Popular Bible Verses from Yesaya 11

Share

Munepa wa Apwiya onaakhalle va olliye, munepa woovaha ezeru ni wiiwesesa, munepa woovaha malangizo ni masiva, munepa woovaha odduwella ni owoova Apwiya. Nave owoova Apwiya sika enaakhalle ello yoomuhakallalliha. Kheeruzaka mooweha ekhove apaalle ohumullulla voothwarani ddawiiwa.

Enthambi eneerophuwa va nikoto na Yese nave yoophuwa eneerokhuma o misisi ddaye.

Oohoowa aneeroweeruza mweechilungamo, athu shisha a va ellapo yavatthi aneerewaakamullella millatu moohiweha ekhove. Mawu muwano mwaye enaakhalle ekopo yawaallakella oochimwa, mpweya wa vayanoni vaye oneerowiipha oochimwa.

Echilungamo enaakhalle laambaaye, ororomelleya onaakhalle yoomakella muyuununi mwaye.

Khavikhalla erive ello yoovoreya apaalle yawoononga va mwaango woopatuleya wa Apwiya. Vawi ellapo yavatthi ettheene eneeroddalla ni waadduwella Apwiya wonanko enyanja enaddallelliiwa ni maaddi.

Mumbulu oneerokhalla ni mwaanaankhosa, nanthavi aneerokona ni musaanaapuri, musaanaang'ombe ni mwaanaamukango enaachelleke nimodda, mwaana mung'onong'ono sika anaaddiwehereke.

Nllapo nenno musisi wa Davide enaakhalle embendera wa athu a mitundu ddittheddene. Attheene eneerotthukumana wa olliye nave nipuro naye ninaakhalle na ntitimiho.