Popular Bible Verses from ပ︀ေတ︀ရ︀ု ႑ 4

Share

ဢ︀ꩫ︀်ႈၵ︀ႅꩫ︀်းဢ︀ၵ︀ႅက︀်ႉꩫ︀ႆ︀ႇယ︀ႃႇ က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ တ︀င︀်းꩡ︀ႂ်ႈတ︀င︀်းၵ︀ူဝ်းꩭၢက︀်ႉက︀ꩫ︀်ႈတ︀ႃႉ။ ꩭၢက︀်ႉက︀ꩫ︀်ႈက︀ီး ꩬ︀ူက︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ဢ︀ပ︀ႅတ︀်ႉ ပ︀ွႆ︀လ︀ွတ︀်ႉꩭႂ်ႛက︀ꩫ︀်ႈပ︀ီꩫ︀်ႈဢ︀ူ။

ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ လ︀ုက︀်ႉꩬ︀ူးက︀ျေးꩡ︀ူးမ︀ꩫ︀်းꩡ︀ဝ်ႛꩫ︀မ︀်ꩰလ︀ၢႆ︀လ︀ၢႆ︀မ︀ႆ︀ႛ ꩬ︀ူက︀ူႈက︀ူဝ်ႇမ︀ႆ︀ႛ ဢ︀ေႈၸ︀ꩫ︀်းꩰပ︀ꩫ︀်ႈꩭႂ်ႛဝႆ︀ႇဢ︀ူ။ ꩫ︀င︀်ၸ︀ူႛꩡ︀ႂ်ႇဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်းꩫ︀က︀ꩫ︀်ႈ ꩬ︀ူးက︀ျေးꩡ︀ူးမ︀ႆ︀ႛမ︀ိုင︀်ႇꩫ︀ီႈꩫ︀ီႈꩬ︀ီ ဢ︀ဝ်ႈꩬ︀ူးက︀ျေးꩡ︀ူးဢ︀မ︀ႂ်းၵ︀ဝ် က︀ူဝ်ႇလ︀ိူင︀်ႈမ︀ႆ︀ႛက︀ူဝ်ႇလ︀ိူင︀်ႈ ꩡ︀ွႆ︀ႈꩭႂ်ႛက︀ꩫ︀်ႈတ︀ႃႉ။

က︀ူဝ်ႇဢ︀ꩫ︀်ႈꩬ︀ူးက︀ျေးꩡ︀ူး ဢ︀ꩫ︀်ႈꩭူဝ်းၵ︀ၢဝ်ႈၵ︀ၢမ︀်းꩫ︀ီႈယ︀င︀်းꩫ︀ႆ︀ႇ ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛꩬ︀ႂ်ꩭႅင︀်းꩭႂ်ႛꩫ︀က︀ꩫ︀်ႈ ꩭူဝ်းတ︀ႃႉ။ က︀ူဝ်ႇဢ︀ꩫ︀်ႈꩬ︀ူးက︀ျေးꩡ︀ူးဢ︀ꩫ︀်ႈꩡ︀ွႆ︀ႈပ︀ိူꩫ︀်ႈယ︀င︀်းꩫ︀ႆ︀ႇ ꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛ ꩬ︀ႂ်ꩭႅင︀်းꩭႂ်ႛꩫ︀က︀ꩫ︀်ႈ ပ︀ိူꩫ︀်ႈမ︀ႆ︀ႛꩡ︀ွႆ︀ႈတ︀ႃႉ။ င︀ႆ︀းက︀ီး ဢ︀ꩫ︀်ႈꩫ︀င︀်ꩬ︀ူꩭီတ︀်ꩫ︀ႆ︀ႇ လ︀ႆ︀ၢးပ︀ိူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩬ︀ီ မ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ꩭူဝ်ႈꩭိုင︀်းပ︀ိုင︀်းꩬ︀ႂ်မ︀ႃးဢ︀ူ။ မ︀ူꩫ︀်ႈတ︀ꩫ︀်းၵ︀ူဝ်းၸ︀ြႃးပ︀ီꩫ︀်ႈꩡ︀ဝ်ႛ က︀ူႈꩡ︀ူဝ်ႈꩭႂ်ႛꩭူဝ်ႈꩭိုင︀်းပ︀ိုင︀်းꩬ︀ႂ်တ︀ီၵ︀ႃႛက︀ႃတ︀ႃႉ။ ꩬ︀ႃႈထု။

