Popular Bible Verses from Tito 3

Share

Maamina Dachi Akõre chi Karibabariiba ichi biꞌia nii maud̶e ichiba dachi kʉ̃ria b̶uu jomaurãmaa kuitaabiasii. Mauba dachi karibasii. Dachiba biꞌia wauped̶aad̶a kakua karibaabasii, maumaarã ichi kĩra chuburiasiid̶eeba karibasii. Dachi kachirua jeraasii paru ea jeraad̶a kĩra nuread̶amera maud̶e Dachi Akõre Jauriba dachimaa chokae b̶uai chiwid̶i deasii. Dachi Karibabarii Jesucristod̶eeba, Dachi Akõreba ichi Jauri dachimaa ãrea deasii bania ãrea easii kĩra dachi kakua ʉ̃rʉ. Maka Dachi Akõreba ichi sõbiad̶eeba dachi jipa unu b̶uud̶eeba ewaricha ichi ome chokae panad̶ai. Mau esed̶au panuu.

Ãbarãmaa kĩrababiáse nau iujãad̶ebena jaradea ua b̶uabadaurã juad̶e panad̶amera. Ãchiba jaraaduu ijãa waud̶ai panuu maud̶e ne joma biꞌia waud̶ai baita nuread̶ai panuu. Ãbarãmaa jarase: ab̶au ʉ̃rʉbena kachirua berread̶awẽa panad̶ai panuu maud̶e oa kachirua berread̶awẽa panad̶ai panuu, maumaarã jomaurã ome sõbia nuread̶ai panuu, maarã audeara kʉ̃risiad̶awẽa.

Maamina barikia bed̶ea biawãe b̶uu kakau oa kachirua berrearã́se. Maud̶e Moisesba b̶ʉd̶a ʉ̃rʉbena oa kachirua berrearã́se. Maud̶e dachi nabẽraed̶ebenarã trʉ̃ jaradeabadau ida b̶use. Joma mau biꞌiwãe b̶uu maud̶e ab̶a bid̶a karibakau.

Ab̶auba ãbarã ijaraa berreabiiruubʉrã, mau iadaase waa maka waurãamera. Mauba ijãawẽebʉrã, waya iadaase. Maud̶e wabid̶a ijãawẽa b̶uubʉrã, mau ome b̶uarã́se.