Popular Bible Verses from Pamoil. 12

Share

Arakalaakean nia kalulut logau Togat Biribiri, samba tiboiet pasimunenganda. Samba ta arakiliu enganda teret matei.

Lepa arepkungan nganga sabeu ka sorga sipasikukua, “Kineneiget amoian puaragat samba gege samba purimataat Taikamanuanta, samba geget Kristusnia, airibbaiakean poi sipangandu sasarainanta, sinago sinoibo ka matat Taikamanuanta.

Oto turibbaiake le naga sabeu nenda si ulou siburu, oniakenen Sanitu ele Setan, sipepeake sangalio polak; turibbaiake nia ka polak sambada samalaikania.

Kalulut nene, puangka kam baga sorga, samba sangamberi sikuddu ka bagania. Paan te ka kam polak samba koat, atugorosotnan poi Sanitu ka kam, ka bagat golunia sabeu, iagai poi taan mauju teterenia.”

Ia geti bara ibara pasaggangan ka sorga. Mikael sambada samalaikania masisaggangi naga, naga leu sambada samalaikania masisaggangi si Mikael.

Magolunangan bagat naga ka tubut sinanalep, einangan leu masisaggangi sapunuteteunia sipulelegei, ia te sipasirereddet surukat Taikamanua samba siometnake pasimunengan Jesus.

Ia geti matoilanangan sara katuaggaiat sabeu ka manua: Sara sinanalep sipusosobbe sulu, samba laggo ka tei rerenia samba ka utenia sara kirit purimataat pulu rua panyanyat. Sinanalep nenda ai suruketnia, samba kalulut aian nia masioorik masitutuake matat toga, pugereinangan besinia.

Ia geti tutuakenangan matat toga simanteu, sibailiu sipaneinei sangamberi bangsa mututura laba; tapoi atulalau le togania ambit ka Taikamanua samba ka uddenan purimataatnia. Putuituinangan sinanalep mei ka simatangeu, sedda aitarekngakean Taikamanua kudduatnia bule itupasikeli nia 1260 ngagogoi burunia.

Lepa toila minca katuaggaiat bagei ka manua, ia te sara naga sabeu simabonan, sipitu ute samba sipulu ban, samba ka utenia ai pitu kirit purimataat. Paipainia masigirit sapartelu panyanyat ka manua, ribbaiakenangan nia ka polak. Purionangan naga nenda ka matat sinanalep sipatarek tubu masitutuake matat toga, kei tutuna le matat toga, guknangan nia.

Tapoi ka sinanalep atukauan rua kappot manyang sabeu, bule ituburut ka kudduatnia ka simatangeu, itupasikeli nia sedda ka bagat sara tetere samba rua tetere samba sitenga tetere burunia, tuareu ka matat ulou. Lepa buraiakenangan oinan ka ngungunia ulou kele bat oinan ka ipot sinanalep bule iraggaiake nia oinan. Tapoi oi polak masiromake sinanalep; ngangaakenangan ngungunia, guknangan nenda oinan siburaiakenen naga ka ngungunia.