Popular Bible Verses from NEHEMIA 9

Share

Tapi nini-nini kami jadi meganjang rukur dingen mekeng janah la ia nggit ngikutken perentahNdu. La ia nggit patuh; ilupakenna kerina perbahanenNdu; ilupakenna tanda-tanda kuasa si enggo icidahkenNdu. I bas kiniganjangen ukurna, ipilihna sekalak peminpin lako maba ia mulih ku bas perbudaken i Mesir. Tapi Kam kap Dibata si ngalemi salah; Kam melias dingen perkeleng, la pedas merawa. Mbelin kap perkuah ateNdu; janah la itadingkenNdu ia.

Janah kenca si e kalak Israel melasken pertoton enda: “Kam, O TUHAN, Kam saja ngenca TUHAN, ibahanNdu kerina langit ras bintang-bintang i langit. IbahanNdu taneh, lawit ras kerina isina; Kam si pegeluhsa kerina. Kuasa-kuasa i langit nembah erjimpuh man baNdu.

Tapi la itadingkenNdu ia i gurun pasir e perban mbelin kal perkuah ateNdu. La ibuatNdu embun ntah api e si nuduhken dalan man bana suari ras berngi. IberekenNdu KesahNdu lako ngajari ia; inakaniNdu ia alu manna, janah ibereNdu lau man inemenna. Kidekah empat puluh tahun i gurun pasir, isikapkenNdu kasa kai si iperlukenna; pakenna lalap la tuk, janah tapak nahena la pernah besar.