Popular Bible Verses from 2 Pedro 1

Share

Gin aaduñi, kaxi gïr maa Suxi Kristo bïïxi aïkatai ixtumaxi tïgito aatïmï buaboitudadami saidi bhaigakana aatïmï xi kïïga buañixikami oidakagi Diuxi buitapi. Podui ïgai ïïgi gubukarhigadïkïdï tudu Diuxikatai ïgai. Ka máí aatïmï Suxi Kristo tudu dai kaxkïdï gïr maa ïgai bïïxi ixtumaxi tïgito aatïmï. Gïr tïtïgidi ïgai xïïxi ïr gïdukami ïgai tudu dai xïïxi kïï tuiga ïpï dai ka maatïkatai aatïmï gobai ka ipïrhi aatïmï xi oijadagi. Gïr tïtïïgidi ïgai xïïxi ïr gïdukami ïgai dai xïï kïï tuiga dai gobai ïr ïmo abïnakidaragai dukai gïr bïïtarï ix urabagi aatïmï. Podukai gïr abïnaki ïgai ix urabagi aatïmï tudu. Dai gïr aagidi Suxi mui ñoki kïïga gupukami dai kïïga namïakami ïpï dai ïgaikïdï gï báí ïgai saidi gïr maaki agai naana maaxi kïkïïgadukami ixtumaxi. Sïïrhikïdï gubuka ïgai tudu dai kïï tuiga dai kaxkïdï gïr aagidi ïgai go naana maaxi namïakami ñoki gobai. Dai go ñoki ix makïdï gïr aagidi ïgai gïr maakai tïgibudadï Diuxi saidi ka biakatai aatïmï tïgibudadï Diuxi ka ïpïan tutiakana aatïmï ïgai. Kaxkïdï tomaxi soimaaxi iduña ïrhidi go óídakami ix makïdï mai buaboitudai dai naana maaxi oidaga soimaaxkami tami oidigi daama bïïxkïrï kïïgakïrï bubuakïi aatïmï go soimaaxkamiañdïrï.

Kaxkïdï ka maatïkatai aapimï ixtumaxi idui Diuxi gïr bïïtarï gï agai sai kabami gïn aajagïdagi aapimï dai apia oijadagi gïn buaboidaraga kïïga buaboitudaitai aapimï Suxi Kristo. Dai bhodïrï ka kïïga buaboitudaitai aapimï gï agai ïpï sai kabami gïn aajagïdagi dai kïï bhai tutiakagi ïpï mai soimaaxi ibuadatai. Dai bhodïrï ka kïï bhai tutiakatai aapimï gï agai ïpï sai kabami gïn aajagïdagi dai bamioma mamaatïrdagi ixtumaxi ïr buaboi. Dai bhodïrï gï agai sai maatiagi aapimï ixdukatai gïn nukadakagi ïpï sai maiti ibuada aapimï soimaaxkami ix makïdï gïn tanïdagi ïïgi gïn tïgibudaga. Dai bhodïrï gï agai sai apia buaboitudada aapimï ïpï xïïxkadï soimaaxi taatamadagi aapimï. Dai gï agai ïpï sai ïïgiada aapimï Diuxi bïïxi aïkatïrï ixtumaxi ibuadagi aapimï. Dai bhodïrï ka kïïga ïïgiditai aapimï Diuxi gï agai ïpï mïx kïïga oigïdadagi aapimï gïn aaduñi Diuxi amadïrï ïmo gïn xïgïmï dukai. Dai bhodïrï gï agai sai oigïdada aapimï bïïxi go gaa óídakami ïpï. Podukai abïr óídaka tudu maatïkatai ixtumaxi idui Diuxi gïr bïïtarï.

Daiñi, ix bïïx tasai bamioma po tutiakagi aapimï ix dukatai ojixi tami, gobai gïn soiñamu sai bamioma kïïga ïmadagi aapimï Suxi Kristo Gïr Nukadakami. Dai kïïga ibuadamu aapimï naana maaxi ixtumaxi kïkïïgadukami ïpï ka kïïgioma ïmadatai aapimï Suxi.

Maiti abïr pobuada aapimï gin aaduñi dai bhaiyoma abïr kabami gïn aaga daidi kïï bhai tutiaka ix dukai aagai idi ojai. Podukai maatiga maaxkamu sai buaboikïdï ïr ïko bubaidadï aapimï Diuxi. Ix kabami gïn aagagi dai kïï bhai tutiakagi ix dukai aagai aanï aidï gia tomarhi ïmo imidagai mai gïpiïrï surhigimu aapimï.