ီတ︀မ︀ိူင︀်း ꩭႅမ︀်းဝႆ︀ႇက︀ꩫ︀်ႈဢ︀ူ။

ယ︀ဝ်ႇက︀ီး က︀ၢင︀်ႈꩭၢဝ်မ︀ႆ︀ႛ ꩬ︀ီင︀်လ︀ူင︀်ဢ︀ꩫ︀်ႈလ︀ိူင︀်ႈ ဢ︀ွက︀်မ︀ႃးꩫ︀ႆ︀ႇယ︀ႃႇ “တ︀ၢင︀်းၵ︀ေꩬ︀ေ၊ တ︀ꩫ︀်းၵ︀ူဝ်းင︀ႆ︀း ꩫ︀ႂ်းင︀မ︀်းၸ︀ြႃးပ︀ီꩫ︀်ႈꩡ︀ဝ်ႛꩭဝ်းထိုင︀်မ︀ႃးယ︀ဝ်ႇ။ လ︀ၢက︀်ႉꩫ︀ႆ︀ႇ မ︀ꩫ︀်းꩡ︀ဝ်ႛꩫ︀င︀်ꩡ︀ဝ်ႛꩭူဝ်ၵ︀မ︀်းꩫ︀က︀ꩫ︀်ႈ တ︀ီဢ︀ုပ︀်ႉပ︀ိုင︀်က︀ႃꩫ︀မ︀်။ လ︀ၢက︀်ႉꩫ︀ႆ︀ႇ ꩡ︀ဝ်ႛမ︀ေꩬ︀ိယ︀မ︀ꩫ︀်းꩡ︀ဝ်ႛက︀ေႃႇ ဢ︀ႃꩫ︀ႃမ︀ꩫ︀်းꩡ︀ဝ်ႛပ︀ျႃးမ︀ႃးယ︀ဝ်ႇ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူဝ်ႇဢ︀ꩫ︀်ႈၸ︀ူႛယ︀ုမ︀်ယ︀မ︀်ႈꩫ︀ႆ︀ႇၵ︀ဝ်မ︀ႆ︀ႛ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ိုꩫ︀်းꩰဝꩫ︀်းꩰတ︀ၢင︀်ဢ︀ပ︀ႅတ︀်ႉꩫ︀ႆ︀ႇမ︀ႆ︀ႛ င︀ႆ︀ႚယ︀ႃႇ လ︀ုက︀်ႉက︀ၢင︀်ႈꩭၢဝ်မ︀ႆ︀ႛ ပ︀ိုဝ်တ︀ူက︀်ၵ︀ွတ︀်ယ︀ဝ်ႇ။

ꩫ︀က︀ႃးဢ︀မ︀ႂ်းယ︀ႃႇ ဢ︀ꩫ︀်ႈꩭွင︀်ႇဝႃႈင︀ူးမ︀ိူဝ်ႈꩫ︀ꩫ︀်ႇꩫ︀ꩫ︀ႆ︀ႇꩫ︀မ︀်။ မ︀ꩫ︀်းမ︀ႆ︀ႛၵ︀ုꩫ︀်ꩬ︀ူင︀် ꩫ︀က︀ေႃႇꩭွင︀်ႇဢ︀ူ။ ၸ︀ူႛၸ︀ႅက︀်ႉၸ︀ၢင︀်းꩫ︀က︀ေႃႇꩭွင︀်ႇဢ︀ူ။ မ︀ꩫ︀်းယ︀ႃႇ ဢ︀ꩫ︀်ႈက︀ူꩫ︀်းက︀ူႈက︀ူဝ်ႇမ︀ႆ︀ႛ က︀ဝ်းဢ︀ဝ်ႈဝၢင︀်တ︀ၢင︀်းꩫ︀ႆ︀ႇꩫ︀မ︀်။ မ︀ꩫ︀်းင︀ႆ︀း ၵ︀ုꩫ︀်ꩬ︀ၢင︀်ꩭႆ︀ၢႇမ︀ꩫ︀်းတ︀င︀်းမ︀ိူင︀်းမ︀ႆ︀ႛ ၵ︀ျႃးတ︀ူက︀်လ︀င︀်ꩫ︀ိꩫ︀်ႈၵ︀ွတ︀်ဢ︀ူ။

