Popular Bible Verses from ꩭေပ︀ရ︀ူး 11

Share

တ︀ၢင︀်းယ︀ုမ︀်ယ︀မ︀်ႈꩫ︀ꩫ︀ႆ︀ႇယ︀ႃႇ ဢ︀ꩫ︀်ႈꩭဝ်းတ︀ႂ်းထႃႛꩫ︀ႆ︀ႇ တ︀ီပ︀ီꩫ︀်ႈမ︀ႃးတ︀ေႇတ︀ေႇꩫ︀မ︀်ꩫ︀ꩬ︀ီ တ︀မ︀်းꩡ︀ႂ်ႈ၊ ဢ︀ꩫ︀်ႈꩭဝ်းꩭꩫ︀်မ︀ဝ်ꩫ︀ႆ︀ႛꩫ︀ႆ︀ႇၵ︀ဝ်မ︀ႆ︀ႛ ယ︀င︀်းတ︀ေႇတ︀ေႇဢ︀ူꩫ︀ꩬ︀ီ ဢ︀က︀မ︀်ထက︀်ꩰꩫ︀ႆ︀ႇꩫ︀မ︀်။ က︀ူꩫ︀်းမ︀ိူဝ်ႈꩫ︀ꩫ︀်ႇꩫ︀ႆ︀ႇၵ︀ဝ်ယ︀ႃႇ လ︀ႆ︀ၢးပ︀ိူဝ်ႈၵ︀ဝ် ꩫ︀င︀်င︀ႆ︀းꩫ︀က︀ꩫ︀်ႈ ယ︀ုမ︀်ယ︀မ︀်ႈꩫ︀ႆ︀ႇꩬ︀ီ ၵ︀ဝ်မ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ယ︀ွင︀်ႛမ︀ႃးဢ︀ူ။

တ︀ၢင︀်းယ︀ုမ︀်ယ︀မ︀်ႈမ︀ဝ်ယ︀င︀်းက︀ီး ၸ︀ႂ်က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ဝ်ႈမ︀ႃးꩡ︀ႂ်ႈꩵ︀ႈꩫ︀ႆ︀ႛ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ႂ်ꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ႃးက︀ီး ၸ︀ြႃးပ︀ီꩫ︀်ႈꩡ︀ဝ်ႛယ︀င︀်းဢ︀ူꩫ︀ꩫ︀ႆ︀ႇလ︀ိူင︀်ႈ က︀ူဝ်ႇဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ တ︀င︀်းꩡ︀ႂ်ႈတ︀င︀်းၵ︀ူဝ်းၵ︀ႃမ︀ႆ︀ႛ မ︀ꩫ︀်းꩡ︀ဝ်ႛဢ︀က︀ိဝ်းပ︀ူင︀်ႈꩭႂ်ႛဢ︀ူꩫ︀ꩫ︀ႆ︀ႇလ︀ိူင︀်ႈ ဝႃႈယ︀ုမ︀်ယ︀မ︀်ႈꩫ︀မ︀်။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ တ︀မ︀်တ︀ိူင︀်းတ︀င︀်းလ︀ုက︀်ႉꩫ︀ႆ︀ႇယ︀ႃႇ ဢ︀ဝ်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩭဝ်းꩭꩫ︀်မ︀ဝ်ꩫ︀ႆ︀ႛꩫ︀ႆ︀ႇꩬ︀ိုင︀် ၸ︀ၢꩫ︀်ꩬ︀ၢင︀်းဝႆ︀ႇꩬ︀ီ ဢ︀ဝ်ႈဢ︀ꩫ︀်ႈꩭဝ်းꩭꩫ︀်ယ︀ဝ်ႇမ︀ႆ︀ႛ ပ︀ီꩫ︀်ႈမ︀ႃးꩵ︀ႈꩡ︀ႂ်ႈꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ဢ︀ႃပ︀ြႃꩭၢမ︀်က︀ေႃႇ ဢ︀မ︀ႆ︀ႚဝႃႈက︀ႃꩫ︀ꩫ︀ႆ︀ႇမ︀ဝ်တ︀ွင︀်းꩫ︀က︀ေႃႇ ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛထွမ︀်င︀ႆ︀း လ︀ုက︀်ႉꩭိူꩫ︀်းမ︀ႆ︀ႛဢ︀ွက︀်ꩬ︀ီ မ︀ိူင︀်းဢ︀ꩫ︀်ႈမ︀ꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ တ︀ီꩭႂ်ႛဢ︀မ︀ွေမ︀ႆ︀ႛ က︀ႃမ︀ႃးဢ︀ူ။ လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ မ︀ိူင︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭႂ်ႛက︀တ︀ိဝႆ︀ႇဢ︀မ︀ႂ်းမ︀ႆ︀ႛ ꩭီတ︀်ပ︀ီႈꩫ︀ွင︀်ႇတ︀ၢင︀်မ︀ိူင︀်းꩬ︀ီ ꩬ︀ုမ︀်ႇꩫ︀ႆ︀ႇၵ︀ဝ်မ︀ႆ︀ႛ ဢ︀ူမ︀ႃးဢ︀ူ။ ꩫ︀င︀်မ︀ꩫ︀်းꩫ︀က︀ꩫ︀်ႈ ဢ︀ေꩬ︀က︀်ꩫ︀ၵ︀ႃ ယ︀ႃက︀ုက︀ေႃႇ က︀တ︀ိၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႛꩬ︀ီ ဢ︀မ︀ႂ်းမ︀ႆ︀ႛၵ︀ဝ်ꩭူမ︀်ႈဢ︀ူမ︀ႃးဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ꩫ︀ေႃဢ︀ေးမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ လ︀ွင︀်ႈဢ︀ꩫ︀်ႈက︀ꩫ︀်ႛꩫ︀ႃႛမ︀ႆ︀ႛတ︀ီပ︀ီꩫ︀်ႈ ဢ︀ꩫ︀်ႈမ︀ဝ်ပ︀ႆ︀ꩭွꩫ︀်ꩭꩫ︀်ꩫ︀ႆ︀ႇၵ︀ဝ် ပ︀ုတ︀်ပ︀ျႃးꩭႂ်ႛမ︀ႃးꩫ︀မ︀်။ မ︀ꩫ︀်းက︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛက︀ူဝ်ႈယ︀မ︀်ႈင︀ႆ︀း ꩬ︀ၢင︀်ႈၸ︀ူဝ်းလ︀ူင︀်ပ︀ူက︀်မ︀ႃးꩬ︀ီ ၵ︀ဝ်ပ︀ူဝ်ႈမ︀ေႈလ︀ုက︀်ႉ ꩫ︀ႆ︀ႛလ︀ွတ︀်ႉတ︀ၢင︀်းတ︀ႆ︀ၢႈမ︀ႃးဢ︀ူ။ လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈမ︀ꩫ︀်းꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛ မ︀ꩫ︀်းမ︀ႆ︀ႛ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်င︀ႆ︀း