Popular Bible Verses from เลห 16

Share

เฆ วี ต็อห ดี ฆาย, “เซ เฌาพรา แตห เย บอกาเฆลียด ยัม แคง มืง แอฆึบ ตึอน, อึณ หมึอม หลึอม ดูก ปี โลว กาดูห เย ดอ ตี นี. ดอ กอย เย แคง มืง แอฆึบ เย ปึอน โฮม แพ ยัง แบน โมยว แบน โมยว. เย บอ มึห ปี ดี โฮม ซีแงห, แตห วัต เย ฆึห. บาย ยี แฮะ แยต เย ตัห ฌัม โดง กาฮ็อห นี, แตห เย บอกาเฆลียด ดี บอ ยัม โกบ ตู มึห เย ปี ดี โฮม.” เฆ แฮะ ฮอต ต็อห ปาย ตี เฌาพรา วี ต็อห ดี อาโมวแซ, “โอว ดี แตห ปี ดี โฮม โลง แคง ฆางหราว, แตห อึณ ปี ฆลาย โจห. ดอน ซีแง ดอน ซีแง เฆ ดูอี กืน โลว เลห ดึห อูน ปี ดี โฮม ตี. แตห เฆ ดึห อูน แคะ ปี ปึอน เฆ โฮม อาดา อู ซีแง. ปาย ตี โอว ดี เทว น็อห เฆ, โยว เฆ ดี โทม โดบ ปี จัร โอว เฆ โบง.

ดอ กอย เฆ โดง กาฮ็อห เซอีน ตี, เฆ ดูอี แบน น็อห ตู อึง อาโมวแซ ฆาย อาโรน บอ ปึณ ดี ฆาย.

แคง หมึร เฌาพรา ดี แตห เบ ปึอน ดี ฮาบ ยัง. ซีณวัห อัน ดี วี ดัว เบ โฮม บอ คามูน, แตห เบ ปึอน ดี โฮม แพ, โฮม แคะ ปี ม็อก เบ. วาย อัน ตี เบ ดี บอ นับ, ดอ ต็อห เบ โฆรห อี ตู หมึอม ตึอน, เบ แฮะ ต็อห โฆรห ตี ดี เฌาพรา.”

“โอว แฮะ โทม นา ตู หมึอม ปี ต็อห เฆ ดูอี อีซาเรลัะ. แตห แม กาลาง ดี เฆ, ‘อาตึร แปร หณัม อับ, เบ ดี ปึอน ดี ฮาบ ยัง. แคหณา ซีณวัห, เบ ดี ปึอน โฮม แพ คามูน. ดอ ยึร เบ ฌึร ตี ดอน โมยว, เบ ดี นับ, โอว มูห อัน เฌา อี มูห เฌาพรา ปี กรึบ เบ.’”