ꩬ︀ူꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇꩬ︀ီ ပ︀ိူꩫ︀်ႈꩫ︀ိက︀်ႉꩬ︀ၢက︀်ႉꩫ︀မ︀်ꩫ︀က︀ီးယ︀ႃႇ ꩵ︀ႈဝႃႈဢ︀ႆ︀ၢႈ။ က︀ွပ︀်ႉပ︀ိူဝ်ႈꩬ︀ူ ပ︀ၢက︀်ႉꩡ︀ိုဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛက︀ꩫ︀်ႈတ︀ႃႉ။

က︀မ︀်ၸ︀ႃတ︀ီꩬ︀ုတ︀်ꩡ︀မ︀်ႈꩫ︀ႆ︀ႇꩬ︀ီ ꩭႂ်ႛပ︀ူဝ်းꩬ︀ူယ︀ွꩫ︀်းꩬ︀ူးꩫ︀ႆ︀ႛꩫ︀ီႈꩫ︀ီႈꩫ︀ႆ︀ႇ တ︀ူဝ်ႈၸ︀ူႛꩡ︀ဝ်ႛမ︀ႆ︀ႛထိꩫ︀်ꩬ︀ီ ၵ︀ႅတ︀်ꩰꩫ︀ီမ︀်ꩰက︀ꩫ︀်ႈတ︀ႃႉ။

ပ︀ီႈꩫ︀ွင︀်ႇၵ︀ဝ်ꩴ︀း ဢ︀ꩫ︀်ႈင︀ႆ︀ႚꩬ︀ူꩫ︀ႆ︀ႛၵ︀ိူက︀်ႉꩰယ︀ၢက︀်ႉꩰꩫ︀ႆ︀ႇၵ︀ဝ်မ︀ႆ︀ႛ ꩬ︀ူပ︀ီဢ︀ၢမ︀်းက︀ꩫ︀်ႈ။ ဢ︀ꩫ︀်ႈꩬ︀ူမ︀ႆ︀ႛပ︀ီꩫ︀်ႈဢ︀ူꩫ︀ႆ︀ႇၵ︀ဝ်ယ︀ႃႇ ဢ︀ꩫ︀်ႈပ︀ိူꩫ︀်ႈမ︀ႆ︀ႛလ︀ၢက︀်ꩬ︀ႃꩵ︀ႈꩡ︀ႂ်ႈ။ ပ︀ိူꩫ︀်ႈမ︀ႆ︀ႛက︀ေႃႇပ︀ီꩫ︀်ႈဢ︀ူ။ ꩡ︀ူမ︀်းꩬ︀ိုင︀်ꩡ︀ူမ︀်းက︀ꩫ︀်ႈတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ꩫ︀်ႈꩫ︀ႆ︀ႇယ︀ႃႇ ဢ︀ꩫ︀်ႈၻုက︀်ႉၵ︀ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ꩬ︀ူၵ︀ၢမ︀်လ︀ွေႛꩫ︀ႆ︀ႇꩫ︀မ︀်။ င︀ႆ︀းꩫ︀ႆ︀ႇꩬ︀ီ မ︀ိူဝ်ႈမ︀ꩫ︀်းꩡ︀ဝ်ႛက︀ျွႃးပ︀ွက︀်ႉမ︀ႃးꩫ︀ႆ︀ႇ မ︀ူꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ က︀ူꩫ︀်းတ︀င︀်းမ︀ိူင︀်းꩭꩫ︀်ꩬ︀ီ ꩬ︀ူတ︀ီꩫ︀ႆ︀ႛꩡ︀ူမ︀်းလ︀ူင︀်ꩡ︀ူမ︀်းလ︀ၢင︀်က︀ꩫ︀်ႈꩫ︀မ︀်။

က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ꩭုမ︀်ꩰꩡ︀ူမ︀်းꩰꩬ︀ီ ꩭၢပ︀်ႉတ︀ွꩫ︀်ႛလ︀ီင︀်ႇဢ︀ွႆ︀က︀ꩫ︀်ႈတ︀ႃႉ။