တ︀ၢင︀်းယ︀ုမ︀်ယ︀မ︀်ႈမ︀ꩫ︀်းꩫ︀ႆ︀ႇ ဢ︀ပ︀ႅတ︀်ႉက︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈပ︀ႅꩫ︀်ႈမ︀ႃးဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ဢ︀ေꩫ︀ွင︀်ယ︀ႃႇ တ︀ၢင︀်းတ︀ႆ︀ၢႈမ︀ႆ︀ႛ မ︀ဝ်ꩭူပ︀်ႉꩬ︀ီ မ︀ိူင︀်းက︀ၢင︀်ႈꩭၢဝ်မ︀ႆ︀ႛ ꩫ︀ႆ︀ႛထိုင︀်က︀ႃꩫ︀မ︀်။ မ︀ꩫ︀်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ꩭွင︀်ႇက︀ႃꩫ︀ႆ︀ႇꩬ︀ီ ၸ︀ႂ်က︀ေႃႇမ︀ꩫ︀်းမ︀ႆ︀ႛꩵ︀ႈꩭꩫ︀်ယ︀ဝ်ႇ။ မ︀ိူဝ်ႈမ︀ꩫ︀်းမ︀ႆ︀ႛ ꩵ︀ႈပ︀ႆ︀ꩭွင︀်ႇက︀ႃꩫ︀ႆ︀ႇ မ︀ꩫ︀်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ မ︀ႃးꩡ︀ႂ်ႈမ︀ႃးဢ︀ူꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛ ဝႃႈဝႆ︀ႇဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ဢ︀ႃၿေလ︀ယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ႅက︀်ဢ︀ꩫ︀်ႈက︀ႃဢ︀ိꩫ︀ပ︀ုက︀်ႉꩡ︀ူဝ်မ︀ႆ︀ႛ မ︀ႅတ︀်ႉꩬ︀ႃꩫ︀ႆ︀ႇ ပ︀ုက︀်ႉꩡ︀ူဝ်မ︀ႃးဢ︀ူ။ င︀ႆ︀းꩬ︀ီ မ︀ꩫ︀်းမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ မ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်င︀ႆ︀း ၵ︀ႅက︀်မ︀ꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ꩭၢပ︀်ႉမ︀ႃးဢ︀ူ။ မ︀ꩫ︀်းယ︀ႃႇ တ︀ႆ︀ၢႈက︀ႃꩫ︀က︀ေႃႇ လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈမ︀ꩫ︀်းꩬ︀ီ င︀ႆ︀ႚက︀ေႃႇ ꩭဝ်းမ︀ႆ︀ႛၵ︀ၢမ︀်းတ︀ၢꩫ︀်ႛဢ︀ူꩫ︀မ︀်။

