Popular Bible Verses from યાકૂબ નો 3

Share

પુંણ ઝી જ્ઞાન પરમેશ્વર ની તરફ થી આવે હે, વેયુ પેલ પવિત્ર થાએ હે, ફેંર મેંળભાવ વાળું, નરમ અનેં હમજદાર અનેં દયા અનેં તાજં કામં થી ભરાએલું અનેં પક્ષા-પક્ષી વગર નું અનેં ઈમાનદાર થાએ હે.

તમં મ જ્ઞાની અનેં હમજું કુંણ હે? વેયુ એંવું વેહ ઝી એક અસલ જીવન જીવવા દુવારા, અનેં હીની નરમાઈ દુવારા, ઝી તમારા જ્ઞાન થી આવે હે, અસલ કામં કરેંનેં વતાડે.

અનેં ઝી મેળ કરાવે હે, વેય શાંતિ નું બી વાવે હે, અનેં વેય ધાર્મિકતા ની ફસલ કાપહે.

કેંમકે ઝાં બળતરા અનેં મતલબી સોભાવ રે હે, તાં હાએ-હાએ અનેં દરેક પરકાર ની ભુંડાઈ થાએ હે.

ઇનીસ જીબ થી આપું પ્રભુ અનેં બા પરમેશ્વર ની સ્તુતિ કરજ્યે હે, અનેં એંનેં થીસ મનખં નેં ઝી પરમેશ્વર ના રુપ મ બણાવવા મ આય હે, હરાપ આલજ્યે હે. એકેંસ મોડા થી ધન્યવાદ અનેં હરાપ બે યે નકળે હે, હે મારં વાલોં, એંવું નેં થાવું જુગે.

જીબ હુદી એક આગ નેં જેંમ હે, અનેં આ શરીર નો વેયો ભાગ હે ઝી ભુંડાઈ થી ભરેંલો હે, જીબ એક મનખ ના આખા શરીર નેં અશુદ્ધ કર દે હે, અનેં પૂરા જીવન મ આગ લગાડ દે હે, અનેં નરક ની આગ થી બળતી રે હે.

પુંણ જીબ નેં કુઇ મનખ કબજા મ નહેં રાખેં સક્તું, વેયે એક ઇવી ભુંડાઈ હે, ઝી કેંરં યે રુંકાતીસ નહેં, ઝી એક હાપ ના જેર નેં જુંગ જીવ નેં નાશ કરે હે.

હે મારં વાલોં, તમં મહં ઘણં બદં પરમેશ્વર ના વસન નેં હિકાડવા વાળં નહેં બણો, કેંમકે બીજં મનખં કરતં વદેંનેં આપડો નિયા કડક રિતી થી કરવા મ આવહે.