Popular Bible Verses from Mə̀Hibrù 11

Share

Ibḛfiŋ ya ni kyeri gha àghò biri bèrì aghi ze ne àghò nɔŋi ìwe ikɔndi igun se ghɔ̀mɔ̀ bə̀ kyèri gha ighi mbe ne chəyi àghò we bàrà, àghò biri bèrì. Ibḛfiŋ gho̰ ya aghi ze ne bəd mbe te aneg ya beri, Ŋwiye si niŋ awɔb gha mbe kòʼ.

Wə̀d ne chəyi wì beri ibḛfiŋ, chəyi tì tengàŋ ghì inug ne Ŋwiye kɔ̀ŋi. À ya ane imbə̀ʼ icheg ne wə̀d ne kə̀bə̀ ni ya ghùmnə Ŋwiye, wì mənyìʼ bèrì ibḛfiŋ gha Ŋwiye we angu bə̀ nàʼà chùd abə bəd mbe ne kə̀bə̀ ni kyeri aməd ane ìzɔb fìŋ ijìm.

À ya anjìm ibḛfiŋ ne tì kyeri gha Ŋwiye ya tangi isəg ane ìwi ìngam, ni gha ighi mbe ne tè bàrà kayi mbi ya tangi ane ighi ni ya fə yaʼi.

À ya ibḛfiŋ ya ghì gha Abràham zugri Ŋwiye anyumə̀ ne Ŋwiye ya kàri aməd gha wì duwə inga àzi aben ghò ane asiŋi ne Ŋwiye biri nàʼ ibo. Ka chəyi Abràham ya kyeri asiŋi ze ne wì yaya ghò angu, wì ya dù ibo aben ghò. À ya ibḛfiŋ ya ghi wì ghò chùghi inga asiŋi tìsɔ̀ʼ ze ne Ŋwiye ya kàʼi ibo icheg wə̀d tìsɔ̀ʼ. Abràham ya chughi inga izuŋ. Azìg tì Jàkɔb ya bə̀ chùghi inga izuŋ icheg məd. Ane, mbɔb məjìm ya bə̀ jəg ighi mbe ne Ŋwiye ya kàʼi abə Abràham.

À ya ibḛfiŋ ya ghi Nwa̰ zugri Ŋwiye anyumə̀ ne Ŋwiye ya pati aməd imbə̀ʼ ighi ne chəyi məd ya kyeri. Ane, Nwa̰ ya tangi abaŋ igyi ne ya chi aməd tì inəbi məd inga ngəʼ. À ya ibḛfiŋ ìwi Nwa̰ ya ghi Ŋwiye zi isaʼi igun bəd mbe igun isəg. Anjìm ibḛfiŋ ìwi Nwa̰, Ŋwiye ya niŋ aməd ane wə̀d ne təmi kòʼ.

À ya anjìm ibḛfiŋ ne Ŋwiye ya niŋi Enɔ̀g izɔm ghò ikaŋ àbɔ̀ŋɔ. Chəyi wə̀d mɔ̀ʼɔ ya ywirì bàd aməd imbə̀ʼ icheg ne məd ya fə ghò ikaŋ àbɔ̀ŋɔ. Bɔŋ wì ya se ghò ikaŋ àbɔ̀ŋɔ bəd ya kyeri aməd icheg wə̀d ne ghìyə̀ inug ne Ŋwiye kɔ̀ŋi.

À ya anjìm ibḛfiŋ ne Abè ya nàʼi aghi àfàtì ne bɔŋi chè àze ne Ken ya nàʼi. À ya anjìm ibḛfiŋ ìwi Abè ne Ŋwiye ya gha məd ya wə̀d ne təmi kòʼ anyumə̀ we ne Ŋwiye ya gha, aghi àfàtì məd kòʼ. Ka Abè ya jiʼì ku yi, anjìm ibḛfiŋ məd, məd we kiri ghàmà.

Ka Abràham ya fə nùn, ne iweg məd Sèra ya bə yaʼ kɔ̀m àyi, à ya ibḛfiŋ ya ghi gha wì ywirì gwi ŋwan. Ze ya yaʼ ane imbə̀ʼ icheg ne Abràham ya bḛ gha Ŋwiye we ne kàʼi ni nàʼ ŋwan ibo ya fàʼà anug ne wì kàʼi.