င︀ႆ︀းꩫ︀ႆ︀ႇꩬ︀ီ က︀ၢင︀်ႈꩭၢဝ်ꩫ︀ၵ︀ႃ ဢ︀ꩫ︀်ႈက︀ႃႈꩡ︀ိုဝ်ႈက︀ၢင︀်ႈꩭၢဝ်မ︀ႆ︀ႛဢ︀ူꩫ︀ႆ︀ႇၵ︀ဝ် ꩡ︀ူမ︀်းက︀ꩫ︀်ႈတ︀ႃႉ။ ꩭလ︀ိုဝ်ꩫ︀က︀ေႃႇ ꩡ︀ႃႇလ︀င︀်ꩫ︀ိꩫ︀်ႈꩫ︀ၵ︀ႃပ︀ၢင︀်လ︀ႆ︀ၢယ︀ႃႇ ဢ︀မ︀ၢင︀်က︀လ︀ႃဢ︀ꩫ︀်ႈ ၵ︀ိူင︀်ႈꩫ︀ီႈက︀ူဝ်ႈလ︀ူင︀်ꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ုꩫ︀်ꩬ︀ူင︀်မ︀ႆ︀ႛ တ︀ီႈဢ︀ꩫ︀်ႈꩬ︀ူဢ︀ူမ︀ႆ︀ႛ ပ︀ိုဝ်တ︀ူက︀်ၵ︀ွတ︀်ယ︀ဝ်ႇ။ မ︀ꩫ︀်းယ︀ႃႇ ယ︀ၢမ︀်းဢ︀ꩫ︀်ႈမ︀ꩫ︀်းဝႃႈဢ︀ူꩫ︀ႆ︀ႇ က︀ိုမ︀်ႇလ︀ိူင︀်ႈꩫ︀ႆ︀ၢႈက︀ိူတ︀်ꩫ︀ႆ︀ႇꩬ︀ီ တ︀ေႃးꩬ︀ႃးလ︀ူင︀်ꩫ︀မ︀်” ꩫ︀ဝꩫ︀်ႇ။

ယ︀ဝ်ႇက︀ီး က︀ၢင︀်ႈꩭၢဝ်မ︀ႆ︀ႛ ပ︀ီꩫ︀်ႈꩬ︀ိူက︀်ꩬ︀ီ ၵ︀ုꩫ︀်ꩬ︀ၢင︀်လ︀ူင︀် မ︀ိက︀်ၵ︀ေလ︀ꩫ︀ၵ︀ႃ ၵ︀ုꩫ︀်ꩬ︀ၢင︀်မ︀ꩫ︀်းၵ︀ဝ် တ︀င︀်းꩫ︀က︀ႃးꩫ︀ၵ︀ႃ ၵ︀ုꩫ︀်ꩬ︀ၢင︀်မ︀ꩫ︀်းၵ︀ဝ်တ︀ိက︀်ꩬ︀ိူက︀်က︀ꩫ︀်ႈဢ︀ူ။

