Popular Bible Verses from Apocalipsis 3

Share

Chita pe', yin in tak'al chwach uchija re iwachoch, kintijin chisik'ixik. We o jun kuta inch'awb'al, xaq kujaq uchija chwe, yin kinok uri ru' pa ja, xaq kqatij wa junam ru'.

Ire kub'ij: Yin is weta'am wach i kixtijin chu'anik. Weta'am chi pik'ux ix ti joron, xaq ix ti mi'in; mitene lik kinikojo, xaq mitene kiniwo'taj kanoq. Kwaj yin wetene lik ix joron, o wetene lik ix mi'in. Xwiri, lik xa ix saqli': Ix ti mi'in, xaq ix ti joron; rumali xa kixinxab'uj loq.

Keje ile kinb'ij chiwe, man yin is keinyajo, xaq keinjek' ru' kilo'xik konojel ni'pa i k'ax keinna'o. Rumal uri, chi'ana che iwib' ix re chik i Dios ru' ronojel ik'ux; chijalwachij inojb'al i lik chixtzalij chik ru' Ire.

Ire kub'ij: Yin is weta'am wach i kixtijin chu'anik; chiwila pe', yin in ya'om xaq in jaqom ni jun uchija chiwe, chi lik nti jun ktz'apiwik. Yix, tupu nti qas i cho'ab', xwiri ix kojonnaq che intzij, xaq iwuwam ti uwach chi ix we yin.

Ni'pa i kkiqajsaj ucho'ab' Itzel, kinya chke kekub'i ni pintzal pa inkub'ib'al chi o u'ij. Keje pacha xin-an yin, xinqajsaj ucho'ab' Itzel, xaq xinkub'i chik putzal Inqajaw pa kub'ib'al chi o u'ij.

Yix kib'ij chi lik ix b'eyom, lik ix b'eyomarnaq na, chi lik nti rajwaxik chiwe kib'ij; xwiri kina taj chi lik nti o iwu', lik o i rajwaxik chiwe. ¡Lik ix xuy, to' iwach! Lik ix nib'a', lik ix mawach xaq lik ix ch'analik.

Yix i'anom pacha kub'ij intzij inpixab' xaq o unimal ik'ux chwach i k'ax; rumali, kixinchajij na are kk'un i nim laj uyej chwach ronojel i jyub' ta'aj. I uyej le, ktzaq pkiwi konojel i je re uwach i jyub' ta'aj, ilb'al re pachin i je re i Dios.

Lik ya kink'unik. Miwo'taj i utz chi kixtijin chu'anik, keje ile mixatjun kmajaw isipon chi usujum i Dios chiwe.

Chi'ana pen uk'unsaxik saq chiwach. Chiwalijsaj chik ik'aslemal chi k'a o pik'ux, man lik ya kchupik. Yin wilom chi ni'pa taq i ki'ano lik k'a o utz taj che chwach i Dios.