Popular Bible Verses from Efesios 3

Share

¡Gï agai tudu xi kïïga xadutuadagi aatïmï Diuxi! Ïgai gubukarhigadï tudu aatabuayi gïr ïrabiadïrï. Dai ïgai bia gubukarhigai ixtukïdï ibuadagi gïïpi bamioma ixtumaxi xi bhai ix makïdï aatïmï bhaiga xi gïr tïgitoagi xi ïpï xi tañiagi ïpï. Kaxkïdï Suxi Kristo gubukarhigadïkïdï gï agai xi aatïmï buaboitudadami maaxitudagi xïïxi ïr gïdukami Diuxi dai xïï kïï gubuka dai xi maaxituda aatïmï gobai bïïxkïrï bïïtarï. ¡Agia ïr buaboi gobai!

Kïïga maatï aanï sai Diuxi kabami ïr gïdukami kaxkïdï daanïi aanï saidi Ibhïadïkïdï gïn maakana ïgai gubukarhigai gïn ibïgaïrï. Daanïi aanï sai Suxi Kristo kïïga biakagi oidagakaradï gïn iibhïdagïrï kïïga buaboitudaitai aapimï. Dai sai kïï kabakami dukai gukibana aapimï maatïkatai xïï kïïga gïn oigïdai Diuxi. Podukai aapimï ïmadï bïïxi go gaa buaboitudadami kïïga maatï kaïkamu xïï kïïga dai xïï kabami gïn oigïdai Suxi Kristo. Daiñi, odami tïgibudadï mai ajïi xi maatï kaïkagi xïï kïïga gïr oigïdai Suxi Kristo. Dïï aanï daanïi Diuxi sai gïn soiñana xi kïïga maatïkagi aapimï xïïxi gïr oigïdai ïgai. Aidï gia Diuxiañdïrï biakamu aapimï bïïxi aïkatai ixtuma biïgakagi gïn iibhïdaga bïïtarï.

Suxi Kristo kïïga idui ixdukatai Diuxi gï tïgito ïïki kaxkïdï aatïmï xibi mai duadimudakïdï aatagïi Diuxi ïmadï mos buaboidakai aatïmï Suxi Kristo. Xibi kïïga bia aatïmï ïïmadaragai ïmadï Diuxi.