Popular Bible Verses from इफीसियन 5

Share

तूँ पंचे परमातिमा के पियार लड़िका आह्या, एसे उनहिन कि नाईं पबित्र जीबन बिताबा। अउर जइसन मसीह घलाय हमसे पंचन से प्रेम किहिन हीं, उहयमेर तुहूँ पंचे एक दुसरे से प्रेम करा। अउर प्रेमय के कारन हमहीं पंचन काहीं मुक्ती देंइ के खातिर, ऊँ परमातिमा काहीं प्रसन्न करँइ बाले सुगन्धित बलिदान के रूप माहीं, उनखे आँगे खुद काहीं बलिदान कइ दिहिन।

एसे तूँ पंचे सतरक रहिके अपने जीबन काहीं जाँचा, कि तोंहार पंचन के चाल-चलन कइसन हय; तोंहार पंचन के चाल-चलन निरबुद्धी मनइन कि नाईं न होय, बलकिन बुद्धिमान मनइन कि नाईं होंइ चाही। अउर तोंहईं पंचन काहीं अपने जीबन काहीं सुधारँय के खातिर, जउन खुब कीमती समय मिला हय, ओखर पूर-पूर उपयोग करा, काहेकि बहुत बुरा समय चल रहा हय।

अउर पबित्र आत्मा से भरपूर होत जा, इआ नहीं, कि तूँ पंचे मदिरा पिके मतबार बना, जउने से लुचपन के काम होत हय। बलकिन आपस माहीं परमातिमा के भजन, स्तुति के गाना, अउर आत्मिक गाना गाबत रहा, अउर अपने-अपने मनन माहीं प्रभू के हाजिरी माहीं स्तुति करत रहा। अउर हमेसा सगली बातन के खातिर, हमरे पंचन के प्रभू यीसु मसीह के नाम से पिता परमातिमा के धन्यबाद करत रहा।

एसे निरबुद्धी मनई कि नाईं न बना, बलकिन प्रभू के इच्छा तोंहरे पंचन के जीबन माहीं का ही? ओही बड़े ध्यान से समझँय के कोसिस करा।

अउर हे मंसेरुअव, अपने-अपने मेहेरिअन से प्रेम करा, जइसन मसीह घलाय मसीही मन्डली से प्रेम कइके, अपने-आप काहीं ओखे खातिर बलिदान कइ दिहिन हीं।

काहेकि तूँ पंचे पहिले अँधिआर से भरे रहे हया, पय अब प्रभू के ऊपर बिसुआस कइके उँजिआर से भर गया हय, एसे तूँ पंचे अब उँजिआर अरथात जोति के सन्तान कि नाईं जीबन जिआ।

अपने जीबन माहीं मसीह के भय माना, अउर आपस माहीं एक दुसरे के सम्मान करा।

हे मेहेरिअव, अपने-अपने मंसेरुअन के अइसन अधीन रहा, जइसन तूँ पंचे प्रभू के अधीन रहते हया।

पय तोंहरे पंचन म से हरेक जन अपने मेहेरिआ से अपने देंह कि नाईं प्रेम करय, अउर मेहेरिआ घलाय अपने मंसेरुआ के मान-सम्मान करँय।

अउर पबित्र सास्त्र माहीं इआ लिखा हय, कि “मनई अपने महतारी-बाप काहीं छोंड़िके अपने मेहेरिआ के साथ माहीं रही, अउर ऊँ दोनव एक तन होइ जइहँय।”

अउर तूँ पंचे अँधिआर के बुरे कामन माहीं सामिल न होया, बलकिन उनखे बारे माहीं मनइन काहीं उलउना द्या।