Popular Bible Verses from ꩭေပ︀ရ︀ူး 9

Share

ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩡ︀ဝ်ႛၵ︀ရ︀ီတ︀်က︀ေႃႇ ꩭႂ်ႛပ︀ူဝ်းဢ︀ပ︀ႅတ︀်ႉက︀ူꩫ︀်းဢ︀ၢꩫ︀်တ︀ၢꩫ︀်မ︀ႆ︀ႛ ဢ︀ဝ်ႈၵ︀ွတ︀်ꩫ︀ႆ︀ႇ ဢ︀ဝ်ႈတ︀ူဝ်ႈမ︀ꩫ︀်းၸ︀ူႛꩡ︀ဝ်ႛ ပ︀ၢꩫ︀်ႈလ︀ိူင︀်ႈꩫ︀ႆ︀ၢႈ ပ︀ုက︀်ႉꩡ︀ူဝ်ယ︀ဝ်ႇက︀ီး တ︀င︀်းဢ︀ပ︀ႅတ︀်ႉမ︀ဝ်ꩡ︀ၢပ︀်ႉလ︀ႅင︀်ꩬ︀ီ က︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ တ︀ႂ်းထႃႛꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛပ︀ူဝ်းꩫ︀ႆ︀ႛၵ︀ေꩬ︀ေꩫ︀ႆ︀ႇ တ︀ီပ︀ွက︀်ႉမ︀ႃးꩫ︀မ︀်။

ꩫ︀ိူတ︀်ႉꩡ︀ဝ်ႛၵ︀ရ︀ီတ︀်ယ︀ႃႇ ၵ︀ႆ︀ႇမ︀ဝ်က︀ႃးပ︀ီꩫ︀်ႈပ︀ေႇဢ︀ူ။ မ︀ꩫ︀်းꩡ︀ဝ်ႛယ︀ႃႇ ဢ︀ဝ်ႈတ︀ူဝ်ႈမ︀ꩫ︀်းၸ︀ူႛꩡ︀ဝ်ႛ ꩭီတ︀်ၵ︀ႅက︀်ဢ︀ꩫ︀်ႈတ︀ီမ︀်ႈက︀ုမ︀်ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ဝ်ႈၵ︀ွꩫ︀်ထႃဝရ︀ ပ︀ုက︀်ႉꩡ︀ူဝ်မ︀ႃးယ︀ဝ်ႇ။ ꩫ︀ိူတ︀်ႉမ︀ꩫ︀်းꩡ︀ဝ်ႛယ︀ႃႇ ꩭႂ်ႛပ︀ူဝ်းꩭဝ်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈဢ︀ꩬ︀ၢက︀်ႉꩫ︀ိပ︀်မ︀ႆ︀ႛ မ︀ိုင︀်ႇꩫ︀ႆ︀ႛꩫ︀ႆ︀ႇ ꩡ︀ႂ်ႈၵ︀ွꩫ︀်ꩭဝ်းမ︀ႆ︀ႛ တ︀ၢင︀်းက︀ႅင︀်း ဢ︀ꩫ︀်ႈဢ︀က︀ိဝ်းမ︀ဝ်ယ︀င︀်းꩫ︀ႆ︀ႇၵ︀ဝ် ꩬ︀ုက︀်ႉဢ︀ဝ်ႈတ︀ွင︀်ꩭႂ်ႛဢ︀ူ။

က︀ူꩫ︀်းꩫ︀ꩫ︀ႆ︀ႇ ပ︀ၢꩫ︀်ႈလ︀ိူင︀်ႈꩫ︀ၢႆ︀ႈꩫ︀မ︀်ဝႃႈတ︀ႆ︀ၢႈꩫ︀ႆ︀ႇ။ ယ︀ဝ်ႇက︀ီး ဝႃႈၵ︀ၢမ︀်ပ︀ႅတ︀်ႉတ︀ြႃးꩫ︀မ︀်။

ဢ︀ꩫ︀်ႈတ︀ေႇတ︀ေႇက︀ေႃႇ တ︀င︀်းလ︀ုင︀်တ︀င︀်းမ︀ိူင︀်းမ︀ႆ︀ႛꩫ︀က︀ꩫ︀်ႈ ꩡ︀ွမ︀်းက︀ျမ︀်းꩬ︀ိꩫ︀်ꩬ︀ီ ဢ︀ဝ်ႈꩫ︀ိူတ︀်ႉဝႃႈꩬ︀ုက︀်ႉဢ︀ဝ်ႈတ︀ွင︀်ဢ︀ူ။ ဢ︀ပ︀ႅတ︀်ႉꩫ︀ꩫ︀ႆ︀ႇ ꩫ︀ိူတ︀်ႉလ︀ူဝ်က︀ီးꩬ︀ိုင︀် ပ︀ွႆ︀လ︀ွတ︀်ႉꩭႂ်ႛꩫ︀ႆ︀ႛꩫ︀မ︀်။

င︀ႆ︀းꩫ︀ႆ︀ႇꩬ︀ီ ꩡ︀ဝ်ႛၵ︀ရ︀ီတ︀်ယ︀ႃႇ ꩡ︀ႃႇၵ︀ၢမ︀်းၵ︀တ︀်ႉမ︀ႂ် ပ︀ီꩫ︀်ႈၸ︀ူႛက︀ၢပ︀်က︀ၢႆ︀ဢ︀ဝ်ႈꩫ︀ီႈꩭႂ်ႛꩫ︀မ︀်။ ၵ︀ၢမ︀်းၵ︀တ︀်ႉမ︀ႂ်ဢ︀မ︀ႂ်းယ︀ႃႇ ꩡ︀ႃႇꩭၢင︀်းက︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩭွင︀်ႇဝႆ︀ႇꩫ︀ႆ︀ႇၵ︀ဝ် ဢ︀က︀ိဝ်းထႃဝရ︀ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ က︀တ︀ိꩭႂ်ႛဝႆ︀ႇꩫ︀ႆ︀ႇ ꩫ︀ႆ︀ႛꩭၢပ︀်ႉက︀ꩫ︀်ႈꩫ︀ႆ︀ႇꩫ︀မ︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩡ︀ဝ်ႛၵ︀ရ︀ီတ︀်ယ︀ႃႇ ꩭႂ်ႛပ︀ူဝ်းꩭဝ်း လ︀ုက︀်ႉဢ︀ပ︀ႅတ︀်ႉ ဢ︀ꩫ︀်ႈၵ︀ၢမ︀်းၵ︀တ︀်ႉက︀ဝ်မ︀ႆ︀ႛ ၸ︀ိတ︀်မ︀ႃးꩫ︀ႆ︀ႇၵ︀ဝ်မ︀ႆ︀ႛလ︀ွတ︀်ႉꩫ︀ႆ︀ႇ ၵ︀ၢမ︀်တ︀ႆ︀ၢႈꩭႂ်ႛမ︀ႃးယ︀ဝ်ႇ။