င︀ႆ︀းꩫ︀ႆ︀ႇꩬ︀ီ က︀ွပ︀်ႉပ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛဢ︀လ︀ၢင︀်းယ︀င︀်းꩬ︀ီ ꩬ︀ူမ︀ႆ︀ႛပ︀ိူꩫ︀်ႈꩫ︀ိက︀်ႉꩬ︀ၢက︀်ႉꩫ︀မ︀်ꩫ︀က︀ီး ၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈꩬ︀ူမ︀ႆ︀ႛၸ︀ၢꩫ︀်ꩬ︀ၢင︀်း ꩡ︀ဝ်ႛဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်းမ︀ႆ︀ႛ ꩡ︀ူဝ်ႈဢ︀ꩬ︀ၢက︀်ႉꩬ︀ူဢ︀ၢပ︀်ႉꩬ︀ီ လ︀ွင︀်ႈꩫ︀ီႈꩫ︀ႆ︀ႇၵ︀ဝ်က︀ၢပ︀်ꩭီတ︀်က︀ႃတ︀ႃႉ။

င︀ႆ︀းꩫ︀ႆ︀ႇꩬ︀ီ ꩫ︀င︀်ꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ဝ်ႈတ︀ူဝ်ႈမ︀ꩫ︀်းꩡ︀ဝ်ႛ ၵ︀ၢမ︀်ၻုက︀်ႉၵ︀မ︀ႃးꩫ︀က︀ꩫ︀်ႈ ꩬ︀ူက︀ေႃႇ ယ︀ီင︀်ႈꩡ︀ွမ︀်းက︀ꩫ︀်ႈတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ူဝ်ႇဢ︀ꩫ︀်ႈꩡ︀ႃႇꩭၢင︀်းꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ဝ်ႈတ︀ူဝ်ႈၸ︀ူႛꩡ︀ဝ်ႛ ၵ︀ၢမ︀်ၻုက︀်ႉၵ︀မ︀ႃးꩫ︀ႆ︀ႇယ︀ႃႇ ဢ︀ပ︀ႅတ︀်ႉမ︀ႆ︀ႛ ꩵ︀ႈၵ︀ႂ်ႈက︀ၢပ︀်ꩭီတ︀်ယ︀ဝ်ႇ။ င︀ႆ︀းꩫ︀ႆ︀ႇꩬ︀ီ ꩬ︀ူလ︀ုက︀်ႉင︀ႆ︀ႚက︀ူဝ်ꩬ︀ီ ꩡ︀ူဝ်ႈတ︀ႃႈဢ︀ꩬ︀ၢက︀်ႉꩬ︀ူဢ︀ꩫ︀်ႈက︀ိူတ︀်မ︀ႆ︀ႛယ︀ႃႇ ဢ︀လ︀ၢင︀်ႈက︀ူꩫ︀်းမ︀ႆ︀ႛမ︀ဝ်ꩡ︀ွမ︀်းꩬ︀ီ ꩭႂ်ႛပ︀ူဝ်းꩡ︀ွမ︀်းဢ︀လ︀ၢင︀်းၸ︀ြႃးပ︀ီꩫ︀်ႈꩡ︀ဝ်ႛꩬ︀ီဢ︀ူꩫ︀ႆ︀ႇꩬ︀ိုင︀် ꩭီတ︀်ဢ︀ၵ︀ႅက︀်ႉက︀ꩫ︀်ႈတ︀ႃႉ။

င︀ႆ︀းꩫ︀ႆ︀ႇꩬ︀ီ ꩬ︀ူꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇꩬ︀ီ ပ︀ိူꩫ︀်ႈက︀ေးလ︀ေးက︀ီး ꩡ︀ူမ︀်းꩭုမ︀်က︀ꩫ︀်ႈတ︀ႃႉ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈမ︀ူꩫ︀်ႈယ︀ႂ်ꩫ︀ႆ︀ႇ တ︀င︀်းꩬ︀ူၵ︀ိင︀်းလ︀ွေႛဢ︀ူ။