ꩫ︀ႆ︀ႇမ︀ႆ︀ႛ ꩫ︀က︀ႃးꩫ︀ႆ︀ႇ ၸ︀ူႛယ︀ိင︀်းဢ︀မ︀ႂ်းမ︀ႆ︀ႛ ဢ︀ၢꩫ︀်တ︀ၢꩫ︀်တ︀ေႃးꩬ︀ႃးင︀ႆ︀းꩬ︀ီ ၵ︀ိူဝ်းၸ︀ူႛယ︀ိင︀်းဢ︀မ︀ႂ်းဢ︀ꩫ︀်ႈက︀ိူတ︀် ဢ︀ꩫ︀်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ထွမ︀်ꩡ︀ွမ︀်းꩬ︀ီ ꩬ︀မ︀်မ︀ႃတ︀ြႃးဢ︀ꩫ︀်ႈꩡ︀ဝ်ႛယ︀ေꩬ︀ုပ︀ုတ︀်ပ︀ျႃးဝႆ︀ႇမ︀ႆ︀ႛ ꩬ︀ႅတ︀်ႉꩡ︀ႃယ︀င︀်းꩫ︀ႆ︀ႇၵ︀ဝ်မ︀ႆ︀ႛ တ︀ိက︀်ꩬ︀ိူက︀်က︀ွတ︀်ꩫ︀ꩬ︀ီ ꩭိမ︀်းꩫ︀မ︀်ႇပ︀ၢင︀်လ︀ႆ︀ၢမ︀ႆ︀ႛ က︀ႃꩬ︀ဝ်းဢ︀ူ။

ယ︀ဝ်ႇက︀ီး က︀ꩫ︀်ႛꩫ︀ိူဝ်က︀ၢင︀်ႈၸ︀ႃႇမ︀ႆ︀ႛ ဢ︀ꩫ︀်ႈလ︀ၢက︀်လ︀ႆ︀ၢးလ︀ူင︀် ဢ︀ꩫ︀်ႈလ︀ိူင︀်ႈပ︀ီꩫ︀်ႈမ︀ႃးဢ︀ူ။ ၸ︀ူႛယ︀ိင︀်းက︀ူဝ်ႇလ︀ိူင︀်ႈ ဢ︀ꩫ︀်ႈက︀ၢင︀်ႈဝꩫ︀်းꩫ︀ုင︀်ႈဝႆ︀ႇꩫ︀ႆ︀ႇ ဢ︀ွက︀်မ︀ႃးꩬ︀ီ တ︀ိꩫ︀်ႈမ︀ꩫ︀်းယ︀ႃႇ ပ︀ူꩫ︀ိူꩫ︀်ႈမ︀ႆ︀ႛယ︀ီပ︀်ဝႆ︀ႇင︀ႆ︀း က︀ုမ︀်ꩭူဝ်မ︀ꩫ︀်းမ︀ႆ︀ႛယ︀ႃႇ ပ︀ွင︀်းဢ︀ꩫ︀်ႈꩫ︀ၢဝ်ႈꩬ︀ိပ︀်ꩬ︀ွင︀်ဢ︀ꩫ︀်ႈ ယ︀င︀်းꩫ︀ႆ︀ႇꩬ︀ုပ︀်ဝႆ︀ႇဢ︀ူ။ ၸ︀ူႛယ︀ိင︀်းဢ︀မ︀ႂ်းယ︀ႃႇ တ︀ီယ︀င︀်းလ︀ုက︀်ႉꩡ︀မ︀်ႈꩫ︀ႆ︀ႇꩬ︀ီ တ︀ွင︀်ႇဢ︀ႂ်ၸ︀ႅဝ်ꩬ︀ီ ဢ︀ိဝ်ဢ︀ူ။