Abràham yaya nḛ̀ imbìghè ni nyi inga asiŋi ze ne Ŋwiye zìye ya ŋwaʼi, zèg ati bə̀ bɔm ane ìmbi ibo.

Anyumə̀ ne Muse ya fə kweghi, à ya ibḛfiŋ ya ghi wì to̰ yi gha zìye kayi ŋwan ne ŋwan àyi ìwi ifɔn Ferò gwi. Muse ya də̀b ni zən ngəʼ tì bəd Ŋwiye sɔ̀mɔ ni tə̀d inga inug tibɔ̀ŋ ne chəyi anug ne tə̀d biri tàndì. Wì ya bàd gha anug ne zə̰ ngəʼ imbə̀ʼ Wə̀d we ne Ŋwiye zɔ̀ʼi ze bɔ̀ŋ chè ighi àka inun mbe ne yaʼi a Ijìb imbə̀ʼ icheg ne wì yaya nḛ̀ imbìghè igun chùd ze ne wì biri bèrì. À ya ibḛfiŋ ya ghi wì nɔ̀ʼ a Ijìb ne chəyi wì bɔ gha ifɔn a Ijìb biri gaŋ ibo. Wì ya nyimbi fìŋ to̰ yi ni bə̀ndì imbə̀ʼ icheg ne wì yaya nḛ̀ igun Wə̀d we ne chəyi tì mbi bàd aməd.

Anyumə̀ ne Ŋwiye ya zweʼri Abràham, à ya ibḛfiŋ ya ghi Abràham chuʼri ìwi nyɔd ni nàʼ Azìg ane aghi àfàtì, ne ŋwan məd yaya məyi Azìg we imɔʼ.

À ya anjìm ibḛfiŋ ne chəyi mbi ya zweti Rahàb ne ya yaʼi àkwàrì abɔ̀ʼ bəd mbe ne ya ghi tìzughə̀ abə Ŋwiye. Chəyi mbi ya zweti aməd imbə̀ʼ icheg ne wì ya niŋ mə̀Ju mbe ne ya ghò ni nyaʼ nwendi inug imbə̀ʼ Jèrikò, nə̀mbì ibo inga nəb.

À ya anjìm ibḛfiŋ ne mə̀Ju ya bani Tìbà Bàghi icheg bəd ne yaya yḛ̀ igun ìseg zɔbi. Anyumə̀ ne bəd mbe a Ijìb ya bə kəb ni bani, mbi ya fum inga igyi we, ku kwàʼ mbɔb məjìm.

À ya anjìm ibḛfiŋ ne ikam we ne ya che kad Jèrikò ya buʼə aseg anyumə̀ ne mə̀Ju ya yḛ chè kad ikam we ane ineg ìsàmbe.

À ya ibḛfiŋ ya ghi Muse ghà abə mə̀Ju gha mbe nɔŋɔ Iteri Chègun, bə̀ zɔʼ anəm nyam igun atog akɔŋi. Mbi ya ghì ane ni gha chəyi Angirə̀ we ne yaya zwète fɔ̀d bɔn mbaŋà biri zweti fɔ̀d bɔn mbaŋà abə mə̀Ju.

Anyumə̀ ne Jòseb ya se nḛ̀ ni ku, à ya anjìm ibḛfiŋ ne wì ya ghàmi imbə̀ʼ icheg ne mə̀Izre biri ghum dù a Ijìb, bə̀ kə awɔb gha mbe ghum niŋ ìmbi iwu nyɔd dù inga Ijìb.

Anyumə̀ ne Jàkɔb ya se nḛ̀ ni ku, à ya anjìm ibḛfiŋ ne wì ya zì àbɔrɔ̀bɔd igun bɔn ìmbi Jòseb. Wì ya bə̀ zə̀ʼrə igun ìfi fìmbàŋì ghùmni Ŋwiye.

À ya anjìm ibḛfiŋ ne Azìg ya zi àbɔrɔ̀bɔd igun Jàkɔb tì Esawò ni gha ìwɔb isu yaʼ icheg chɔm.