Popular Bible Verses from သုၵ်ႉတၢမ်ႇ 6

လွင်ႈ​တၢင်း​ဢၼ် ထႃႇဝရႃႉ​ၽြႃး​ၸင်း​ႁူၵ်း​ပႃး​ဢမ်ႇ​ၵႃး၊ လွင်ႈ​တၢင်း​ဢၼ်​မၼ်း​ၸဝ်ႈ​လီ​ႁင်ႈ​ဢဵတ်ႇ​သဵတ်ႇ​ၸဵတ်း​ပႃး​ၸမ်ႉ၊- ပဵၼ်​မၢၵ်ႇ​တႃ​ဢၼ်​ပူၵ်း​ပႅၼ်​ၽႅၼ်​သုင်​ၼၼ်ႉ​ပႃး​ၼိုင်ႈ၊ လိၼ်ႉ​ဢၼ်​ၸၢင်ႈ​သုင်း​မူႉ​သႃႇ​ၼၼ်ႉ​ပႃး​ၼိုင်ႈ၊ မိုဝ်း​ဢၼ်​ၸၢင်ႈ​ထွၵ်ႇ​ပႅတ်ႈ​လိူတ်ႈ ၵေႃႉ​ဢၼ်​ဢမ်ႇ​မီး​ဢပႅတ်ႈ​ၼၼ်ႉ​ပႃး​ၼိုင်ႈ၊- ႁူဝ်​ၸႂ်​ဢၼ်​ၵျၢမ်ႇ​ပွင် တၢင်း​ၵျၢမ်ႇ​တၢင်း​ပွင်​ဢၼ်​ဢမ်ႇ​လီ​ဢမ်ႇ​ငၢမ်း​ၼၼ်ႉ​ပႃး​ၼိုင်ႈ၊ တိၼ်​ဢၼ်​ၸၢင်ႈ​ၶုၼ်ႇ​လႅၼ်ႈ​ၶၼ်​ၶၼ်​ၽႂ်း​ၽႂ်း ၸူး​ၵႃႈ​တီႈ​ဢၼ်​ႁဵတ်း​ဢပႅတ်ႈ​ၼၼ်ႉ​ပႃး​ၼိုင်ႈ၊- ၵေႃႉ​ဢၼ်​ၶၢမ်ႇ​သၢၵ်ႈ​သေႇ ဢၼ်​ဢမ်ႇ​မၢၼ်ႇ​ဢမ်ႇ​မႅၼ်ႈ​လႄႈ လၢတ်ႈ​ၵႂၢမ်း​မူႉ​သႃႇ​ၼၼ်ႉ​ပႃး​ၼိုင်ႈ၊ ၵေႃႉ​ဢၼ်​ၸၢင်ႈ​ႁဵတ်း​ႁႂ်ႈ​ပီႈ​ၼွင်ႉ ၽိတ်း​ၵၼ်​ၼၼ်ႉ​ပႃး​ၼိုင်ႈ ဢေႃႈ။

ၵူၼ်း​ၶၢၼ်ႉ​ၵူၼ်း​ဢိူၼ်​ဢိူၺ်း၊ ၵႂႃႇ​ၸူး​ၵႃႈ​တီႈ​မူတ်ႉ​သေ​လႄႈ ၶႆႈ​ၸႂ်​တူၺ်း တၢင်း​ႁဵတ်း​တၢင်း​သၢင်ႈ​မၼ်း​ၼၼ်ႉ​လႄႈ မီး​ပိင်ႇ​ၺႃႇ​တႃႉ။

ပေႃး​မႂ်း​ဝႃႈ၊ ၼွၼ်း​ၵမ်း​ဢွၼ်ႇ​ၼိုင်ႈ​လူး​ၵွၼ်ႇ၊ လပ်း​ၵမ်း​ဢွၼ်ႇ​ၼိုင်ႈ​လူး​ၵွၼ်ႇ၊ ဢဝ်​မိုဝ်း​ၼင်ႇ​ၵၼ်​ၵၼ် ၵွတ်ႇ​ၵၼ်​ၵမ်း​ဢွၼ်ႇ​ၼိုင်ႈ ႁႂ်ႈ​လႆႈ​ၼွၼ်း​လပ်း​လူး​ၵွၼ်ႇ၊ ဝႃႈ​ၼင်ႇ​ၼႆ​ၸိုင်၊- တၢင်း​ယၢၵ်ႈ​တၢင်း​ၽၢၼ်​မႂ်း​ၼၼ်ႉ တၵ်း​ႁွတ်ႈ​မႃး​မိူၼ်​ၸိူဝ်ႉ​ၼင်ႇ ၵေႃႉ​ဢၼ်​ၵႂႃႇ​တၢင်း​ပႆ​တၢင်း​ၼၼ်ႉ ဢိၵ်ႇ​တင်း​တၢင်း​ဢၼ်​ဢုၵ်ႉ​ၸႃႇ​မႂ်း သုမ်း​ၸွမ်း​ၼၼ်ႉ တၵ်း​ႁွတ်ႈ​မႃး​မိူၼ်​ၸိူဝ်ႉ​ၼင်ႇ​ၵူၼ်း​သိုၵ်း​ၼၼ်ႉ​ဢေႃႈ။

လုၵ်ႈ​ၸၢႆး​ၵဝ်​ဢိူၺ်း၊ ထွမ်ႇ​ဢဝ်​ၵႂၢမ်း​ပိင်း​ၺၢပ်ႈ​ပေႃႈ​မႂ်း​တႃႉ။ ယႃႇ​ပေ​ၸုၼ်ႉ​ပႅတ်ႈ တြႃး​ဢၼ်​မႄႈ​မႂ်း​ပၼ်​ၼၼ်ႉ။- ဢဝ်​မတ်ႉ​ၽုၵ်ႇ​ဝႆႉ ၵႃႈ​ၼိူဝ်​ႁူဝ်​ၸႂ်​မႂ်း​တႃႇ​သေႇ​လႄႈ ဢဝ်​ႁွႆႈ​ဝႆႉ​ၵႃႈ​တီႈ​ၶေႃး​မႂ်း​တႃႉ။