ꩫ︀င︀်ꩫ︀ႆ︀ႇꩫ︀က︀ꩫ︀်ႈ ၸ︀ူႛမ︀ေးမ︀ꩫ︀်း ꩬ︀ႃရ︀ႃက︀ေႃႇ မ︀ꩫ︀်ꩫ︀ႆ︀ႇꩬ︀ေႇမ︀ဝ်က︀ႃး ထဝ်ႛပ︀ူꩫ︀်ႇက︀ႃၵ︀ႂ်ႈလ︀ႂ်ႈꩫ︀က︀ေႃႇ ꩡ︀ဝ်ႛဢ︀ꩫ︀်ႈမ︀ꩫ︀်းမ︀ႆ︀ႛ က︀တ︀ိꩭႂ်ႛဝႆ︀ႇꩫ︀ႆ︀ႇ ꩬ︀ႅတ︀်ႉꩡ︀ႃယ︀င︀်းဢ︀ူꩫ︀ꩫ︀ႆ︀ႇ မ︀ꩫ︀်းယ︀ုမ︀်ယ︀မ︀်ႈꩫ︀ႆ︀ႇꩬ︀ီ လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ လ︀ုက︀်ႉꩡ︀ႆ︀ၢးက︀ူဝ်ႇလ︀ိူင︀်ႈယ︀င︀်းမ︀ႃးဢ︀ူ။

က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ႃပ︀ြႃꩭၢမ︀်ꩭီတ︀်င︀ႆ︀းꩫ︀ႆ︀ႇယ︀ႃႇ ဝီင︀်းဢ︀ꩫ︀်ႈထႃဝရ︀မ︀ꩫ︀်ႛတ︀ိူင︀်ႈ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩬ︀ၢင︀်မ︀ူဝ်ꩬ︀ီတ︀င︀်ႛတ︀ေမ︀ႆ︀ႛ ထႃႛꩬ︀ီꩫ︀မ︀်။

မ︀ေႃꩬ︀ေက︀ေႃႇ ယ︀ႂ်မ︀ႃးက︀ီး လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ဢ︀ꩫ︀်ႈꩭွင︀်ႇလ︀ုက︀်ႉꩡ︀ႆ︀ၢး ၸ︀ူႛလ︀ုက︀်ႉꩬ︀ၢဝ်ꩡ︀ဝ်ႛꩭူဝ်ၵ︀မ︀်းမ︀ႆ︀ႛ ပ︀ႆ︀ၵ︀ွတ︀်င︀ႆ︀း တ︀ႃႇက︀ိုမ︀်ႇလ︀ိူင︀်ႈ တ︀ီပ︀ိဝ်ꩫ︀ႂ်းဢ︀ပ︀ႅတ︀်ႉယ︀ႃႇ ဢ︀ꩫ︀်ႈတ︀င︀်းက︀ူꩫ︀်းၸ︀ြႃးပ︀ီꩫ︀်ႈꩡ︀ဝ်ႛၵ︀ဝ် ၵ︀ၢမ︀်ၻုက︀်ႉၵ︀မ︀ႆ︀ႛꩬ︀ိုင︀် မ︀ꩫ︀်းလ︀ိူက︀်ႉဢ︀ဝ်ႈမ︀ႃးဢ︀ူ။ မ︀ꩫ︀်းယ︀ႃႇ ꩬ︀ူးမ︀ꩫ︀်းဢ︀ꩫ︀်ႈက︀ꩫ︀်ႛꩫ︀ႃႛမ︀ႆ︀ႛ ယ︀င︀်းꩫ︀ႆ︀ႇမ︀ႆ︀ႛ တ︀ႂ်းဢ︀ူꩫ︀ႆ︀ႇꩬ︀ီ ဢ︀ꩫ︀်ႈꩡ︀ႃႇꩡ︀ဝ်ႛၵ︀ရ︀ီတ︀် ၵ︀ၢမ︀်ၻုက︀်ႉၵ︀ꩫ︀ႆ︀ႇယ︀ႃႇ ꩡ︀ေးꩡ︀ိမ︀်မ︀ိူင︀်းဢ︀ီက︀ျီပ︀်တ︀င︀်းမ︀ိူင︀်းမ︀ႆ︀ႛ မ︀ႅတ︀်ႉꩬ︀ႃဢ︀ူꩫ︀ꩬ︀ီꩭꩫ︀်ဢ︀ူ။ လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ မ︀ꩫ︀်းယ︀ႃႇ ဢ︀ꩫ︀်ႈꩡ︀ဝ်ႛꩭူဝ်ၵ︀မ︀်းတ︀ေႃးꩬ︀ႃးမ︀ႆ︀ႛ မ︀ဝ်က︀ူဝ်ႈꩬ︀ီ လ︀ုက︀်ႉမ︀ိူင︀်းဢ︀ီက︀ျီပ︀်မ︀ႆ︀ႛ ဢ︀ွက︀်က︀ႃင︀ႆ︀း ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈꩭꩫ︀်မ︀ဝ်ꩫ︀ႆ︀ႛမ︀ႆ︀ႛ ꩫ︀ႆ︀ႛꩭꩫ︀်ဢ︀ူꩫ︀က︀ꩫ︀်ႈ က︀ၢပ︀်ꩬ︀ီက︀ႃဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ဢ︀ႃပ︀ြႃꩭၢမ︀်ယ︀ႃႇ မ︀ိူဝ်ႈမ︀ꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛꩡ︀ၢမ︀်းꩫ︀ႆ︀ႇ လ︀ုက︀်ႉမ︀ꩫ︀်းဢ︀ေꩬ︀က︀်မ︀ႆ︀ႛ တ︀ၢင︀်ၵ︀ႅက︀်မ︀ႃးဢ︀ူ။ “လ︀ုက︀်ႉဢ︀ေꩬ︀က︀်မ︀ႆ︀ႛꩫ︀မ︀် ၵ︀ိူဝ်းမ︀ႂ်းတ︀ီပ︀ႃးမ︀ႃးꩫ︀ႆ︀ႇ” ꩫ︀ꩬ︀ီ မ︀ꩫ︀်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ က︀တ︀ိꩭႂ်ႛဝႆ︀ႇမ︀ႃးꩫ︀က︀ေႃႇ မ︀ꩫ︀်းယ︀ႃႇ လ︀ုက︀်ႉꩡ︀ႆ︀ၢးမ︀ꩫ︀်း ဢ︀ꩫ︀်ႈက︀ူဝ်ႇလ︀ိူင︀်ႈꩫ︀ႆ︀ၢႈယ︀င︀်းဢ︀မ︀ႂ်းမ︀ႆ︀ႛ တ︀ၢင︀်ၵ︀ႅက︀်မ︀ႃးဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ မ︀ေႈမ︀ွက︀်ယ︀ႃႛ ရ︀ႃၵ︀ပ︀်က︀ေႃႇ ဢ︀ီတ︀်ꩬ︀ြေး ၸ︀ူႛꩡ︀ွပ︀်ꩡ︀ႂ်းꩫ︀ႆ︀ႇၵ︀ဝ်မ︀ႆ︀ႛ ꩭၢပ︀်ႉတ︀ွꩫ︀်ႛꩫ︀ီႈꩫ︀ီႈ ꩫ︀ႆ︀ႇꩬ︀ီ တ︀င︀်းက︀ူꩫ︀်းဢ︀ꩫ︀်ႈၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛမ︀ဝ်ထွမ︀်ꩫ︀ႆ︀ႇၵ︀ဝ် မ︀ဝ်ꩫ︀ႆ︀ႛတ︀ႆ︀ၢႈက︀ႃꩫ︀မ︀်။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ဢ︀ီတ︀်ꩬ︀ြေးꩫ︀ႆ︀ႇၵ︀ဝ်က︀ေႃႇ ပ︀ၢင︀်လ︀ႆ︀ၢꩫ︀ႅင︀်ႈမ︀ႆ︀ႛ ꩫ︀င︀်ပ︀ၢင︀်ꩭႅင︀်ႛꩫ︀က︀ꩫ︀်ႈ ၸ︀ႆ︀ၢႛပ︀ူꩫ︀်ႇက︀ႃဢ︀ူ။ ꩫ︀ႆ︀ႇꩫ︀က︀ေႃႇ မ︀ိူဝ်ႈက︀ူꩫ︀်းဢ︀ီက︀ျီပ︀်ၵ︀ဝ် ၸ︀ႆ︀ၢႛက︀ႃꩫ︀ႆ︀ႇယ︀ႃႇ တ︀င︀်းလ︀ုင︀်ꩡ︀ူမ︀်ႈꩫ︀မ︀်ႇက︀ႃမ︀ူတ︀်ဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ဢ︀ီတ︀်ꩬ︀ြေးၵ︀ဝ် ဝီင︀်းယ︀ေရ︀ိၵ︀ေႃးမ︀ႆ︀ႛ ꩡ︀ီတ︀်ဝꩫ︀်းပ︀ꩫ︀်ယ︀ဝ်ႇက︀ီး တ︀ႃဝီင︀်းဢ︀မ︀ႂ်းလ︀ူမ︀်ႇက︀ႃဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ မ︀ေႃꩬ︀ေယ︀ႃႇ မ︀ိူဝ်ႈလ︀ုက︀်ႉꩭူဝ်လ︀ႃႈꩫ︀ႆ︀ႇၵ︀ဝ်မ︀ႆ︀ႛ ၵ︀ုꩫ︀်တ︀ႆ︀ၢႈဢ︀ဝ်ႈတ︀ႆ︀ၢႈꩫ︀ႆ︀ႇက︀ေႃႇ ꩭႂ်ႛပ︀ူဝ်းလ︀ုက︀်ႉꩭူဝ်လ︀ႃႈ ဢ︀ီတ︀်ꩬ︀ြေးၵ︀ဝ်မ︀ႆ︀ႛ မ︀ဝ်ပ︀ီꩫ︀်ႈၸ︀ေးꩫ︀ႆ︀ႇ ꩭီတ︀်ပ︀ွႆ︀းပ︀ူꩫ︀်ႇလ︀ွတ︀်ႉꩬ︀ီ ꩬ︀ဝ်တ︀ၢင︀်းပ︀တ︀ူႈꩫ︀ႆ︀ႇၵ︀ဝ်မ︀ႆ︀ႛ ꩫ︀ိူတ︀်ႉပ︀ူႇꩭႂ်ႛၸ︀ွက︀်မ︀ႃးဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ယ︀ေႃတ︀ၢတ︀်က︀ေႃႇ မ︀ိူဝ်ႈတ︀ီတ︀ႆ︀ၢႈꩫ︀ႆ︀ႇ လ︀ွင︀်ႈၸ︀ꩫ︀်းဢ︀ီတ︀်ꩬ︀ြေးꩫ︀ႆ︀ႇၵ︀ဝ် လ︀ုက︀်ႉမ︀ိူင︀်းဢ︀ီက︀ျီပ︀်မ︀ႆ︀ႛ တ︀ီꩫ︀ႆ︀ႛလ︀ွတ︀်ႉဢ︀ွက︀်ꩫ︀ႆ︀ႇၵ︀ႆ︀ႈင︀ႆ︀း လ︀ွင︀်ႈဢ︀ꩫ︀်ႈꩫ︀ုက︀်မ︀ꩫ︀်းမ︀ႆ︀ႛ ꩭိုဝ်လ︀ိုဝ်ဝႃႈၸ︀င︀်ꩫ︀ꩫ︀ႆ︀ႇက︀ေႃႇ ꩫ︀ေꩭႂ်ႛမ︀ႃးဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ယ︀ႃက︀ုယ︀ႃႇ မ︀ိူဝ်ႈတ︀ီတ︀ႆ︀ၢႈꩫ︀ႆ︀ႇ ၸ︀ူႛလ︀ုက︀်ႉယ︀ေႃတ︀ၢတ︀် ဢ︀ေႈက︀ူဝ်ႇဢ︀ေႈက︀ူဝ်ႇမ︀ႆ︀ႛ ပ︀ူင︀်ႈဢ︀က︀ိဝ်းင︀ႆ︀း မ︀ႆ︀ႇတ︀ဝ်ႇမ︀ꩫ︀်းမ︀ႆ︀ႛၸ︀ူꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ပ︀ႆ︀ၢႛဝႆ︀ႈမ︀ႃးဢ︀ူ။

လ︀ႆ︀ၢးပ︀ိူဝ်ႈတ︀ၢင︀်းယ︀ုမ︀်ယ︀မ︀်ႈꩬ︀ီ ဢ︀ေꩬ︀က︀်က︀ေႃႇ ယ︀ႃက︀ုꩫ︀ၵ︀ႃဢ︀ေꩬ︀ေႃမ︀ႆ︀ႛ လ︀ွင︀်ႈဢ︀ꩫ︀်ႈက︀ꩫ︀်ႛꩫ︀ႃႛမ︀ႆ︀ႛ တ︀ီပ︀ီꩫ︀်ႈမ︀ႃးꩫ︀ႆ︀ႇၵ︀ဝ် ပ︀ူင︀်ႈဢ︀က︀ိဝ်းꩭႂ်ႛမ︀ႃးဢ︀ူ။