Popular Bible Verses from อาอีซายัะ 43

Share

แตห เบ วี ยอด อี กามาย ปี ดี โบง โอว. อึณ ซีลอะ แบน ดอ ตี นี, แตห เบ ยึร. โอว โบง แตห อึณ มึห อึณเตณ ตาง แคง แปร กาฮ็อห, แตห อึณ วี มึห บอ อึม แบลง อึม แหล แคง โดง ฆลัง.

ดอ กาโลห ฮาว เบ แคง อึม ลึก, โอว ดี กอย รึม โดบ เบ. ดอ กาโลห เบ แบลง อึม ตาง, อึม มืร ตู อึณปูน เบ. ดอ แณต ฮาว เบ แคง เงา, เบ มืร ตู ปาย เหมา, ตู บลูห. แปละ เงา มืร ตู หลาะ ตู กาซึม เบ.

มาแล, เฌาพรา ปี วี ต็อห, “แตห เบ ปีว อี แฮะ ปวน อาต นี. แกวะ แตห เบ โนว ปี ปาย ดอ มึอน ตึอน.

ดอ ตี นี เฌาพรา อี แฮะ แดะ ดูอี อีซาเรลัะ, อี แฮะ พาน เบลห เบ หลูกหลาน อาโกบ, อัน แฮะ ต็อห, “แกวะ แตห เบ โยว. โอว แฮะ คยอด เบ. โอว แฮะ แดะ จืร เบ ต็อห, เบ มูห ดูอี ปี อึบ โอว.

โกบ แฮะ มึห เบ ดีง็อห ดีคัน, แฮะ มึห ซาเร กาซืร โอว, โอว มืร ร็อก เบ. โอว มืร แฮะ ดึห ดูอี กืน วี ลาย การ็อห ฆาย เบ. โอว แฮะ วี ดึห อาซาก ดูอี อาโมยว เฮา วี การ็อห อาซาก เบ.

โคว, โอว อี มูห เฌาพรา, โอว มูห เฌาพรา ปี กรึบ เบ, เฌาพรา อี อึบ ดูอี อีซาเรลัะ อี ซีงา บอด, เฌาพรา อี คยอด เบ. โอว มืร ดึห ดูอี แคง มืง แอฆึบ, แตห เฆ คัม กาดาง เบ, แตห โอว ทูด เลห เบ. โอว แฮะ ดึห บอ ดูอี แคง มืง กูซา บอ แคง มืง เซบา, แตห เฆ วี กาดาง เบ, วี ลาย การ็อห ฆาย เบ.

แกวะ แตห เบ โยว, โอว กอย รึม โดบ เบ. ดูอี เบ อี กอย โต็ง กาเซา, อี กอย นา เลห ซีแง บอ เฆ อี กอย บลาก นา เฆต ซีแง, โอว ดี วี ดึห ตัห เฆ, แตห เฆ วี กอย แคง มืง เฆ.

ปี บอ แฮะ ปาย ตี มืร, โอว อี มูห เฌาพรา ดี บยัด แวน หมาบ เบ. โอว โบง ปาย ตี โกบ อึง โอว ดี โบง. โอว มืร ตู โนว หมาบ แปะ แฮะ โบง เบ ตี.

อึย เบ ดูอี อีซาเรลัะ, เบ แฮะ แบน ซักเซ ลอง โอว. โอว แฮะ ร็อห เบ, แตห เบ แบน แดเจณ โอว. แตห เบ นับ ซีคยา โอว มูห เฌาพรา อี แตห เบ หณึม บึง มี โอว. แดง โอว, อาว มึห เฌาพรา ปอ อู กาดัง. ดี อาต โอว มืร, อึณ ตู ดึอม มึห. วาย โอว มืร, อึณ ตู วี มึห คอ อู กาดัง.

อึณ มึห มี โอว อี มูห เฌาพรา. แดง โอว อู กาดัง นี, อาว มึห อาเซ อี ปึอน คยอด ดูอี.

ซีณ ดอ โฆว อัน โอว เฌาพรา แฮะ กอย. อึณ มืร ตู มึห อาเซ อี ปึอน พาด ดึห เฆ ดูอี ปี อึบ โอว ดี โอว. ปี โบง โอว, อาว มึห อาเซ อี ปึอน แคร.”

แคะ กอย เฆ มาโดว แปร, เฆ ดี โรวเซ โอว. มาโซว แปร บอ มาซีม กาฮาต, เฆ แฮะ นับ ดี วี กาลาง ฆูง เฆฌู ดี โอว โกบ แฮะ แตห โอว มึห อึม กืน แคง แปร ตาง ตี, แตห บอ เฆ ดูอี แปะ แฮะ ร็อห โอว, อี มูห ดูอี อาโมยว ปี อึบ โอว ปึอน ดี เดียง แพ. ดูอี แปะ แฮะ ร็อห โอว ตี, โอว แฮะ พาน เบลห เฆ, แตห เฆ แบน ดูอี อี กาดึก กาด็อะ ดี โอว, แตห เฆ บยัะ ฆูง เฆฌู โอว ดี อี เฮา.”

โอว ดี กาลาง ดี เฆ ดูอี อี กอย บลาก นา กัว, แตห เฆ เบลห เวณ เบ. โอว ดี จัร บอ เฆ อี กอย บลาก นา เตต, แกวะ แตห เฆ แคร ฆอน โอว. เฆ ดูอี อาโมยว โอว อี กอย แคง มืง อี โต็ง กาเซา บอ เฆ อี กอย โดง ซืด กาดาย ดอน นา ดอน โปละ, โอว ดี วี ดึห ตัห โตต เฆ. เฆ บอกาเฆลียด มูห ดูอี อาโมยว โอว. โอว แฮะ พาน เบลห เฆ ดอน อี, แตห เฆ แบน อี บยัะ อาพูง ดังโคว โอว.”

เฌาพรา แฮะ โบง แตห อึณ มึห อึณเตณ แคง อึม นัมมูกซารา, แตห อึณ ปึอน กาโลห ฮาว แคง อึม อี แฌว อี ฌูห แฮณ กาเซา. บอ ดา ซึก อี ป็อะ ลักเลา บอ ดา ซึก อี ป็อะ มังปร็อง, อัน เฌา แฮะ โบง แตห เฆ ลึร ชึม โตต. เฆ แฮะ ฮอต เกห, เฆ มืร ตู ปึอน ดี วี ยีต ดอ เหมา. เฆ แฮะ ยัม หราย ปี อี บยัด ยัด อึณกึร เงา เดน.

โอว มูห เฌาพรา อี ซีงา บอด. โอว แฮะ พาน เบลห เบ ดูอี อีซาเรลัะ. โอว มูห บอ คูนดีคัม อี อึบ เบ.” แคะ ตี เฌาพรา แฮะ กาลาง.