Popular Bible Verses from HEBRE 10

Share

Shada da hkrum zup hpawng de ai htung lai hpe nkau mi kau tawn da ai lam galaw nga ma ai; anhte gaw dai zawn n galaw ai sha, dai Madu bai du sa na shani ninghtoi ni wa magang ra ai hpe nanhte chye nga myit dai majaw, shada da grau nna n-gun jaw hkat nga ga.

Anhte gaw anhte shada da karum shingtau hkat na matu, shada da tsaw ra myit madun hkat let, mai kaja ai lam galaw na matu shada da myit tau myit htang hkat nga ga.

Anhte yin la kam sham ai makam masham a myit mada ai lam hta n shamu n shamawt hkra anhte maju jung nga ga; hpa majaw nga yang, Karai Kasang gaw shi tawn da ai ga sadi hta kangka re ai wa rai nga ai hpe anhte kam hpa lu ga ai.

Karai Kasang a myit ra ai lam hkan galaw na hte, shi a ga sadi ni hte maren akyu hkam la lu hkra nanhte myit galu kaba hkam sharang ra nga myit dai.

Dai re ai majaw anhte gaw mara lu dum ai kraw lawang ni hpe shachyoi shapra kau nna, anhte a hkum hkrang hpe mung san seng ai ntsin hte kashin kamun kau ngut jang, n shut n shai hkrak re ai makam masham hte Karai Kasang hpang de sit shani shang wa ga.

Dai re ai majaw nanhte a nden marai hpe hkum kau hkum tat myit, shing rai yang, nanhte shabrai kaba lu la na marin dai.

Hpa majaw nga yang, anhte gaw dai teng man ai lam hpe chye na hkam la ngut sayang me, yubak hpe dingsang galaw dingyang rai nga ga yang gaw, anhte a yubak mara a matu nawng ya na shagu hkungga naw nga sana n rai. Anhte gaw du na ra ai tara daw dan ai lam hte Karai Kasang hte nhtan shai ai ni hpe nat jahten kau na nachying hkrithpa wan hpe hkrit kahpra let ala nga na lam sha nga sai.