Popular Bible Verses from Roma 12

Share

Jang kamong hidop sama deng orang-orang yang seng taku Allah di dunya ni. Mar kasi biar Antua roba kamong pung pikirang jadi baru, sampe kamong pung tabiat jadi baru. Deng bagitu, kamong bisa tau mana Antua pung mau. Beta pung maksud, kamong bisa mangarti deng biking apa yang bae, apa yang batul-batul jadi Antua pung mau, deng apa yang biking Antua pung hati sanang.

Sio basudara e. Tagal Allah su kasi unju Antua pung hati bae par katong, beta minta deng sunggu-sunggu dari kamong par kasi kamong pung diri antero-antero par Allah. Kalo kamong biking bagitu, kamong sama deng korbang yang masi hidop, yang dapa kasi par jadi Allah pung, deng yang biking Allah pung hati sanang. Itu tu cara somba Allah yang batul, yang kamong parlu biking.

Kamong pung hati musti sanang, tagal kamong tau kalo kamong taru harap par Tuhan! La mari tetap tahang hati waktu susa deng sangsara deng salalu sombayang siang-malang!

Jadi, jang paskali balas orang yang biking jahat par kamong. Kalo kamong biking bagitu, itu sama sa deng kamong su dapa kasi kala. Mar labe bae kamong biking hal-hal yang bae par dong. Deng bagitu kamong su kasi kala hal-hal yang jahat.

Mari baku sayang satu deng laeng, tagal kamong samua tu sama-sama sudara. La mari taru hormat par satu deng laeng, labe dari par katong pung diri sandiri.

Basudara e, sayang orang laeng deng hati antero-antero, jang deng pura-pura. Binci apa yang jahat, mar pegang kuat-kuat apa yang bae.

Kamong musti usaha tarus par hidop dame deng samua orang.

Basudara samua yang beta sayang! Jang balas orang yang biking jahat ka apapa yang seng bae par kamong. Kasi biar Allah yang nanti hukum dong. Barang, dalang Antua pung Tulisang ada bilang kata, “Beta yang pung hak par balas. Beta yang nanti hukum!” Itu tu yang Tuhan bilang.

Mari karja deng samangat par Tuhan, jang pamalas!

Tagal Allah su kasi Antua pung hati bae par beta, beta mau kasi nasehat kamong samua: Jang anggap diri labe tinggi dari apa yang batul. Mar, kamong musti nilai kamong pung diri deng ukurang yang pas. Beta pung maksud, kamong musti nilai deng batul kata Allah su kasi berkat rohani apa par kamong satu-satu tagal kamong su parcaya Antua.

Jang balas kajahatang deng kajahatang. Usaha tarus par biking apa yang bae biar samua orang bisa lia kalo apa yang kamong biking tu bae.

Kamong musti hidop bae deng orang laeng. Jang ada yang anggap diri labe panting dari orang laeng, mar baku tamang deng orang yang orang laeng anggap seng panting. La jang anggap diri pintar la mangarti deng akang.

Mala kamong musti biking apa yang tatulis dalang Allah pung Tulisang ni, “Kalo kamong pung musu lapar, kasi makanang par dia. Kalo dia aos, kasi aer par dia minong. Kalo kamong biking bagitu, dia nanti rasa malu sandiri deng apa yang dia su biking par kamong.”

Minta Tuhan kasi berkat par orang-orang yang siksa kamong. Minta berkat, jang minta kutok! La kalo ada orang yang sanang, kamong jua musti sanang sama-sama deng dong. Kalo ada orang yang manangis, kamong jua musti manangis sama-sama deng dong.

Kalo ada orang-orang parcaya yang kurang apapa satu bagitu, tolong dong. La kalo ada orang-orang parcaya yang pi ka mana-mana bagitu, tarima dong par manumpang di kamong pung ruma!

Sama deng katong pung badang ni satu sa, deng akang taika dari banya bagiang yang beda-beda, mar samua tu seng karja deng cara yang sama, bagitu lai deng katong yang su parcaya Kristus ni. Biar kata katong banya, mar katong samua taika jadi satu badang, tagal katong samua satu hati deng Kristus. La biar kata katong ni beda-beda, mar katong musti baku tolong tagal katong samua ni bagiang-bagiang dari badang yang sama.