Popular Bible Verses from 1 Korintios 15

Share

Kaxkïdï gin susukurhi abïr mai dagitokai buaboitudada. Daidi abïr kabami gïn aaga iduñi aaduindadï Gïr Nukadakami bïïxi gïn bhai ïrhiarakïdï. Kïïga maatï aapimï tudu sai duduakamu aapimï ïpamu bïïna darakatai aapimï Gïr Nukadakami dai kaxkïdï ïpï kïï maatï aapimï sai mai mos ïïgikïdï ibuayi aapimï gïn aaduindaga.

Dïï gia Suxi Kristo ïgai daidi ïr Gïr Nukadakami dai kaxi gamaitï ïgai go mukigami. Dai aatïmï kaxi gamaitïkami bii ïpï go soimaaxi ïmadï go mukigami bui ka bïïna darakatai aatïmï Suxi Kristo. Gï agai tudu ix aagidagi aatïmï Diuxi xïï bhai gïr ïrhidi aatïmï ïgai bui kïïgakïrï gïr bubaidakai ïgai.

Maiti abïr gïn dagito tudu ix gïn bupuirumadagi ix makïdï pomaaxi ñokai. Kïïga maatï aapimï sai xorai urabagi pupuirugami gï sarabidamu ïgai go soimaaxi tïgibudagai tomax xïï kïïgadukatadai ïgai tïgibudadï mai kia gaurabakai.

Sïïrhikïdï kïï tuiga Diuxi gin bïïtarï tudu ix kaxkïdï otosadï gin dáí ïgai. Dai kïïga ibuayi soiñi xi otosadï gin dáí Diuxi kaxkïdï tudu gin maakai ïgai gubukarhigai sai ibuadana aanï naana maaxi aaduindagai. Dai asta kabamioma gin aaga aanï ix bhai go gaa ojotosadï Suxi. Dïï mai xu ix ïïgi gin gubukarhigakïdï ibuayi aanï go aaduindagai. Diuxi ïgai dai aatabuayi aanïkïdï bhaiyoma kïï tuigakatai ïgai gin bïïtarï.

¿Kaxkïdï dukatai gïr maitïna go mukigami xibi? ¡Diuxi ka maitï gobai di! Kaxkïdï ka mai bia gubukarhigai go mukigami gïr bui, ikaiti go ojai. Daiñi, oidaga soimaaxkami oidigi daama dai abhiadïrï buiyi gubukarhigai go mukigami óídakami bui. Dai xïïxkadï oidakagi sïïrhikami bamioma gubuakan buayi go soimaaxkami. Kaxkïdï tudu go sïïrhikami ïr ïgai dai gïpiïrï bupai óídakami xïïxkadï soimaaxi ibuadagi.

Dïï gia gïn aagidamu aanï ïmo ixtumaxi ix makïdï mai maatïkana odami ïkioma. Daiñi, ïïmadutai aatïmï buaboitudadami mai koiyagi ragai. Dïï gia bïïxkatai aatïmï ïmapïduñimu todian dukai. Gï kaidatudamu go kugatïrï trompeta bai ix xïï otoma gï kupiokïi ïmoko pokaxi otoma ïmapïduñimu aatïmï. Amaxi gï kaidatumu go trompeta baidi go buaboitudadami ix makïdï ka koi duduakamu ïpamu dai ka biakamu gïn tukuga ix makïdï mai ugiatïi. Dai buaboitudadami ix makïdï kia óídakagi aidïpïrï todian dukai ïmapïduñimu ïpï dai bhïimu tukuga ix makïdï mai ugiatïi ïpï.

Daiñi, mos arhi ïmaduga go Adán ix makïdï bua go mukigami soimaaxi dunakai tukamïrï ix kaxkïdï xibi mumukui bïïxi óídakami. Dai podukai ïpï mos arhi ïmaduga Suxi Kristo ix makïdï gïr buapi go duakaragai ïpï. Kaxkïdï tudu bïïxi odami mumukui aaduñdïkatai ïgai go Adán. Dïï gia bïïxkatai ix makïdï ïr aaduñdï Suxi Kristo duduakatuda agai.

Mai bhaiga aatïmï ix oidakagi bïïxkïrï bïïtarï idi tukugakïdï ix makïdï bia aatïmï xibi di. Kaxkïdï ix dukai ïmo odami maigobai dadasai yukuxi kïrhiñdadï dai gï aadai yukuxi utudukami podukai Diuxi maigobai dasamu gïr tukuga ix makïdï ugiatïi dai gïr maakimu ix makïdï gia mai ugiatïi.

Dai xïïxkadï ka ugiti agadagi idi oidigi aidï dibiamu Suxi Kristo ïpamu gatïanïda agaitai tami idi oidigi daama. Dai aidï maitïmu ïgai bïïxi ix makïdï ïr gatïtïanïdami dai ïr buidïrï bïtïkamigadï. Dai ka maitïkai ïgai buidïrï bïïtïkamigadï bhïimu Suxi sïïrhikami dai Tïanïdami bimu. Dai bhodïrï tïïgidamu ïgai go sïïrhikami Diuxi gïr Oga sai Diuxi gïr Oga adaama tïanïdagi. Dai bhodïrï kugatïrï Suxi ugitituda agai go mukigami sai ka mai kona odami.