Popular Bible Verses from 1 PETRU 1

Share

Anhte gaw Madu Yesu Hkristu a Kawa Karai Kasang hpe shagrau sha-a nga ga; hpa majaw nga yang, shi a matsan dum ai myit kaba hte Yesu Hkristu hpe si mat ai kaw nna bai hkrung sharawt la ai a marang e shi anhte hpe asak sumdam ningnan bai jaw da mani ai rai nna anhte hta ahkrung nga ai myit mada shara jahpring shatsup ya mani ai. Dai rai nna anhte gaw shi a amyu masha ni a matu Karai Kasang kyem mazing da ai n taw n tsang re ai shaman chyeju ni hpe madu la lu na matu myit mada nga ga ai. Shi gaw n run n hten ai awu asin n re ai n wai n mat ai sali wunli ni hpe sumsing lamu e nanhte a matu kyem mazing da nu ai.

Nanhte hkrum hkra nga ai agung alau amyu myu a majaw ya jahkring jahkra yawn hkyen hkrum ra mat ti mung, dai hkye hkrang la ai lam a marang e nanhte akabu gara nga mu. Dai chyam dinglik hkrum ai lam gaw Karai Kasang hpe nanhte kam sham ai myit gaw jet nga ai kun? jen yu na matu rai nga ai. Jahten kau lu ai ja hpe pyi gaw wan hta ju shabyawng nna jen kau ra ai rai nna ja hta grau hpu reng ai nanhte a makam masham hpe mung ngang grin nga na matu jen kau hkrum lu na rai nga ai. Shing rai yang Yesu Hkristu bai dan pru ai nhtoi hta shakawn kungdawn ai, hpung shingkang hte arawng sadang hpe nanhte hkam la na marin dai.

Nanhte hpe shaga la ai Karai Kasang gaw chyoi pra nga ai hte maren, nanhte mung nanhte galaw ai lam shagu hta chyoi pra nga mu. Dai Chyum Laika hta mung, “Ngai chyoi pra nga nngai majaw, nanhte mung chyoi pra nga mu,” nga nna ka da nga ai.

Karai Kasang a ga hpe madat mara nna nanhte n chye n chyang re ai ni naw rai nga ai ten hta nanhte a myit shadang ai hku hkawm sa lai wa sai zawn matut nna hkum hkan galaw manu.

Dai re ai majaw, nanhte amu galaw shamu shamawt sa wa na matu nanhte a myit masin ni hpe shajin da mu. Yesu Hkristu dan pru ai shaloi e nanhte hpe jaw ya na ra ai chyeju hpe ung ang ai myit n rawng ai sha amaja nga let tsep kawp myit mada ala nga mu.

Dai gaw Chyum Laika hta, “Shinggyim masha amyu baw yawng gaw tsingdu zawn rai nga ai; shanhte a hpung shingkang yawng mung nam na nampan pu hte bung nga ai. Dai tsingdu gaw nyui mat wa nna nampan pu ni run hkrat mat ma ai. Rai ti mung Madu a mungga chyawm gaw prat mi hte prat mi anga nga ai, nga nna tsun da nga ai. Dai mungga gaw nanhte hpe hkaw tsun dan sai Kabu Gara Shiga rai nga ai.