Popular Bible Verses from Rom 8

Share

A vèsən kì jii, Nyùy yii sə́ vèsən ve á koŋ wun, yii, a vinyo ve ví kooy vèsən vidzə̀m vi binkìr fo vèsən ji ve juŋ vi. Dzə̀ vèsən vin ve Nyùy liìn ji wír və́, á wáa yiì vinyo ve wù‑uù sìysìn vidzə̀m.

A m kì kijuŋ feyì jii, bó yòʼ dzə̀ kifá kímóʼ kí kfə̀n shèm fo Nyùy wáa kòŋ vèsən, a sə vèsən. Kìn vèsən dzə̀ shó, kìn á kpùkír ne, bo bó yòʼ dzə̀ kifá ki shèm. Kìn dzə̀ nshèelav se Nyùy, kìn dzə̀ sé Satan, a fə̀m dzə̀ vinyo veé ndzə yee lèn, kìn ye yì dzəə́ wìy a wìy, bo bó yòʼ dzə̀ kifá ki shèm gheéy. Kìn wìr dzə̀ feé, kìn wù dzə̀ é ntoò yùv, kìn wù nə̀ə́ e loònsay, bo bó kifá ki yòʼ dzə̀ shó ndzə e dzə̀m ke dzə̀ kí shèm fo Nyùy wáa kòŋ vèsən. Vèsən vin ve á tatin vèsən à Taàtá wòsən Jesus Kristu.

Kiyoy ke Nyùy ki nen kfə̀n a sə vèsən, á wáa bùnrì Nyùy, a kiíy kinyo ke dzə̀ á sùúy. A bó yòʼ dzə̀ vèsən kìíy fo vèsə́n vifii, bìʼ fo melív mèsən mè yòʼ kiìn kinyo ke Nyùy koŋ kijuŋ. Kiyoy ke Nyùy ki lo, kí nèn lì kirə́ʼ késən, a toŋ fo Nyùy, a fèr kinyo ke kí dzəə̀n e vèsə́n meliv e dzəə ye bó yòʼ jòʼsì wír, wù kìíy móo fèr.

Mo Nyùy yii vinyo vìn e vèsən ben, bo vèsən dzə̀ é le lèn? Wìr wo dzə̀ wù kfə̀n yiì vèsən e kinyo ki dzə̀ la?

Kí nén a dzə jii, wìr wo wù tatin wùn Jesus Kristu bòy ne a fo lǒn vinyò ve bi ví.

Wìr wo wù tiir vifií é kinyò ke koŋ mensə́ dzə̀ ji ŋgaàŋ kpù ne fo Nyùy mbìv. Yii bèy, wìr wo wù tiir kfə́ vifií é kinyò ke koŋ Kiyoy ke Nyùy nén a dzə e tin fo Nyùy mbìv, wùn Nyùy wáa dzə ji nyaáŋ.

Vinyo vìn vi kooy vèsən ben, a Kristu wo wù‑uù kòŋèn vèsən, kù dzəə́ leey fo vèsən, yii, a vèsən só vinyo vee shooy soón, la ví yòʼ a sə̀ʼ vèsən gheéy.

A m kì féyì jii, bó yòʼ dzə̀ á fìʼsìn ŋgeʼ ye vèsən yén fo shintàm fèn wùn à vijuŋ ve vèsən wíy a ker e yuv ghán sidzə̀m vi gheéy.

Mo kí dzəə̀n ben, bo kinyo ke dzə̀ wìr yiì kí dzə̀ ka? A dzə̀ wìr tìnér dzə́ə fo Kristu wáa kòŋ vèsən á? A vèsən fə̀m yén a dzə̀ ŋgeʼ, kìn gháʼ ka vèsən, aá fə̀m ban vèsən bánen, kìn koó jíŋ, kìn gháʼ kitan, kìn wíri bémer vèsən, aá fə̀m yúyri vèsən yúyrín, bo dzə̀ ji Kristu yòʼ dzəə́ koŋ vèsən a?

Nyùy wo wù yén vinyo ve ví dzəə̀n e wìr shiliv vidzə̀m, nen kìíy kíwun ke Kiyoy ki tóŋ fo fo. A Kiyoy ki kù yii tóŋ a dzə̀ fo wìr kinyò ke wù kiìn ji Nyùy koŋè.

Wír ve dzəə̀n rú wón Nyùyi nén a dzə ve á yú a dzə̀ fo Kiyoy ke Nyùy ki, a kí danèr áwune.

Wìr wo wù yú a dzə̀ mo mensə́ mè lim e wun wùn, kù yii wáy vifií a dzə̀ é vinyò ve mensə́ mè taʼ ji wù wáa yiì. A wìr wo wù yú kfə́ a dzə̀ fo Kiyoy ke Nyùy ki, nèn tiir vifií və́ a dzə̀ é kinyò ke koŋ wun woo Kiyoy ke Nyùy.

Wun woo Nyùy kù wíy màysì, a yiì vinyo vìn e vèsən. Mo wù‑uù foon Wán və, wù kpú fo vèsən, e làa yòʼ a bavtí, bo vèsən kì ji wù yòʼ wíy kìm kifá kímóʼ kí fo vèsən gheéy.

A yii Kiyoy ke wun woo Nyùy ke kí bánri melív mèsən, aá kiiy rú ji vèsən sì á wón və́. Mo vèsən siìn wón və́, bo vèsən wíy nəə́ sa e vijùŋ ve wù lèmèn e wír vəə́ adzə̀m, a kù dzə̀ víwun ve Kristu‑uù nəən shó. Vèsən kù wíy nəə́ sho, a vèsən fen biìmé sa ŋgeʼ ye Kristu‑uù biimen.

A dzə̀ mo dzə̀ kí kù a dzə, bìʼ fo wìr lóo tiír vifií a dzə̀ é vinyò ve koŋ mensə́ mvə, bo wù sí tún ké Nyùy. A bó yòʼ dzə̀ wù kfə̀n a kòŋ ji wun yú nsər Nyùy. A wù fə̀m kì koŋ fó yu, bo dzə̀ la wù yòʼ yù.

Vifá ve Nyùy bomen vidzə̀m vi sí shiy, njeʼ feyì jii, á yén á mo Nyùy wíy yiì e wón vəə́ e ghan foo fèy.

Vèsən yén sa mo vifá ve Nyùy bomen vidzə̀m vi kù yén ŋgeʼ e meé lèn, dzəm moo wiíy wo wù lúm wán.