Popular Bible Verses from 2 Timotius 1

Share

Barang, Allah kasi Antua pung Roh par katong orang parcaya, bukang par biking katong panaku, mar par biking katong kuat, baku sayang, deng tau bawa diri bae-bae.

Antua su kasi salamat katong deng panggel katong par jadi Antua pung orang-orang yang seng bardosa. Antua biking bagitu bukang tagal katong su biking apapa yang bae, mar tagal Antua su ator akang deng tagal Antua pung hati bae par katong. Tagal Antua pung hati bae, dari waktu Antua balong biking dunya lai, Antua su ator par utus Yesus Kristus.

Tagal itu, beta mau kasi inga ale kalo ale musti labe samangat lai par pake kuasa yang Allah su kasi par ale tu. Ale su tarima kuasa tu waktu beta taru beta pung tangang di atas ale.

Jadi, jang malu par kasi tau soal Yesus Kristus, Tuhan yang katong somba tu. Jang malu lai deng beta yang maso bui tagal karja par Antua. Mar deng kuasa yang Allah su kasi par ale, mari tanggong sangsara sama-sama deng beta tagal katong kasi tau Antua pung Kabar Bae.

La tagal itu sampe beta susa deng sangsara dalang bui. Beta susa deng sangsara mar beta seng malu, tagal beta kanal batul sapa tu Kristus yang beta parcaya. Beta jua seng malu tagal beta batul-batul parcaya kalo Antua bisa jaga beta pung karja yang Antua su parcaya beta par biking akang. Antua pasti jaga akang sampe Antua bale kombali ka dunya ni par putus manusia pung parkara.