Popular Bible Verses from Roma 5

Share

Mar, Allah labe dari itu. Waktu katong masi ada dalang dosa, Yesus Kristus mati par tabus katong pung dosa-dosa. Deng cara itu, Allah kasi unju kalo Antua paleng sayang katong.

Kalo katong taru harap par Allah, katong seng malu. Barang, katong bisa rasa Antua pung sayang yang Antua kasi batambong-tambong dalang katong pung hati, tagal Antua su kasi Antua pung Roh par katong.

Mar bukang cuma itu sa. Katong pung hati jua paleng sanang waktu katong susa deng sangsara, tagal katong tau kalo susa deng sangsara biking katong tahang hati. Kalo katong tahang hati, akang biking Allah pung hati sanang. La kalo katong pung kalakuang tu biking Allah pung hati sanang, akang biking katong labe taru harap par Antua.

Basudara e! Allah bilang kalo katong su jadi batul di muka Antua tu tagal katong parcaya Yesus. Tagal itu, katong bisa hidop dame deng Allah tagal apa yang katong pung Tuhan Yesus Kristus su biking. Tagal apa yang Kristus biking tu, jalang tabuka par katong par tarima Allah pung hati bae tarus dalang katong pung hidop, asal katong parcaya. La katong pung hati paleng sanang tarus tagal katong batul-batul harap kalo Allah nanti biking katong pung tabiat jadi sama deng Antua pung tabiat.

Katong seng kuat par tolong katong pung diri par kaluar dari dosa. Mar justru waktu itu, Kristus mati par tabus katong orang-orang yang seng dengar-dengarang Antua. Deng cara bagitu katong tau kalo Antua sayang katong.

Jadi kalo Yesus su mati par tabus katong yang parcaya pung dosa-dosa, Antua jua nanti pasti kasi salamat katong dari Allah pung morka. Barang, sakarang ni Allah su bilang kalo katong su jadi batul di muka Antua, tagal Yesus pung dara su tatumpa par tabus katong.

Jadi, tagal satu orang seng dengar-dengarang Allah pung parenta, banya orang jadi bardosa. Bagitu jua, tagal satu Orang dengar-dengarang Allah pung parenta, banya orang bisa jadi batul di muka Antua.

Deng bukang itu sa. Katong jua paleng sanang tagal lewat apa yang katong pung Tuhan Yesus Kristus biking, katong bisa baku bae deng Allah.