Popular Bible Verses from Filipenses 3

Share

Gin aaduñi, kïïga maatï aanï sai mai kia kïïgakïrï ïpïan tuiga aanï Suxi Kristo dïï gia mai buamï ïrhidi aanï ixtumaxi idui aanï baasïkioma dai bhaiyoma kabami gin aajagïi aanï buamï in ïrhiditai ixtumaxi iduña iñagai xibi abhiadïrï bhaitiakoga. Diuxi gin báí saidi bhïna aanï ïmo gïdukami maitïki. Dai kaxkïdï kabami gin aajagïi aanï bhïiya iñagaitai go maitïki ix makïdï ïr go tïbagiïrï oidakaragai ix makïdï bia aanï bïïnakami dakatai aanï Suxi Kristo.

Gin aaduñi, kïïga biaka in ïrhidi bamioma urabaragai Suxi Kristo ïmadï. Taata in ïrhidi sai kïïga gubuakami dukai gaatabuadagi ïgai gin ïmadï ïpïan dukai ix dukatai gubuakami aatadui Diuxi go Suxi ïmadï aidïxi duakaturhi ïgai. Biaka in ïrhidi urabaragai Suxi ïmadï soimaaxi taatakai aanï ïpïan dukai xi taata ïgai. Ïpïan tuigaka in ïrhidi aanï Suxi Kristo asta xako ukami bhai gin dukagi ix mukiagi ïpïan dukai ïgai. Dai tomax dukai buaboitudai aanï sai gin duakatuda agai Diuxi ïpamu koidadï saagidañdïrï.

Daiñi, aanï in bïïtarï gïïpi bamioma namïga sai urabaka aanï Suxi Kristo gin Tïanïdamiga dai bïïxi gobai ix tumaxi ibuadana aanï ïkioma ka mai namïga in bïïtarï. Ïmo boixibharu dukai nïidi aanï bïïxi gobai ix makïdï ibuadana aanï tudu. Bïïxi gobai ka dagito aanï tudu sai podukai biakana aanï urabaragai Suxi Kristo ïmadï

Ïkioma buaboitudaiña aanï saidi ïr soiñikatadai bïïxi gobai gin bituldaraga dai gin aaduindaga. Dïï gia xibi ka maatï aanï sai maiti ïr soiñi gobai toma lïïchi. Xibi buaboitudai aanï Suxi Kristo bhaiyoma.