Popular Bible Verses from Tito 3

Share

Xwiri i Dios chi Tol qe, xu'aljinsaj i rutzil uk'ux chqe xaq xuk'ut i k'axnab'al uk'ux chke konojel i winaq. Ru' ile xojuto. Are ti rumal jun utz xqa'an chwach Ire, xa rumal xril tob'al qawach. Ire xojuto, xuch'aj rij i qanima elsab'al re i qamak. Ru' uch'ajik i qanima le, i Lo'laj Utewal i Dios ku'an chqe chi kojalax ukamul, i kuya jun qak'aslemal k'ak'. Man i Dios, rumal i Jesucristo chi Tol qe, i Lo'laj Utewal lik nim xuya chqe; keje ile kojuyijb'a man koj-on utz chwach ire. Xa rumal i rutzil uk'ux keje xu'an ile chqe man kqariq ni qak'aslemal chi qoy-em, chi lik nti uk'isik.

Chakuxtaj chke, chkiya kib' pu'ab' i atb'al tzij, xaq pki'ab' i raqan u'ab', chekojon chke; xaq o uchak je sik'aj chu'ankil ni'pa i utz. Mkich'ach'a jun chik, xaq mkitzukuj ch'oj; xwi chki'ana che kib' chi utz kik'ux chke i winaq, xaq chki'ana i chom chke konojel.

Xwiri chajek'a awib' we o i kkichap taq kib' chitzij chi nti roqxik; xaq makoj retalil che taq ujer tzij chi to' xkich'ob' i katit kimam; xaq ni'pa i to' kkirayij ch'oj, chajek'a awib' ku'. Xaq makoj retalil chke i to' kkitzukuj ch'oj chrij usuk' i atb'al tzij chi tz'ib'tal kan rumal i mam Moisés. Xa are i b'iroxik chi nti uchak xaq nti jun utz ku'an chiwe.

Xwiri we o jun chi to' ajyakol ch'oj chkixol i jutzob'aj re i Dios, chapixb'aj juyak o kamul chi kumayij u'ankil. We ku'an taj, te'uri chawesaj b'ik.