Popular Bible Verses from Juece 16

Share

Maʌ̃be Dalilaba jĩgua jarasia: –¡Sansoʌ̃, pilisteorãba bʌra jidad̶e zebʌdaa!– Ara maʌ̃da Sansoʌ̃ra ʌ̃rʌ̃maped̶a ẽdrʌida crĩchasia naẽna ẽdrʌbari bad̶a quĩrãca. Baribʌrʌ adua b̶asia Ãcõrẽra idji ume b̶ad̶ada ãyã wãsida.

Maʌ̃ne Sansoʌ̃ba Ãcõrẽa nãwã iwid̶isia: –Mʌ̃ Boro Ãcõrẽ, mʌ̃ djuburia mʌ̃a iwid̶i b̶ʌra ũrĩdua. Waya b̶arima ab̶a mʌ̃ra juerza bara b̶ʌdua mʌ̃a pilisteorã quenai carea mʌ̃ daura nuẽtaped̶ad̶a bẽrã.

Maʌ̃ carea idji juerzara cãrẽneba ze b̶ʌda wãrãda jarasia: –Mʌ̃ra nazareo bẽrã mʌ̃ bud̶ara tʌd̶acaa. Mʌ̃ papa b̶ited̶aʌba mʌ̃ra Ãcõrẽ itea b̶esia. Mʌ̃ bud̶ada tʌd̶ibʌrʌ mʌ̃ra juerza neẽ́ b̶eya. Baridua ẽberãca b̶eya.

Dalilaba ewariza ara pichia iwid̶ibadjia. Mãwã mĩã sẽ b̶ʌ bẽrã Sansoʌ̃ra sẽped̶a beu quĩrĩã nũmesia.

Maʌ̃be idji jʌwaba tã jʌrʌsia dji ẽsibema de jĩrũ umé panʌda. Maʌ̃ de jĩrũba dji de borora eronũmasia. Maʌ̃ne idji jʌwaba de jĩrũra umena tãped̶a nãwã b̶iasia: –¡Mʌ̃ra pilisteorã ume beuya!– Maʌ̃be jũma idji juerzaba chãb̶aribʌrʌd̶e pilisteorã ãcõrẽ Dagoʌ̃ de dromara ãdji bororã ʌ̃rʌ̃, dewararã ʌ̃rʌ̃ bid̶a tod̶ogozoasia. Sansoʌ̃ sid̶a beusia. Mãwã idji beusi ewarid̶e Sansoʌ̃ba pilisteorãra aud̶uara quenasia idji zocai b̶asid̶e quenana cãyãbara.