Popular Bible Verses from တ︀ိမ︀ေႃတ︀ေ ႑ 2

Share

ꩬ︀မ︀်မ︀ႃတ︀ြႃးဢ︀မ︀ႂ်းယ︀ႃႇၸ︀ြႃးပ︀ီꩫ︀်ႈꩡ︀ဝ်ႛ ꩬ︀ူလ︀ိဝ်ႈꩫ︀ႆ︀ၢႈယ︀င︀်းꩬ︀ီ ꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ꩫ︀်ႈပ︀ီꩫ︀်ႈက︀ူꩫ︀်းမ︀ႃး ဢ︀ꩫ︀်ႈဝူင︀်ႈက︀ၢင︀်ႈၸ︀ြႃးပ︀ီꩫ︀်ႈꩡ︀ဝ်ႛꩫ︀ၵ︀ႃ က︀ူꩫ︀်းꩭဝ်းမ︀ႆ︀ႛ က︀ၢပ︀်က︀ႆ︀ၢꩫ︀ႆ︀ၢꩫ︀ႃႛꩬ︀ီ ဢ︀ဝ်ႈထုက︀်က︀ꩫ︀်ႈꩭႂ်ႛꩫ︀ႆ︀ႇက︀ေႃႇ ပ︀ႃးလ︀ိဝ်ႈꩫ︀ႆ︀ၢႈꩫ︀မ︀်ယ︀င︀်းꩫ︀ႆ︀ႇ။ မ︀ꩫ︀်းꩡ︀ဝ်ႛယ︀ႃႇ ၵ︀ွတ︀်ဢ︀ꩬ︀ၢက︀်ႉꩬ︀ီ က︀ူꩫ︀်းတ︀င︀်းလ︀ုင︀်မ︀ႆ︀ႛ ꩬ︀ေထွတ︀်ꩭႂ်ႛမ︀ႃးယ︀ဝ်ႇ။ ဢ︀ꩫ︀်ႈꩫ︀ႆ︀ႇယ︀ႃႇ ꩬ︀ၢက︀်ႉꩬ︀ေဢ︀ꩫ︀်ႈမ︀ိူဝ်ႈယ︀ၢမ︀်းထုက︀်ꩫ︀ႆ︀ႇ က︀ူꩫ︀်းမ︀ိူင︀်းက︀ၢင︀်ႈမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛၵ︀ႂ်ႈၵ︀ေꩬ︀ေꩭႂ်ႛမ︀ႃးꩫ︀ႆ︀ႇꩫ︀မ︀်။

င︀ႆ︀းꩫ︀ႆ︀ႇꩬ︀ီ ဢ︀ꩫ︀်ႈၵ︀ႅꩫ︀်းဢ︀ၵ︀ႅက︀်ႉꩫ︀ႆ︀ႇယ︀ႃႇ ꩡ︀ႃႇက︀ူꩫ︀်းတ︀င︀်းလ︀ုင︀် ဢ︀ဝ်ႈက︀ူႈလ︀ွင︀်ႈက︀ူႈတ︀ၢင︀်း ယ︀ွꩫ︀်းꩬ︀ူးꩭႂ်ႛတ︀ႃႉ။ ꩭႂ်ႛပ︀ူဝ်းၵ︀ဝ်မ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛပ︀ူင︀်ႈဢ︀က︀ိဝ်းꩫ︀ႆ︀ႇင︀ႆ︀း ဢ︀ꩫ︀်ႈꩫ︀င︀်ၵ︀ဝ်ꩭၢင︀်ႇꩫ︀ႆ︀ႇ ꩡ︀ႃႇၵ︀ဝ် ယ︀ွꩫ︀်းꩬ︀ူးꩭႂ်ႛတ︀ႃႉ။ ꩭႂ်ႛပ︀ူဝ်းက︀ူꩫ︀်းက︀ူႈက︀ူဝ်ႇမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ၵ︀ေꩬ︀ေꩭႂ်ႛꩫ︀ႆ︀ႛꩫ︀ႆ︀ႇ ယ︀ွꩫ︀်းꩬ︀ူးတ︀ႃႉ။ ꩡ︀ႃႇဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩭီတ︀်ꩭႂ်ႛꩫ︀ႆ︀ႇၵ︀ဝ်တ︀င︀်းလ︀ုင︀် မ︀ူꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛတ︀ႃႉ။ ꩭႂ်ႛပ︀ူဝ်းꩭဝ်းတ︀င︀်းလ︀ုင︀် ꩫ︀ႆ︀ႛဢ︀ူꩫ︀ီႈꩫ︀ီႈꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩫ︀ႆ︀ႛယ︀ုမ︀်ယ︀မ︀်ႈ၊ ꩫ︀ႆ︀ႛပ︀ႆ︀ၢႛဝႆ︀ႈꩫ︀ီႈꩫ︀ီႈ ꩫ︀ႆ︀ႇ ꩡ︀ႃႇꩡ︀ဝ်ႛꩭူဝ်ၵ︀မ︀်းꩫ︀ႆ︀ႇၵ︀ဝ်၊ ꩡ︀ႃႇက︀ေမ︀ၢꩫ︀်ႛ၊ က︀ေမ︀ိူင︀်းꩫ︀ႆ︀ႇၵ︀ဝ် ယ︀ွꩫ︀်းꩬ︀ူးတ︀ႃႉ။

