Popular Bible Verses from Kejadian 50

Share

Pumun taruda sundi, ‘Yusup poptapkamepe’ tenen, tek sisi mali kupra deipnerum dinino, ataruda Allah er kangeda, ‘Gume, ukupra dakupmengepane, amenda taru angebo Yusup, er pel dopkamnerya deiki di, depmanto nesala weik lyepkamne,’ teneramneue. Atep erdi kaukepseupa, mali kweipnerum ngeda telep pua. Ukutaru apel donupe deiki di, Allah men di teneramseu ngeda, konum katuai kuprepa, kael kepmape.

Upepi dinin, Yusupdi sun tep upepu. “Gume, sun kwar dangnada yaprume. Neda Allah kuretopu, upu bongdina ila deiyo ngebo kununa tep, aupu pepnerum do?

Ange tep nengeda, sun kwar dangna yaprume. Nedi sun cap, sundi deiamrum nyapu cap, sun nyapsilip yuma cap tep, sun putasere keca tali lupra karenkamsene.” Yusupdi er du yape tep pepu. Aupu utopu upu ton upepka deiki di, sun dipru kwa dipudi, telep upu ton bouna di pepupa, sun yuma tali kange doupra teleppu kunmai.

Yusup tep upepkamrume. Kan nai bodi upepkere. Kan du yapedi kan tep, pio mali-mali weik kupkeia deiki di, ikin keca weik kan nong deiki kwamkeu. Dinino, sundi pio mali kuraminge tep ngeda kaukepkurume. Kan nai bodi si eremamu Allahda, kan du yape peda, er sipu erepra gispal donunge. Atep, sundi mali kupra deipkei ngeda kaukepkurume. Kan nai bo Yakubdi upepra moropkeu.” Yusup er du yapedi aupu pepra dokotepipa, yuk nengdi aupu lap peryaipa, Yusup gekepu dingeda engepu.

Sun dakuramipane, amenda taru Yusupdi er du yape tep upepu. “Ukuda ne depkaman ja. Ne depkaman dinin, Allahdi sun yuma tep melimkamsere. Ada, Allahdi nun apu yapu Abraham cap, Isak cap, Yakub cap tep, ‘Amutu karepkamsene,’ pepra, pediramu mutupuda, melipra dubenkamsere. Mesir mutu neitamai dopropseredi, Kanaan tara dubenkamsera tep pepsene,” Yusupdi pepu.

Upepudi aupu ton dukdongopra pepu. “Ne du yape, ne kaele. Allah melipseredi dopra, Kanaan mutu dubenkamsere. Atep nengeda, Mesir mutu tapra, Kanaan tara benkamrum tarada, ne yo dopra Kanaan tara dubenkamrume. Ne yoda, amutu neitamai tara gume. ‘Pio teka tenepsetene’ tenen, sundi ne tep, ‘Nunda tek sisi kan yo dopra, Kanaan mutu dubena peipkamepe,’ pepra deipneso,” Yusupdi upepra moropupa, er du yapedi, “Teka ukupkamepe,” pepra, pedina upu deipi.

Uda, sun dakunmaipanen, amenda taru Yusup depu. Er depu taruda, keteng tamun denge weik, 110 tahun wisi konum kupu. Depupa, ‘Er nong berbera lyuprur’ tenen, sun akeca kael nengdi, lyuna sengdongon obat er nong deiki deipidi, bekine pumbon dongopi dingeda, Mesir mutu acapu deipi.