ၸ︀ူႛယ︀ိင︀်းဢ︀မ︀ႂ်းယ︀ႃႇ လ︀ုက︀်ႉꩡ︀ႆ︀ၢးဢ︀ꩫ︀်ႈ က︀ူꩫ︀်းက︀ူႈၸ︀ꩫ︀်းꩰ တ︀င︀်းက︀မ︀်ၸ︀ႃမ︀ႆ︀ႛ ဢ︀ဝ်ႈꩭွက︀်လ︀ီက︀် တ︀ီဢ︀ုပ︀်ႉပ︀ိုင︀်တ︀ီမ︀်ႈꩰꩫ︀ႆ︀ႇ ၸ︀ႃးယ︀င︀်းမ︀ႃးဢ︀ူ။ ꩫ︀ႆ︀ႇမ︀ႆ︀ႛ ၵ︀ုꩫ︀်ꩬ︀ၢင︀်ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ လ︀ုက︀်ႉꩡ︀ႆ︀ၢးဢ︀မ︀ႂ်းမ︀ႆ︀ႛ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛꩫ︀ၵ︀ႃ ပ︀လ︀ၢင︀်မ︀ꩫ︀်းꩡ︀ဝ်ႛမ︀ႆ︀ႛ ဢ︀ုမ︀်ႛက︀ႃဢ︀ူ။ ၸ︀ူႛယ︀ိင︀်းဢ︀မ︀ႂ်းယ︀ႃႇ ပ︀ႃထိူꩫ︀်ꩭႅင︀်ႛတ︀ီႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩡ︀ႃႇမ︀ꩫ︀်းꩭႅမ︀်းဝႆ︀ႇမ︀ႆ︀ႛ ပ︀ႆ︀ၢႈက︀ႃဢ︀ူ။ တ︀ီႈဢ︀မ︀ႂ်းမ︀ႆ︀ႛ ၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ် မ︀ꩫ︀်းမ︀ႆ︀ႛ ႑႒႖႐ ဝꩫ︀်းတ︀ၢင︀်ႈꩰတ︀ီမ︀ိုင︀်ႇꩭႂ်ႛꩫ︀မ︀်။

ꩫ︀ႆ︀ႇမ︀ႆ︀ႛ က︀ၢင︀်ႈၸ︀ႃႇမ︀ႆ︀ႛ ဢ︀ꩫ︀်ႈလ︀ၢက︀်လ︀ႆ︀ၢးလ︀ူင︀်တ︀ၢင︀်ဢ︀ꩫ︀်ႈ ဢ︀ွက︀်မ︀ႃးဢ︀ိက︀်ဢ︀ူ။ ꩫ︀က︀ႃးꩫ︀ႅင︀်ႈလ︀ူင︀် ဢ︀ꩫ︀်ႈက︀ုမ︀်ꩭူဝ်ꩡ︀ီတ︀်ဢ︀ꩫ︀်ႈယ︀င︀်းꩫ︀ႆ︀ႇ တ︀ူဝ်ႈလ︀ိူင︀်ႈ ဢ︀ွက︀်မ︀ႃးဢ︀ူ။ ꩫ︀က︀ႃးဢ︀မ︀ႂ်းမ︀ႆ︀ႛ ၵ︀ဝ်ꩬ︀ိပ︀်ဢ︀ꩫ︀်ႈယ︀င︀်းင︀ႆ︀း က︀ုမ︀်ꩭူဝ်မ︀ꩫ︀်းက︀ူႈဢ︀ꩫ︀်ႈမ︀ႆ︀ႛ ပ︀ွင︀်းဢ︀ေႈဢ︀ꩫ︀်ႈꩰꩬ︀ုပ︀်ဝႆ︀ႇဢ︀ူ။ ꩫ︀က︀ႃးဢ︀မ︀ႂ်းယ︀ႃႇ ꩫ︀ၢဝ်ႈꩬ︀ၢမ︀်ꩡ︀ႃႇꩡ︀ႃႇလ︀ိူင︀်ႈမ︀ႆ︀ႛ ဢ︀ဝ်ႈꩭၢင︀်မ︀ꩫ︀်း ꩡ︀ꩫ︀်ႈတ︀ူက︀်လ︀င︀်ꩫ︀ိꩫ︀်ႈၵ︀ွတ︀်ဢ︀ူ။ မ︀ိူဝ်ႈၸ︀ူႛယ︀ိင︀်းဢ︀မ︀ႂ်း တ︀ီယ︀င︀်းလ︀ုက︀်ႉꩫ︀ႆ︀ႇ ꩫ︀က︀ႃးယ︀ႃႇ မ︀ွင︀်းလ︀ၵ︀ႃယ︀င︀်းမ︀ႃးယ︀ႃႇ လ︀ၵ︀ႃဢ︀မ︀ႂ်းမ︀ႆ︀ႛက︀ိꩫ︀်ႈက︀ွတ︀်ꩫ︀ꩬ︀ီ က︀ꩫ︀်ႛꩫ︀ႃႛမ︀ꩫ︀်းမ︀ႆ︀ႛ ꩬ︀ဝ်းဢ︀ူဢ︀ူ။

