Popular Bible Verses from Filipi Uram 4

Share

Sunci yuk dinyi-yuk dinyi ati teneiramunci, mambul kiringna kanya bobmunyei. Eda, sunci sun ataransici tok nun Nai Imtamnyi bisi lak ena teleb. Ati, sunci sun ataransici dinyi nun Nai urasintam asi lak ebokabmunci, “Nai, Kanci nun milibsurum,” eboka molona teleb. Tonda, sunci moloramunci, nun Nai bisi, “Ei nun Nai,” eboka kina teleb.

Sunci ato kuramunyi ura, nun Nai Imtamnyi biryi sun kanya teleb akwe weik kubdeibkwansir. Ba, sunda nun Du Yesus Kristus dam kun nang kurandum ati, nun Nai biryi sunsi teleb kanya kareboka kalikwansir. Ninyi aryi mambul dinyi kurdeiriransingnyi ababyi, nun kanya ara teleb akwe weik kuransir. Nun Nai biryi nun kanya teleb akwe kurdeiriransir ara iya teleb dinyi ton, ninyi aryi kanya teneibdenman kum dinyi kurur ati ebman.

Ura, ni kwit yabwe, sirya kobdob uram ebsiniryok, ato ebdeibkwinsin. Sunci, dib en uram asi teneibde bindarur. Tonda, bikdob dinyi asi teneibde bindarur. Tonda, u dikum tenen dinyi asi teneibde bindarur. Tonda, iya teleb dinyi kunubde ban dinyi asi teneibde bindarur. Tonda, ninyi kanya kilkil kimna dinyi asi teneibde bindarur. Tonda, ninyi aryi kisal dangna dinyi asi teneibde bindarur.

Nun Du biryi nisi mikib kubdeiboka milinurur deyok aryi, niryi katabum kanya boboka kwaning atana ab, mambul kurdeirin dinyi yuk dinyi ababyi bonun ati ebman.

Sunci, “Nun Du dam kun nang kunub,” tenebokabmunci, sun kanya ara tuba-tuba kilkil kuna teleb. Niryi tubto ebtabakwinsin, “Sun kanya kilkil kuna teleb.”

Nun Nai Imtamnyi ni milinunyi bira sun Filipi nang ataransici tok nirya langdeiboka kunubdeibkwansir. Nun Nai bira langdeiboka kisal dangsururnyi kurur to, Erci nun Du Yesus Kristus biriman aryi langdeiboka kisal dangsina teleb.

Ba, sunsi niryi etereransise uram ab, kekerandum uram ab, dororandum uram ab, niryi kunuran ba, asing eirirandum dinyi ab asi kunubde bindarur. Ba, ato kubmunyi uca, nun Nai Imtamnyi biryi ninyi nirya teleb akwe kurdeiriransiranyi bira sun ab tonkwa kuna teleb.

Yuk nang dam urasintam asi namin kanya bobokabmunci, tuba-tuba teleb kubdarur. Nun Du Kristus bira nun dam kurur ati ato ebman.

Ton tum ara kwaning atanmanici ani, yuk tum ara kwaning langdeiboka kuranir. Uki-uki nirya kuraniryok, kilkil kanya bonun ati bingdoran. Ara, kwaning boubmanici talak ababyi, kwaning atabnici talak ababyi, ni kanya tuba-tuba kilkil kuranir.

Niryi, “Utotoa-utotoa dinyi nisi atanmanir,” tenen mambul kiringna kanya kum bonun ati ebman. Atan kurana ababyi, atan kum kurana ababyi, ni kanya teleb kuranir ati ebman. Ni kubde baranse uca, atan kurana talak ababyi kilkil kanya boranse ati bingdoranse.