Popular Bible Verses from Apoclipsis 8

Share

Jee maáréꞌ ya̱ kúvi Lanchi Lúlí jee sáá nsine re̱ꞌ seyúꞌ uxáꞌ ya̱ nnasɨꞌ yuꞌú tutuꞌ vá, jee níín nkuvi antivɨ́ súkún yatin sava hora.

Jee najiáꞌáꞌ ííꞌ xíꞌnañúꞌún nti̱vɨ̱ꞌ‑ɨ trompeta‑a. Saájee nkuun ñɨ́ñɨ́ jín ñuꞌunꞌ iniꞌ ñɨ̱vɨ́, jee sákánuun jín ni̱ñɨ̱ꞌ. Jee nka̱yu̱ꞌ ɨɨn ya̱ uníꞌ parte ñɨ̱vɨ́, jín ya̱ uníꞌ parte rá yutun, jín nɨꞌɨ rá ku̱ꞌu̱ꞌ kuíí.

Saájee niniꞌ ni̱ꞌ ɨɨn ta̱su̱nꞌ jíkó‑o nu̱u̱nꞌ ta̱chi̱ꞌ víjin sava súkún jee nteso̱ꞌo ni̱ꞌ ya̱ ne̱ laxín kánajíín ti̱ꞌ jee káchíꞌ ti̱ꞌ: ―¡Na̱ ka̱ꞌ náꞌví náꞌví náꞌví ka̱ꞌ rá ñɨvɨ ya̱ nééꞌ iniꞌ ñɨ̱vɨ́!, chi ya̱ nku̱yatin sa̱néꞌ vá íyó tivɨꞌ u̱ni̱ꞌ ka̱ꞌ rá trompeta kúmániꞌ ya̱ íyó tivɨꞌ u̱ni̱ꞌ ka̱ꞌ rá najiáꞌáꞌ ííꞌ maa ―nkachiꞌ ta̱su̱nꞌ vá.

Jee najiáꞌáꞌ ííꞌ uvíꞌ nti̱vɨ̱ꞌ‑ɨ trompeta‑a. Jee ɨɨn ya̱ íyó kuéntáꞌ ɨɨn yuku máá káꞌnú tɨ́ɨn ñuꞌunꞌ itaꞌ maa káyúꞌ‑u, jee nsi̱kéne maa nkininkava‑a nu̱u̱nꞌ nteñúꞌún. Jee ɨɨn ya̱ uníꞌ parte nteñúꞌún nnuvi maa ni̱ñɨ̱ꞌ nsa̱ꞌá‑a.

Jee najiáꞌáꞌ ííꞌ uníꞌ nti̱vɨ̱ꞌ‑ɨ trompeta‑a. Jee ne̱ antivɨ́ súkún nkene ɨɨn tiu̱u̱nꞌ maa káꞌnú víꞌí nkininkava‑a va̱ji‑i tɨ́ɨn ñuꞌunꞌ itaꞌ maa káyúꞌ‑u, kuéntáꞌ kua̱ꞌ tɨ́ɨn ñuꞌun itɨ sújié. Jee ñe̱te̱ꞌ‑e nu̱u̱nꞌ ɨɨn ya̱ uníꞌ parte rá ntekáꞌnú jín nu̱u̱nꞌ kéne rá nute. Jee tiu̱u̱nꞌ vá naní‑i Tiu̱u̱nꞌ U̱va̱ꞌ. Chi nkuu̱va̱ꞌ víꞌí rá ni uníꞌ parte rá nute vá nsa̱ꞌá‑a. Jee kue̱ꞌe̱ꞌ víꞌí rá ñɨvɨ ni̱ꞌi̱ꞌ ráa nsa̱ꞌá nute vá, chi nkuu̱va̱ꞌ‑a.

Jee najiáꞌáꞌ ííꞌ kúmíꞌ nti̱vɨ̱ꞌ‑ɨ trompeta‑a. Jee ɨɨn ya̱ uníꞌ parte nka̱niiꞌ, jín suni ɨɨn ya̱ uníꞌ parte yo̱o̱ꞌ, jín suni ɨɨn ya̱ uníꞌ parte rá tiu̱u̱nꞌ nti̱vɨ́ ráa. Jee nnu̱neenꞌ rá parte vá, jee ntu ka̱ꞌ túúnꞌ ñuꞌunꞌ ráa ya̱ uníꞌ parte nuví ya̱ uníꞌ parte yakuááꞌ.