Popular Bible Verses from ULANGEN 28

Share

“Adi iikutkenndu TUHAN Dibatandu dingen alu tutus ipakendu kerina perentah-perentahNa si kubereken sendah man bandu, ibanNa kam jadi bangsa si belinen asang bangsa-bangsa si deban i babo doni enda.

Ikutkenlah TUHAN Dibatandu maka kerina pasu-pasu enda jadi sikerajangenndu

TUHAN Dibatandu mahan kam jadi ikuten bangsa-bangsa si deban, labo jadi bangsa si ngikut-ngikut. Lalap kam menang, la penah talu, adi iikutkenndu alu tutus kerina perentahNa si kubereken man bandu i bas wari enda.

I bas paksana, ipesusurNa udan i bas perbendaharan kinibayakenNa i langit nari, dingen ipasu-pasuNa kerina pendahinndu, maka banci kam minjamken man bangsa-bangsa si deban, tapi la kam perlu minjam i bas bangsa si apai nari pe.

TUHAN naluken musuhndu adi iperangna kam. Iperang musuhndu kam arah sada dalan, tapi kiam ia nadingken kam alu marpar-merap.

TUHAN Dibatandu masu-masu pendahinndu, ras ndemi lumbung-lumbungndu alu gandum. Ipasu-pasuNa kam i bas negeri si iberekenNa man bandu.

TUHAN masu-masu kerina pendahinndu.

TUHAN masu-masu kuta ras jumandu.

TUHAN masu-masu kam maka kam ertuah, bayak, maka nterem pupusndu, melala pagendu, melala lembundu ras biri-birindu.

Adi iikutkenndu TUHAN Dibatandu, dingen ilakokenndu kerina perentahNa, ijadikenNa kam jadi bangsaNa jine sue ras si enggo ipadankenNa.

TUHAN masu-masu sinuan-sinuanndu ras pangan si ibahan i bas sinuan-sinuan e nari.

TUHAN mereken man bandu nterem pupusndu, lembu ras page i negeri si ipadankenNa man nini-ninindu maka iberekenna e man bandu.

E maka kerina bangsa-bangsa i babo doni enda ngidah maka TUHAN enggo milih kam jadi bangsaNa, janah mbiar bangsa-bangsa e man bandu.

Tapi ola ndigan pe ilanggarndu perentah-perentah e alu dalan si apai pe, ntah nembah dingen erdahin guna dibata-dibata si deban.”

“Tapi adi la iikutkenndu TUHAN Dibatandu ras la atendu tutus make kerina perentah-perentah ras undang-undangNa si kubereken man bandu wari enda, kerina sumpah-sumpah si la mehuli enda jadi me man bandu