Popular Bible Verses from ROMA 8

Share

Mao"So wa yao: yao: re jhid'de; ra" yao" myid: yaung: to" ra" khyo re cao" yang: khai: yu: ru qhug' ra" ngonhaung" we' daga" ja: khao: ngo" mae gai: ra" khyo" boe" sho' bokad' na: rure ngonhaung" ba: ra".

Pe"mung:ga"re- yao" jhid'de; myid mae" pe" ja" yang re: ngonhaung" re maqo" kao" pye' ngad: ra". Shid: ru ngadqere:- daui: ru ngadqere:- mug: lagyo: jham ngadqere:- Mug:gaung kheim: so' qo" mo, ngadqere:- ana" pyad ngadqere:- joe" lo nae" pyad ngadqere:- mug:gaung tho' pyae ngadqere:- myid gaung o: pyae ngadqere:- phan" to" ra" gu: alhab' pe" ja" yang ngadqere:- ngonhaung" re ngonhaung" Asang Yesu Khristu khyo" yang qhu" byid' ra" Mao"So: jhid'de; myid mae" maqo" kao" pye' byid' rure ngo jhaug' za: ba: ra".

Ai we' dakhyo: Byo re: qam: nang" ra" ngonhaung" re bao" thaug' byid: nae" qhid' mae" joe" li" ra". Ngonhaung" wa akyu" khoru: mho' ca" rure maba- nhad' dao: thoe: yang maqo" ta" thug' ra" nokyang: kyang: thoe we' ai: Byo yao: ngonhaung" qhid' mae" Mao"So re bao" mho' byid' ra".

Cegu: alhab' re qu" yang: ngonhaung" pe" ta" nae" i? Mao"So wa ngonhaung" shad' mae na yang: ngad: re wa ngonhaung" re gye khag' qo" kad' nae" i? Mao"So wa gai: gai: yao: ngonhaung" re gye kad' nae" mangad

Yesu Khristu we' dagaung dasho: za: ngad: na: ra" mo; qhid' mae" wa dao: phyid' ru pe" majo, ngad: ra".

Gaung sho: we' sin" ra" ja: re nhag' nghae" ra" mo, wa shid: ru khyo joe" ako". Byo we' sin" ra" ja: re nhag' nghae" ra" mo, wa kao so' daui: ru we' ngaui pyo: yaug yo: ra" khyo re qo" yu: ako".

Ngonhaung" re maqo" kao" pye' nae"- ngonhaung" re jhid'de; ra" Khristu khyo" yang ai: gu: alhab' re ngonhaung" wa nyang" za: aung doe; pye' va" ru ngad:

Ana"- ce: pyad mae ngonhaung" dayin dayo: kham zo" ru wa thao phyao: ngonhaung" re qhu" byid: nae" ra" phungbao we' dajhid' re: maqo" tho' gai: tau"- ein: ngo myid: ra".

Airumung: Khristu nho: jhid'de; myid mae" ngonhaung" re khag' qo" kao" pye' byid: nae" i? Qug: khai: qhug' ru- myid: qug: myid: ci" qhug' ru- yhin" qhug' ru- moe, shab' qhug' ru- myaung sho" ru we' se' pye' qhug' ru jham wa Khristu nho: jhid'de; myid mae" ngonhaung" re qo" kao" pye' nae" i?

Ngonhaung" nhag' lam: re myao: kyao" ra" Mao"So wa Byo: nho: myid rere: ba: ra". Pe"mung:ga"re Byo wa Mao"So myid o: ru we' dakhyo:- yao" byu qe: qhid' mae" Mao"So re mho' yao byid' ra".

Mao"So: Byo: yang khyoqhid' au: she byid: qhug' ra" mo, wa Mao"So: zo: dau qe ngad: ako".

Byu xao su gaung sho: o: ra" khyo" kao so' daui: ra" mo, wa- gaung sho: we' sin" ra" ja: re za: nhag' nghae" jo; ako". Byo o: ra" khyo" kao so' daui: ra" mo, wa- Byo we' sin" ra" ja: re za: nhag' nghae" jo; ako".

Mao"So wa yao" yao: Zo: re lhao" re: o: mabyid lo:- ngonhaung" alhab' mo; qhid' mae" yao: re ab byid' pye' ava". Ngonhaung" qhid' mae" yao: Zo: re lhao" re: ab byid' pye' ra" yaug wa- ja: khao: ngo" rere: mabyag lo: ngonhaung" re byid' li" nae" mangad: i?

Ngonhaung" wa Mao"So: zo: dau qe ngad: rure sagse: kham byid: nae" qhid' mae" Mao"So: Byo yao: re: ngonhaung" byo we' daga" qhan: yang: sagse: kham byid' ra". Ngonhaung" wa Mao"So yao" zo: dau qe ngad: ruyang yao" byu qe: qhid' mae" jaung: to" ra" shaman" jeju re ngonhaung" qo" sang: yu: li" nae". Khristu qhid' mae" Mao"So jaung: to: byid' ra" phungbao rere: yao: we' daga" ngonhaung" qo" sang: yu: li" nae". Pe"mung:ga"re ngonhaung" wa Khristu nho: dayin dayo: kham zo" rumae bobo: ngad: re wa yao" phungbao mae re: ngonhaung" qo" bokham: yu: li" nae".

Airumung: gaung sho: we' sin" ra" ja: re nhag' nghae" ra" yaug wa Mao"So: gyevo boe" li" ra". Pe"mung:ga"re yao: wa Mao"So: tarha" re maphug' cao" ngad: ra"- gaigai: ga" re yao: wa aire maqo" phug' cao" ngad: ra".

Phan" to" ra" gu: alhab' wa- Mao"So: zo: dau qe de: de: qhu" byid' thug' li" nae" rure mamyan: makhyad' kao bau yang: lao" na: bam: ako".

Pe"mung:ga"re phan" to" ra" gu: alhab' wa ana" ba joe" sho' zo:khau no we' dakhyo:- no mung: nokyang: kyang" na: rure ngonhaung" ba: ra".