Popular Bible Verses from Isaiah 60

Share

Tho in, Jerusalem awng, ni bangin taang in; TOPA vaangletna sia na tungah taang hi!

Minamte sia nangma khuavak sungah hong zuan tu a, kumpite sia nangma ii ni thak khuavak hong zuan tu uh hi.

Minam dangte sia khuazing in tuamcip tu a, Ahihang TOPA khuavak sia na tungah taang tu hi; Ama ompuina ii taanna sia nang taw omkhawm tu hi.

Na minam sung pan a nobel le a kiniamkhiakbel Na innkuan ngawngawn zongh a thahat minam khat bangin lian tu hi. A hun cin ciang keima in hi thu a manlangin ka piangsak tu hi. Keima in TOPA ka hi hi!” ci hi.

Sun hunin ni in na khuavak hi nawn ngawl tu a, Zan hunin tha zongh na khuavak hi nawn ngawl tu hi; Keima TOPA sia a tawntung na khuavak ka hi tu hi; Ka vaangletna khuavak sia nang tungah taang tu hi.

Na hee, na khuangaina nite bo tu hi. Keima TOPA sia a tawntung na khuavak ka hi tu a, Ni le tha sangin ngei khozaw tu hi.

Hi thu mu in thinnopna taw na kidim tu hi; Na lungdam leilamin na liing tu hi. Minamte ii haunate nang kungah hong kipuak tu a; tuipi ngal panin amate ii haunate hong theng tu hi.

Bang thu piang ziam na kiim na paam en in: Inn ah hong cia tu in na mite kikhawm uh hi! Na tapate uh mun khuala pan hong cia tu uh hi; Na tanute sia patangnote bangin kitoai tu hi.

Na mite theampo in a maan seam tu a A tawntungin tua ngam lua tu hi. A theampo tungah ka letna a pualaak tu in tuate ka suan a, ka vawt hi.

Thazaw suangin kizawthawkna awte kiza nawn ngawl tu hi; Suksiatna in na ngam hong siasak kik nawn ngawl tu hi. Luphung khat bangin nang kong dal, kong pao tu hi; Nang hong ngum zo ka hikom nong pok tu hi.

Minamte ii kumpite in amate ii haunate nang kungah hong paipui thei natu in, na kongpite sun le zan in kihong tu hi.

Midian le Ephah panin, kalaoh vanhpua honpite hong pai tu hi. Amate sia Sheba panin hong pai tu a, Khamh le ngimnamtui hong paipui tu hi. Mihingte in TOPA sep sa thuphate son tu uh hi!

TOPA in Jerusalem tungah, “Ngamdangmite in na luphungte ciang kik tu a, A kumpite in nangma na seam tu uh hi. Ka thin uukin nang daan kong pia a, Ahihang tu in ka maipha le kong hesuakna nang kong lak tu hi.

“Nang sia hong kinusia nawn ngawl, hong ki ensan nawn ngawl tu a, A kinusia khuapi le a ngamkhing khuapi na hi nawn buatu hi. Keima in nang sia a lian le a mealhoi in kong vawt tu a, A tawntung, a tawntungin lungdamna munin kong vawt tu hi.

A nu in a tasen a op bangma in Minamte le kumpite in nang hong keam cing tu hi. TOPA ahi Keima in nang kong ngum zo a, Israel ii a vaanglian Pathian in Nang hong suataksakna thute na he tu hi.