Popular Bible Verses from 1 Korintus 5

Share

Mar, yang beta maksud tu jang batamang deng orang-orang yang bilang kalo dong tu sudara yang parcaya Yesus, mar tidor deng orang yang bukang dia pung laki ka bini, baringing, bahojat, somba patong-patong, pamabo, deng ambe orang laeng pung barang deng paksa. Mala, jang dudu makang sama-sama deng dong lai.

Tagal itu, kamong musti buang kamong pung kajahatang jau-jau, sama deng orang Yahudi buang ragi samua waktu hari Paska. Deng cara bagitu, kamong jadi orang yang seng ada pung sala deng kajahatang, macang deng adonan baru yang seng pake ragi. Barang, kamong tu memang su seng ada pung sala deng kajahatang, tagal Kristus su tabus katong pung dosa-dosa. Antua tabus katong pung dosa-dosa, sama deng domba ana yang orang Yahudi jaga kasi waktu Paska par jadi korbang par tabus dong pung dosa-dosa.

Barang, beta pung urusang apa par nilai orang-orang yang seng parcaya Yesus tu? Allah sandiri yang nanti putus dong pung hukumang par dong pung dosa-dosa. Mar kamong, kamong yang musti putus hukumang par jamaat yang biking dosa, macang apa yang tatulis dalang Allah pung Tulisang kata, “User sapa sa yang biking dosa dari dalang jamaat!”