Popular Bible Verses from อาอีซายัะ 60

Share

อึย เบ ดูอี แคง มืง ฌีโอน, แตห เบ ยีต. โคว, บลาง แฮะ ฮอต ตัห. แตห ปี โบง เบ ปี บลาง ซีแง อี วี ทอง ดี อี เฮา. อึณ มูห อาพูง ดังโคว เฌาพรา อี ปี บลาง ตี, อี แฮะ ลึห ดี เบ.

เฆ ดูอี อาโมยว เฮา เฆ ดี บอ ตัห โดง กอย เบ โกบ มึห บลาง ตี. เฆ คูนดีคัม ดี บอ ตัห โดง กอย เบ โกบ มึห บลาง โดง กอย เบ ซีณ ซีณวัห.

อับ ว็อง แฮะ วี ปลึก ดูอี อาโมยว เฮา. อึณ ปี อึณอูะ เฮต แฮะ ปลึก เฆ บอกาเฆลียด. อี มูห แคง มืง เบ, บลาง เฌาพรา แฮะ เลห, แตห อาพูง ดังโคว อัน บอ กอย โดง กอย เบ.

อี มูห วา เตียะ เบ, อัน ดี วี แบร วี แบน อู แหรณ วี. บอ วี อี ดีแตด, อัน ดี วี แบร แบน อาโมยว ดูอี กืน. ฮี ฌัม อาคราว อัน, โอว อี มูห เฌาพรา, โอว ดี บอ โบง ลอง อัน ตี, แตห อึณ แบน ครัน ครัน แฮ แฮ.”

วาย อัน ตี ดอ กาแต ซีแง เบ อาว ฮู โลว บลาง ซีแง. แคง หมึร, เบ อาว ฮู โลว มาเฆียน บลาง ดี เบ. โคว, โอว เฌาพรา แฮะ แบน อี บลาง ดี เบ. กาตาน อาพูง ดังโคว โอว ดี บอ แตห อึณ บลาง ดี เบ เซเซ. บอ เฌาพรา ปี กรึบ เบ ดี บอ แตห เบ มึห อาพูง ดังโคว.

โอว เฌาพรา ดี แบน อี บลาง ดี เบ เซเซ. โอว ดี ปี ซีแง ดี เบ อี ตู เฆต ดอ เหมา. โอว บอ ปี มาเฆียน ดี เบ อี ตู ยัม ดอ เหมา. เบ มืร อาว ฮู มึห กลึร มึห ดูก ดอ เหมา.

เบ ฮี ยึร ลอง อัน ตี, เบ ดี บอ วี โคย กาเซา. น็อห เบ ดี บอ ดียูห ดีเยณ โกบ แฮะ โคย เบ ปาย ตี. ครัม เฆ ดูอี อาโมยว เฮา, เฆ ดี บอ วี ดึห ตัห กาฌูะ โดง กอย เบ. โกรวกราม อี บอด อี หมึอม อี กอย ดี มืง นา ตัะ อึม นัมมูกซารา, เฆ ดี บอ วี ดึห ตัห กาฌูะ ดี โดง กอย เบ.

แตห เบ วี ยอด อี แฮะ โบว แบน, อี แฮะ กอย โรบ เบ. เฆ ดูอี อาโมยว เบ แฮะ ลาย กาฌูะ วี ตัห โดง กอย บรีม เฆ. เฆ ฆอน กาโณม เบ อี แฮะ กอย โต็ง กาเซา บอ วี ตัห โดง กอย เบ. บอ ฆอน ดีบยา เบ ดี บอ วี ตัห โดง กอย เบ ปี อี โจะ ตัห ฆอน ดีแตด.

เฆ ดูอี อาโมยว เบ บอกาเฆลียด, เฆ ดี บอ โบง ซืร ซืร หมาน หมาน. เฆ ดี วี ปึอน ดี บึง มาน มืง เฆ เซเซ. เฆ ปี โหงว ปี ซัม โอว ตา แด โอว, แตห อึณ บยัะ แคะ ตาง อาพูง ดังโคว โอว.

อี ซีนัน ซีนืง ลาย กาโฆห กาง็อห, เบ อาว ฮู ยึร แคง มืง เบ ดอ เหมา. เบ ดี วี ต็อห, แรง มืง เบ มูห โดง คยอด อี. เบ ดี บอ ต็อห, ลอง มาโลห มืง เบ, อึณ มูห โดง อืบ อี เฌาพรา.

มาโลห มืง เบ ดี วึห อูน ดอง คืน ดอง วัน, ตู กาบีด ดอ เหมา, แตห เฆ ดูอี อาโมยว เฮา ปึอน ดี ดึห ตัห โกรวกราม เฆ บอ คาฆูน เฆ, ดัว ดี เบ, แตห บอ คูนดีคัม เฆ แยต เฆ.

พึง มังปร็อง กาฮาต อี กืน อี กอย แคง มืง มีดีอาน, บอ แคง มืง เอพา ตึอน, เฆ ดี บอ ดึห ตัห ดี โดง กอย เบ. เฆ ดูอี แคง มืง เซบา ดี บอ ดึห ตัห ครีว เฆ กาณัน เลโบน. เฆ ดูอี ดี บอ กาลาง ลอง นา บอด แปะ แฮะ โบง เฌาพรา บอ อืบ อัน.

เฌาพรา ปี วี กาลาง ดี เฆ ดูอี แคง มืง เยรูซาแลม ต็อห, “เฆ ดูอี อาโมยว เฮา, เฆ ดี บอ วี โฆว วี อึณปราย แรง มืง ดัว ดี เบ. คูนดีคัม ดูอี เฆ ตี, เฆ บอ แบน ปี ซูต ปี จัร เบ. โคว, โอว ปี บอ แฮะ รู แฮะ จาว ดี เบ บอ แฮะ ดัม หมาบ ดี เบ, โอว ยี วี มึห น็อห กาเว เบ.

อี เฮา แฮะ ดึอม วัห เบ บอ ฌ็อง เบ. อึณ มืร ตู มึห อาเซ อี ตัห จัร เบ. โอว ยี วี แตห เบ โบยว ดาคึย กอย แคง มืง เบ, แตห อึณ วี แบน มืง โดง ซี กอย ดอน อี ดอน โจว ดอน บาน.

เฆ ดูอี อาโมยว เฮา บอ คูนดีคัม เฆ, เฆ ดี บอ โลว วี ลึมลา เบ, แตห อึณ กอ ปี มา ลึมลา ฆอน อัน. ปัน อัน ตี เบ ดี บอ วี นับ โอว มูห เฌาพรา อี แฮะ คยอด เบ, เฌาพรา ปี กรึบ ดูอี อีซาเรลัะ, เฌาพรา อี มึห อาพูง ดังโคว ตาง อี แฮะ ทูด เลห เบ อี มูห อาโมยว อาโกบ.