ၸ︀ူႛယ︀ိင︀်းဢ︀မ︀ႂ်းယ︀ႃႇ ꩭႂ်ႛပ︀ူဝ်းမ︀ꩫ︀်း ထိူꩫ︀်ꩭႅင︀်ႛမ︀ႆ︀ႛ ပ︀ႆ︀ၢႈက︀ႃꩫ︀ႆ︀ႛꩫ︀ႆ︀ႇ ပ︀ိက︀်ယ︀ႃႈꩭူင︀်ႇလ︀ူင︀် ꩬ︀ွင︀်ဢ︀ꩫ︀်ႈꩫ︀ႆ︀ႛဝႆ︀ႇဢ︀ူ။ ထိူꩫ︀်ꩭႅင︀်ႛဢ︀မ︀ႂ်းယ︀ႃႇ တ︀ီႈဢ︀ꩫ︀်ႈမ︀ꩫ︀်းမ︀ႆ︀ႛ ꩭႂ်ႛပ︀ူဝ်းꩫ︀က︀ႃး ꩭီတ︀်ၸ︀ေးမ︀ဝ်ꩫ︀ႆ︀ႛꩫ︀ႆ︀ႇ ၵ︀ုꩫ︀်ꩬ︀ၢင︀်ၸ︀ြႃးပ︀ီꩫ︀်ႈꩡ︀ဝ်ႛၵ︀ဝ် ꩬ︀ၢမ︀်ပ︀ီႈပ︀ႆ︀ၢႈꩭူက︀်ꩫ︀ိူꩫ︀်ႈ တ︀ီမ︀ိုင︀်ႇꩭႂ်ႛꩫ︀ႆ︀ႇꩫ︀မ︀်။ ၸ︀ူႛယ︀ိင︀်းဢ︀မ︀ႂ်း ပ︀ႆ︀ၢႈက︀ႃက︀ီး ꩫ︀က︀ႃးဢ︀မ︀ႂ်းယ︀ႃႇ ꩭႂ်ႛပ︀ူဝ်းမ︀ꩫ︀်းလ︀ႆ︀ꩫ︀မ︀်ႇက︀ႃꩫ︀ႆ︀ႇ ꩫ︀င︀်ꩫ︀မ︀်ႇလ︀ူင︀်လ︀ွင︀်းမ︀ႃးꩫ︀က︀ꩫ︀်ႈ လ︀ုက︀်ႉꩬ︀ူပ︀်မ︀ႆ︀ႛ ꩫ︀မ︀်ႇဢ︀ဝ်ႈပ︀င︀်းဢ︀ွက︀်ꩡ︀ွမ︀်းဢ︀ူ။ ꩫ︀ႆ︀ႇꩫ︀က︀ေႃႇ လ︀င︀်ꩫ︀ိꩫ︀်ႈယ︀ႃႇ ၸ︀ူႛယ︀ိင︀်းမ︀ႆ︀ႛꩡ︀ွႆ︀ႈဢ︀ူ။ ꩫ︀ိꩫ︀်ႈင︀ၢက︀်ႉမ︀ႃးꩬ︀ီ ꩫ︀မ︀်ႇဢ︀ꩫ︀်ႈလ︀ုက︀်ႉꩬ︀ူပ︀်ꩫ︀က︀ႃးမ︀ႆ︀ႛ ပ︀င︀်းမ︀ႃးမ︀ႆ︀ႛ ဢ︀ုꩫ︀်ႈၵ︀ွတ︀်ဢ︀ူ။