င︀ႆ︀းꩫ︀ႆ︀ႇꩬ︀ီ က︀ဝ်ႈဝႃႈက︀ွတ︀်။ မ︀ိူဝ်ႈꩬ︀ူꩭူမ︀်ႈပ︀ႆ︀ၢႛၸ︀ြႃးꩫ︀ႆ︀ႇ ၸ︀ူႛꩡ︀ႆ︀ၢးꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈၵ︀ႂ်ႈꩡ︀ႃႇက︀ꩫ︀်ႈ၊ ꩫ︀ꩫ︀်းက︀ꩫ︀်ႈမ︀ဝ်ဢ︀ဝ်ႈယ︀င︀်းꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛတ︀င︀်းꩡ︀ႂ်ႈတ︀င︀်းၵ︀ူဝ်းဝႃႈယ︀ွꩫ︀်းꩬ︀ူးꩫ︀မ︀်။ ၸ︀ူႛယ︀ိင︀်းꩫ︀ႆ︀ႇၵ︀ဝ်က︀ေႃႇ မ︀ိူဝ်ႈꩬ︀ူပ︀ႆ︀ၢႛၸ︀ြႃးꩫ︀ႆ︀ႇ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭႂ်ႛပ︀ူဝ်းꩫ︀ူႈထုက︀်ꩫ︀ႆ︀ႇ ဝႃႈꩫ︀ုင︀်ႈမ︀ႃးက︀ꩫ︀်ႈꩫ︀မ︀်။ ꩫ︀င︀်ယ︀ႃးꩭၢင︀်ႈꩫ︀က︀ꩫ︀်ႈ ꩵ︀ႈထုက︀်ꩫ︀ုင︀်ႈမ︀ႃး။ ꩭႂ်ႛꩬ︀ႅꩫ︀်ႛက︀ွတ︀်ꩫ︀ꩬ︀ီ ၵ︀ိူင︀်ႈꩫ︀ုင︀်ႈဢ︀ꩫ︀်ႈၵ︀ꩫ︀်ယ︀ႂ်ꩫ︀ႆ︀ႇၵ︀ဝ်၊ ၵ︀ိူင︀်ႈင︀ိူꩫ︀်းၵ︀ိူင︀်ႈၵ︀မ︀်းꩫ︀ႆ︀ႇၵ︀ဝ်ꩵ︀ႈထုက︀်ꩫ︀ုင︀်ႈဝၢင︀်။ ꩭူဝ်မ︀ႆ︀ႛက︀ေႃႇ ꩵ︀ႈထုက︀်ꩭၢင︀်ႛၸ︀ႅဝ်။ င︀ႆ︀းမ︀ဝ်ꩡ︀ႂ်ႈꩬ︀ီ ꩫ︀င︀်က︀ူꩫ︀်း ဢ︀ꩫ︀်ႈယ︀မ︀်ႈင︀ဝ်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇၵ︀ဝ် ထုက︀်ꩫ︀ီႈꩭီတ︀်ꩫ︀က︀ꩫ︀်ႈ ꩭီတ︀်လ︀ွင︀်ႈꩫ︀ီႈꩫ︀ႆ︀ၢႈꩬ︀ီ ၸ︀ူႛꩡ︀ဝ်ႛမ︀ႆ︀ႛ ၸ︀ူႛꩡ︀ဝ်ႛဝႃႈꩭၢင︀်ႛဢ︀ဝ်ႈꩬ︀ႅꩫ︀်ႛက︀ꩫ︀်ႈꩫ︀မ︀်။