Popular Bible Verses from Yakobis 3

Share

Mar orang yang mangarti banya hal yang batul-batul dari Allah, dia tu pung hati barsi, suka hidop dame deng orang, hidop manis deng orang, mau dengar orang laeng pung bicara, paduli deng orang yang susa, deng suka biking bae par orang. Dia jua seng barát sabala deng seng munafik.

Basudara e, kalo ada dari kamong yang bilang kalo dia tu pung pikirang tajang deng tau apa yang sala deng apa yang batul, dia musti kasi unju akang dalang dia pung hidop yang bae. Dia musti randa hati deng hidop manis-manis deng orang, sama deng orang yang batul-batul mangarti banya hal.

Sapa yang suka hidop dame deng orang laeng, dia nanti biking orang laeng hidop dame lai. La akang pung hasil, dong samua hidop iko Tuhan pung mau.

Barang, kalo dia masi culas deng pikir diri sandiri, dia pasti bakalai deng orang laeng deng biking macang-macang kajahatang.

Katong pake akang par puji-puji Tuhan Allah, Bapa yang katong somba. Mar, katong jua pake akang par maki deng sumpa orang yang Allah su biking iko Antua pung model sandiri. Dari katong pung mulu yang sama, katong kasi kaluar kata-kata par puji Tuhan deng kata-kata par maki deng sumpa orang. Sio basudara e, jang paskali macang bagitu!

Sama deng api yang bakar utang satu sampe abis, bagitu lai deng katong pung mulu. Mulu tu bagiang dari katong pung badang yang bisa kasi ancor orang laeng kalo katong pake akang par bamaki, basumpa, deng bicara yang tarbae-tarbae. Kalo katong pake akang par hal-hal yang jahat tarus, akang bisa kasi ancor katong pung hidop. Barang, hal-hal jahat yang kaluar dari katong pung mulu tu, akang sama deng api yang asal dari naraka.

Mar balong ada satu orang lai yang bisa kasi jina mulu. Mulu tu paleng jahat. Seng ada orang yang bisa ator akang. Akang pono deng racong yang bisa biking mati orang.

Basudara samua e, jang banya dari kamong yang mau jadi guru par Allah pung ajarang. Barang kamong tau, kalo katong yang ajar Allah pung ajarang seng biking apa yang katong ajar, Antua nanti hukum katong labe barát dari dong yang seng ajar Antua pung ajarang.