Popular Bible Verses from 1 Pɛtɛlɔ 2

Share

Chɔ banu, moe ne bando basɔbɔiwa na Kakua, kabee moe ne basia be Nombe, kabee moe ne ibota lye ba ama. Osobaketa koongwa ibota lyaakɛ, kɔmɔa, moongwe mo kusaoleaya bando ilɔngɔ lye bikete bikataa bitoketa awɛ. Olya ne wabaitana moole mwikunyɛ ne kobaingecha mɔ kyɛɛngɛ kyaakɛ kye kokanyakanya.

Kilisito awɛ mwɛɛnɛ wachaa misiɔ yee bwabea bwito monda mwɛ lɔkɔba lwakɛ, akwa awɛ ko mote we maakanu. Waketa boa ko bae kosambokana ne bwabea kɔ lɔsɛ ne tuchikane nɛ mwɛchɔ mwaachi kombaa kwa Kakua. Koetea kotutwa kwakɛ, banu mooloke. Kɔmɔa mɔbɛɛ boe mɛkɔkɔ yachimbea, ano mɔsɔɔtɔkɛa olya ɔbɛɛ mosangi ne mɔlɔli we metema yiinu.

Kaɛ kaɛ banu ndemwaongwa bando ba Kakua, chɔ leno motae bando bakɛ. Kabee kaɛ kaɛ, Kakua ndabakweaya lokwa, ano mookwelwa lokwa naakɛ.

Boe baana bakeboteka batokonda kɔnyɔma, na baanu moongwaye ne saki yɛ kɔnyɔma Ikomo ma Kakua, Lɛlyɔ ikomo lee ne bwe mabɛɛ mataasi kosambyewa. Ko boa mwasomanyɔma, motakoe ne kooloka.

Ngondwa chaanɛ, moe baɛni, kabee bando babeoka mo ono mɔsɛngɛ, kɔ bɔbɔ natwiyaya kwinu byabua, mwikɛngɛ ne ikaa lyɛ kɛ lɔkɔba lituchiana ne motema. Mɔɔbɛ ne bikete byaachi asambea bando bɛ mɔsɛngɛ. Moketaye bobo, kɔmɔa atabainyekechee abɔ itɛ mooketa bwabea, nɛ kɔmɔa bikete binu byaachi batombeke Kakua loa lusu lwɛ kɔɔtɔka kwakɛ.

Na baanu bwakaɛ, moongwe boe mabwɛ mɛ mwɛchɔ, kɔmɔa mokambekiwe ko koaboka ndabo yee Motema wa Ama. Kabee motaongwe basia ba ama batabɛ mo kokamba meemo yee koochea Kakua biochwa koeta njea yee Motema wa Ama waakɛ. Bia biochwa, Kakua otabɛ mu kubiimenya koetea Yɛsu Kilisito.

Ko bobo, mokosoe njɔɔ bikete biisɛ byabea ne bye manu, amɔɔsa ne boale, ne kwinyekecheana kwe mitindɔ ɛɛsɛ.

Mɔbɛ mu kumwisɛɛnɛa Mwaame. Awɛ ne ibwɛ lyɛ mwɛchɔ. Lea ibwɛ lyakosoiwa ne baaboki, alyo lyasɔbɔiwa na Kakua, nalyo leobaikiwa koba ibwɛ lyɛ ibɛi lekataa kombaa kwakɛ.

Mɔbɛ mukwiungwa bwe bando bataasi bokakwe. Koongwa kwiinu kwe muusi bokakwe kɔɔbɛchaya njea yee kobwekea bwabea; mɔbɛ mukwiungwa bwe ngambi cha Kakua.

Kɔmɔa Kakua otokonda mɔbɛ mo koketa byaachi, ku kuchiba tonwa twe maɔku ne biobeobe.